إنت عبيط يابنى حد يتجوز وهو عنده 22 سنة ؟
الحقيقة فى أسباب كثير تخليك تتجوز فى العشرينات دى بعضها …
1 . هتكبروا مع بعض …
لما تبقى إنت ومراتك عندكوا تلاتين سنة وعارفين بعض من وإنتوا عندكم 18/19 سنة تخيل كم التفاهم والتلاقى اللى هيبقى فى حياتكم ، لما تبقوا فاكرين شكل بعض من وانتوا لسه فى الجامعة ، لما تخرجوا وتتبسطوا وتعيشوا شبابكم كله مع بعض ، هتبقوا سوا فى كل خطوه فى حياة كل واحد فيكم ، شغل ، دراسة أصغر وأكبر النقلات اللى فى حياتكم هتحضروها سوا بحلوها ومرها بدل ما تعيشها لوحدك ، هتكبروا مع بعض ولبعض كل واحد فيكم هيعيش للتانى شبابه وهنا انتوا الاتنين بتتبسطوا مش هى لوحدها ولا انت لوحدك …
2 . ذكرياتكم كلها مع بعض
بما انكم عارفين بعض من بداية العشرينات أو قبل كده ، بنسبة كبيرة جداً هتبقوا أول علاقة حقيقية فى حياة كل واحد فيكم ” بغض النظر عن كم البنات اللى عرفتهم فى حياتك ” ، بس هى العلاقة الوحيدة الحقيقية اللى انت نفسك تكمل معاها بقيت عمرك وهى كمان ، وبالتالى تخيل / تخيلى كده ذكرياتكم كلها مع بعض من وإنتوا صغيرين الوحش قبل الحلو ده أحسن بكثير من ما تعرف واحدة وانت عندك 30 سنة ولا حاجة متعرفش عنها حاجة ولا هى تعرف عنك حاجة وتقعدوا سنين تكتشفوا ماضى بعض بعد الجواز …
3 . بتبقوا شخصية واحدة
ميزة تانية هى انكوا لما بتتجوزا وانتوا صغيرين مبتحتاجوش تتطبعوا على بعض وهتلاقى إن معظم اللى اتجوزوا صغيرين بيبقوا متفاهمين جداً ، لأنهم قضوا وقت كبير يعرفوا طباع كل واحد فيهم ويتأقلموا معاها وكل واحد غير من نفسه عشان يبقوا هما الإثنين متفقين على شكل معين وطريقة معينة للتعامل والحياة ما بينهم من الأخر بقوا شخصية واحدة ودى أهم حاجة فى الجواز اللى بتقلل الخلافات بشكل كبير ان كل واحد حافظ طباع التانى وبيحب عيوبه قبل مميزاته …
4 . بتاخدوا خبرة فى الحياة ” بدرى “
لما تبقى مرتبط وملتزم وانت فى بداية شبابك ده بيديك خبرة كبيرة جداً فى الحياة بدرى هتفرق معاك فى المستقبل بشكل كبير وبيخليك تقابل الواقع بدرى بردوا ان الحياة مش وردى أوى ودائماً هيبقى فيها مشاكل بس لما تواجها انت وشريك حياتك مع بعض بتتعلموا منها دروس هتخليكم وانتوا لسه شباب وعندكم 30 سنة عندكم خبرة أكبر وقادرين تحلوا أى مشكلة تواجهكم لأنها عدت عليكم من زمان أوى ، كل واحد فيكم هيتعلم ازاى يتحمل المسؤولية ويحافظ على وعودة ويلتزم بيها وازاى كل واحد ممكن يضحى عشان الطرف التانى الجواز هينمى فيكم الحاجات دى …
5 . مش هتضيعوا فلوس تندموا عليها
عادة هيبقى كل الفلوس اللى داخلة لكل واحد فيكم رايحة فى الجواز ولوازمه إتفقنا إو إختلفنا على أهميتها وده معناه انك مش هتقضى شبابك كله تصرف فى فلوس هنا وهناك ممكن بعد كام سنة تندم عليها إنها راحت فى حاجة مش هتدوم سواء سفر أو عربية إلخ … كل الحاجات دى ممكن تعملها بعد الجواز لو انتوا الاتنين عندكم طموح وبتساعدوا بعض والحقيقة ممكن تحقق أكثر منها كمان …
6 . سقف توقعاتكم هيبقى محدود ودى حاجة كويسة
لو انت فضلت 10 سنين تدور على أحلى وأحسن وأنجح واحدة وهى قعدت تدور على أحلى وأحسن وأنجح واحد عشان تتجوزوا لا إنت هتتجوز ولا هى ، لأن الصفات دى عادة عمرها ما بتجتمع فى شخص واحد لا فيك ولا فيها ، بالتالى أهم حاجة بتدور عليها هو الحب والراحة النفسية والتفاهم عشان كده هى ميزة محدش فيكم ضيع أحلى سنين عمره يدور على الشخص المثالى وفى الأخر هى اتجوزت واحد مش عاجبها عشان مفيش غيره وانت عرفت واحدة مثلت عليك كل اللى كنت بتحلم بيه وبعد الجواز اتغير الحال …
7 . هتنجحوا وتفشلوا سوا
هتبدأوا حياتكم فى شقة عادية وتشتغلوا وتتعبوا سوا لو عندكم طموح هتنجحوا سوا ، هتقدروا تبنوا لنفسكم الحياة اللى بتحلموا بيها ، الحياة اللى انت نفسك تعيشها وهى كمان ، بس بدل ما يبقى شخص واحد بيحارب لوحده هتبقوا اتنين ولو هى مبتحاربش عشان ضوافرها متتكسرش ^_^ على الأقل هيبقى عندك Backup فى البيت …
8 . ماذا لو لا قدر الله ؟
السيناريو الأسوء إن حصل مشاكل كبيرة مرتاحتوش متفقتوش وده نادراً ما يحدث ، بس لو حصل ماذا بعد ؟ تخيل انكم انفصلتم وانتوا لسه فى العشرينات ، لسه كل واحد فيكم عنده وقت يبدئ حياة جديدة ويستفيد فيها من الخبرات اللى اكتسبها فى حياته الأولانية …
لكن على الجانب الأخر وجودكم مع بعض من صغركم هيخلي عندكم وقت تدوه لبعض لما تبقوا حققتوا نفسكم على بداية التلاتينات مثلاً لأن أحلى سنين عمركم هتعيشوها مع بعض ساعتها ، كل واحد فيكم هيبقى قطع شوط كبير جداً فى حياته وهو عنده 30 سنة ، فى حين إن هيبقى لسه فى ناس تانية بتحط رجليها على أول الطريق وبيتعرفوا على بعض ويا عالم هينجحوا ولا لا …
ملحوظة : كلامى ده معناه إنك تخطب البنت اللى بتحبها أول ما ربنا يكرمك بفلوس الشبكة مش تقضيها صحوبية 5/6 سنين وبعد كده تقرر تتقدملها .
احمد عزت
هل ساعدك هذا المقال ؟
