نصائح عامة للحياة اليومية




القاعدة الوحيدة الثابتة فى الشغل ، إن مفيش قاعدة ثابتة على كل الناس اللى فشل مع غيرك ممكن ينجح معاك واللى شغال مغ غيرك مش شرط يظبط معاك والمجال الواحد ليه أكثر من زاوية تشوفه منها والـ Creativity محدش بيعلمها لحد ومبتتنسخش كوبى – بيست لو مش بتجرب بإيدك هتفضل تسمع فى Case Studies طول عمرك .
– – – – – – – – – – – – – –
أهم 5 برامج بستخدمهم على موبايلى بشكل شبه يومى …
 
1 . برنامج Quora : لو عندك أى سؤال فى أى مجال هتطرحه هناك وهتلاقى إجابات من ناس عندها خبرة فعلاً ومعلومة بناء عن تجربة أو إطلاع ، ده غير إن البرنامج فى حد ذاته ممتع جداً فى قرائتك للأسئلة اللى تهمك وإجابتها المختلفة والموضوع ده بيوسع رؤيتك لكل مشكلة أو سؤال محيرك من خلال الإجابات اللى من شخصيات بتجارب وخبرات مختلفة .
 
2 . برنامج Rescue Time : الحقيقة ده أفضل برنامج أنا شوفته فى حياتى تقدر من خلاله تدير وقتك وشغلك وتقسم تاسكات يومك والبرنامج نفسه بيتابعك فى كل تاسك ويعرف نفذته ولا لا ، كمان بيعرف وقت إستخدامك للبرامج على موبايلك زى الفيس بوك وإنستجرام وغيرهم ، وممكن يحجبهم لوقت محدد عشان تقدر تركز فى اللى وراك ، من أفضل برامج الـ Time management خصوصاً إنك كمان تقدر تستخدمه على اللاب توب .
 
3 . برنامج Wattpad : لو بتكسل تقرا من الكتب ولو أنى أنصحك بكده لأن القراءة من الكتب ليها متعة تانية خالص ، يبقى نزل البرنامج ده فيه أكثر من 100 ألف كتاب مجانى تقدر تقراهم من على موبايلك فى كل المجالات تقريباً والميزة إنه فعلاً بيعرض كتب معظمها كان Best Selling فى فترة زمنية وكمان بيعرض قصص قصيرة ممتعة جداً ، أبلكيشن هتدمنه .
 
4 . برنامج Fabulous : البرنامج ده للناس اللى عندها هدف نفسها تحققه الفكرة فيه إنه بيعرف هدفك ايه وبيبتدى يديك تاسكات يومية تعملها عشان تحقق هدفك ، وبيفضل يتابع تنفيذها بشكل يومى وفى أخر كل يوم بيعرفك قربت قد ايه من هدفك أو حققت قد ايه من التاسكات اللى توصلك لهدفك ده ، برنامج كويس جداً للناس اللى عايزة حد يفكرها دائماً باللى وراها .
 
5 . لعبة : Limbo : من أحلى اللعب اللى لعبتها عالموبايل من أول ما جبته ، الجرافيك بتاعها حلو جداً وقصتها مختلفة وبتشغل دماغك فيها بشكل كبير ، العيب الوحيد الى فيها إنها بفلوس 😀
 
ملحوظة أخيرة : إمسح الإنستجرام بياخد مساحة ومضر بالصحة .
– – – – – – – – – – – – – –
إدرس عاداتك السيئة ، إكتبهم فى ورقة ، رتبهم من الأسوء للأقل سوء ، إكتب قصاد كل عادة حاجة واحدة هتحصل فى حياتك لو بطلتها ، حط خطة عملية عشان تتخلص منها ، فكر فى خطوات تقدر تبدأ فيها دلوقتى ، سجل الخطوات دى فى reminders على الموبايل تجيلك كل يوم فى مواعيد محددة ، إحترم عاداتك السيئة وإديها حجمها متقولش أنا أول ما أعوز أبطل سجائر هبطل لأنه مش هيحصل ، عاداتك دى بقالها معاك سنين مش هتروح بفيديو تشوفه فيحفذك ولا بنصيحة حد من أهلك ، عشان كده أى كانت العادة اللى عايز تتخلص منها ، إدرسها ، إعرف بتحصل ليه وإمتى وإيه الظروف اللى بتساعد على حدوثها كل مرة ، حاول تبقى أذكى منها أغلب الوقت وتعرف إزاى تتحايل على عقلك لحد ما يبتدى ينساها .
– – – – – – – – – – – – – –
لربك أحكام بيصعب علينا فهمها أحياناً وواحدة من الأحكام دى هى إن ربنا ممكن يأخر عليك ما تعتقد إنت إنه نتيجه مستحقة لمجهودك عشان لو حصلت عليه بدرى هتبطل تتعب وتبذل نفس المجهود اللى كنت بتبذله عشان توصله وده ممكن يأثر بالسلب عليك وعلى ناس كثير حواليك كانت بتعتبرك مثال يحتذى به ومصدر تحفيذ ليهم عشان هما كمان يسعوا ويبذلوا مجهود فـ حصولك السريع على ما تعتقد إنت إنه نتيجة تعبك ممكن يضرك ويضر ناس تانية كثير فربنا بيأخره عليك عشان يستمر جهدك وتأثيرك يطال ناس أكثر ويخليهم يتحركوا ويغيروا فى حياتهم وحياة ناس تانية وده هتجازى عليه فى الدنيا وفى الأخرة ، الكلام ده أنا بوجهه لكل الناس اللى بتتعب وبتبذل مجهود ولسه محستش بنتيجة ملموسة إنت مصدر تحفيذ ودفع لكل اللى حواليك كمل وخليك واثق إن الله لا يضيع أجر من أحسن عملا .
– – – – – – – – – – – – – –



الواحد اتعلم من الكام سنة اللى فاتوا إن أول ما تجيلك فكرة متتحمسلهاش أوى وتبدأ فى التنفيذ لمجرد إنها تبان حلوة ، الأول فكر فيها بمنطق الناقد وطلع كل عيوبها وحاول تفكرلها فى حلول عملية لو عرفت تلاقى حلول واقعية يوافقك عليها إثنين غيرك يبقى الفكرة دى هتنجح بنسبة كبيرة .
– – – – – – – – – – – – – –
هيبقى عندك حلم وهدف عايز توصله هتحوله لرؤية وخطة عمل بعد كده هتبدأ تشتغل على الحلم ده واحدة واحدة هتكتشف ان الرؤية مغايرة للواقع بعض الشئ واللى كنت مخطط له مختلف عن الى بتقابله فتبدأ تحلل وتتعلم من اللى وصلتله و تطور وتصحح من مسارك عشان يناسب رؤيتك وحلمك كل المراحل دى طبيعية فى أى مشروع
 
لكن اللى مش طبيعى إن لما تلاقى الظروف مش بتساندك والمجموعة الشمسية مبتتعامدش على خط واحد عشان تحقق حلمك تقرر تغير أو تقلل من طموحك عشان يناسب ظروفك والعقبات اللى بتمر بيها ، ستيف جوبس كان بيحارب مع المهندسين فى أبل عشان ينفذوا محرر نصوص فيه Fonts مختلفة وبألوان وأحجام مختلفة ولما اتقال له إن ده مش مهم وهياخد وقت طويل جداً فى التنفيذ والأهم نركز على البرمجة وفاعلية محرر النصوص رفد اللى قاله كده عشان مش هيغير رؤيته ويحجمها بناء على الظروف المحيطة بيه أو رأى أى حد تانى .
– – – – – – – – – – – – – – – – – – – – – – – – – – – –
 
أحمد عزت
 
هل ساعدك هذا المقال ؟



تصنيفات : خواطر بالعاميه المصريه,معلومات عامة مفيدة

كلمات دلائلية : ,,,

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..