الرئيسية » خواطر بالعاميه المصريه » نصائح عامة ومفيدة

نصائح عامة ومفيدة

بواسطة عبدالرحمن مجدي
1794 المشاهدات
عبارات جميلة عن الحياة
كل ما إختباراتك زادت كل ما فرصك فى النجاح زادت علاقة مباشرة مفيش فيها إختراع فـ متزعلش لما تقع أو تضيق عليك فى وقت من الأوقات وابتسم لأن حياتك فيها حاجة تعيشها وتتعلم منها مش حياة أمنة روتينية مملة زى ما بتدخلها زى ما بتطلع منها ( أبيض )
– – – – – – – – – – – – – –
بيصعب عليك اللى ضيع نص عمره بيعمل حاجة مش حاببها ومش بتاعته بس عشان يرضى حد أو يبان ” cool ” قصاد الناس ويسمع مدحهم ، اللى هو حرفياً بيلغى نفسه تقدر تقول عليه شفاف ملوش لون ولا شكل بيحاول يبقى الشخص اللى ناس عايزة تشوفه ، المشكلة إنه بيبقى عارف انه بيضحك على نفسه وعارف انه مش مبسوط بس مش قادر يخرج بره فكرة الناس هتقول عليا ايه لو عملت كذه او هتقول عليا ايه لو بطلت اعمل كذه …
– – – – – – – – – – – – – –
الواحد لو معاه دولار ومحافظ عليه مش عايز يغيره ومرة واحدة لقى سعره نزل فى الأرض بيزعل جداً وممكن يدخل فى حالة نفسية سيئة عشان خسر فى حاجة كانت مضمونة معاه ومش عامل حسابه انه يخسر فيها
 
تخيل معايا الوقت اللى احنا مش عارفين هو معانا لحد امتى اتفاجئنا مرة واحدة ان فاضل شهرين تلاتة ، سنتين تلاتة هتزعل اوى على الايام اللى عدت من غير سعى ولا هدف ومن غير ما تبقى حققت اى حاجة فى حياتك تقول ده رصيدى اللى هسيبه عند الناس
 
صعب الكلام ده يؤثر فيك او يخليك تفكر لو متخيلتش الموقف ده بيحصل فعلاً وهو فعلاً ممكن يحصل لأى حد فى اى وقت افتكره بس لما تبتدى تِسوف وتماطل وتكسل وتتواكل ساعتها إصدق النية مع الله انك هتسعى عشان لما تتسأل يوم القيامة على وقتك وشبابك تلاقى حاجة تقولها وساعتها هتلاقى سعيك بيوصل لنتيجة فعلاً
– – – – – – – – – – – – – –
أعتقد أى أب وقع فى فخ السوشيال ميديا وهو كبير لازم يبعد إبنه عنه بقدر الإمكان وهو صغير فكرة إن طفل يتعرض فى بداية عمره لكم الخراء الفكرى الموجود فى صفحات الرياضة والسياسة والكوميكس وتعليقات بعض الناس المتخلفة عقلياً ويبتدى يتعامل معاها بشكل يومى على إنها الواقع هيأثر عليه بالسلب وهيقلل نسبة ذكائه بشكل كبير بلاش نلعب فى دماغ العيال ونحول حياتهم لأكونت وشوية بوستات ولايكات يناموا ويقوموا بيحلموا بيها .
 
أنا فاكر أول ما الواحد عمل إيميل فى 2005 كان بيفتحه كل نص ساعة يشوف لو اتبعتله حاجة معتقد إن ده فرض يومى لازم يقوم بيه وساعتها كنا كبار شوية لكن دلوقتى العيل يبقى عنده 5/6 سنين وعنده أكونت عالفيس بوك وإنستجرام، إشغل إبنك أو بنتك بالـ Social Life مش السوشيال ميديا لحد ما يكبر شوية ويبتدى يفهم ويعرف يفصل ما بين الواقع اللى بيعيشه والهرى اللى بيقابله عالسوشيال ميديا .
– – – – – – – – – – – – – –
إمبارح إتفرجت على فيلم 13 Hours
 
بيحكى بإختصار عن قصة إغتيال السفير الأمريكى فى ليبيا سنة 2012 والأحداث اللى حصلت وقتها هناك والبطولات بتاعة الجنود الأمريكان اللى هما فريق مكون من 6 عناصر وقفوا يدافعوا عن مبنى الـ CIA قصاد هجمات المسلحين اللى قتلوا السفير الأمريكى .
 
بغض النظر عن حبك أو كرهك للجيش الأمريكى واللى بيعمله ، الناس دى عندها قدرة رهيبة على كسب التعاطف والدعم من العالم كله ، وهنا بالرغم من كل المجازر والحروب اللى شارك فيها الجيش الأمريكى
 
بيعرفوا يصدروا للعالم كله ولمواطنين أمريكا نفسهم وش البطولة والتضحية من خلال أفلامهم اللى بتحقق نسب مشاهدة عالية جداً على مستوى العالم اللى عايز أقوله فى الأخر إنك عندك سلاح إسمه ” السينما “
 
قادر يغير قناعات ويرسم ملامح جديدة للدول يقعد يحلم بيها مواطنين الدول الثانية ويتغنوا بيها على إنها المثال اللى يحتذي بيه والحلم الأمريكى اللى كل مواطنين دول العالم بحلموا بيه إلخ …
 
ليه هنا مبنشوفش قصص بطولات جيشنا بتتعرض فى أفلام ” متكلفة ” وتتسوق داخل وخارج مصر بحيث إنك تبتدى تغير قناعات الناس عنك ، وأنا عندى يقين إن فى قصص كثير ممكن تتحكى وتتعرض عن بطولات عساكر وضباط صف فى منهم اللى مات فى أحداث إرهابية شبيهة باللى حصل فى الفيلم بتاع 13 HOURS وغيرها كثير .
 
إحنا أكبر دولة فيها صناعة سينما فى الوطن العربى وفى نفس الوقت أفلامنا كلها يا بيومى فؤاد يا محمود الليثى فى وقت دول بتحسن سمعتها وتغير فى تفكير الناس بأفلامها .
 
الموضوع نقص أحداث تتحكى ولا نقص فكر ولا ايه بالظبط ؟
 
ملحوظة : الفيلم بتاع 13 Hours بيحكى عن مدى تقصير الإدارة الأمريكية فى حق الجنود والبعثة اللى كانت فى ليبيا بالرغم من إستنجادهم بيهم من أول الأحداث إلا إن محدش إهتم
 
بالتالى الأفلام مبتتعملش عشان تنجم القيادات الحكيمة إنما بتتعمل عشان تزود إنتماء المواطنين لبلدهم وحبهم لجيشهم وتعرف الناس ببطولات مكانش حد هيعرفها غير بالطريقة دى
– – – – – – – – – – – – – –
خلى وقت شغلك أون لاين مفيد ليك وللناس بشكل عام ، إسأل وأقرأ فى مجالك وخد خبرات أكثر على Quora.com شارك أفكار وأسئلة وإتعرف على ناس على الـ Forums اللى ليها علاقة بمجالك ، إتفرج وشير فيديوهات مفيدة من YouTube ، إدخل على تويتر وإعمل Follow للأكونتات المؤثرة فى مجالك وإبتدى شارك عالـ Hashtags اللى الناس بتتابعها بشكل يومى كمان شوف دائماً الـ Trends فى مجالك من على BuzzSumo إلخ … يعنى لو قدرت تحول الموضوع ده لروتين يومى لساعة واحدة او اتنين ، هتلاحظ تغيير كبير أوى فى تفكيرك وفى أسلوب شغلك وفى نتائجك كمان .
– – – – – – – – – – – – – –
شجرة عمرها 7 ألاف سنة محطوطة فى أوسخ تربة فى العالم
مفيش حد بيرويها عايشة على مياه الأمطار وحتى دى بقت نادرة
الشجرة مبقتش تطلع حاجة وبتصنف حالياً كأسوء شجرة فى العالم
 
الناس عمالين يقولوا هى الشجرة دى مش ناوية تنضف بقى
مش ناوية تغير من نفسها التغيير بيبدأ من تحت التغيير بيبدأ من التربة!
 
فى حين إن اللى معاه المياه عمال يروى فى شجر بالم هيلز ولافيدا
ولما حد يقوله عالشجرة دى يقولهم ميصحش كدة عيب كدة أنا مش فاضى لكدة …
 
التغيير حضرتك بيبدأ من تحت فى حالة إن المياه كثير وملهاش صاحب
لكن لما تبقى الحنفية فى إيد اللى فوق يبقى متلومش اللى تحت .
– – – – – – – – – – – – – –
لو بتفكر تعمل بزنس أو Startup حاول إنه يكون إمتداد لحياتك الطبيعية بمعنى إنك وإنت شغال فيه هتبقى بتعمل اللى كنت بتعمله قبل كده بس بطريقة منظمة أكثر وبإلتزام أكبر وبإخلاص أكبر لأن عادة الأفكار بتفشل مع أول إختبار صعب لو مكانتش جزء منك ومن تفكيرك ، أعتقد إن أصعب حاجة فى أى ستارت إب هى الفكرة لأن الفكرة بيتوقف عليها نجاح المشروع كله من عدمه ، لو فكرتك بتتمحور حوالين ” الفلوس فين ” فـ إنت غالباً مش هتكمل أكثر من 6 شهور وعادة أقل من كده ، فحاول تشوف الحاجة اللى إنت نفسك هتبقى أول زبون ليها لو إتعملت بشكل كويس وهتبقى هى دى الفكرة فعلاً اللى تستحق تتعب عشانها .
– – – – – – – – – – – – – – – – – – – – – – – – – – – –
 
أحمد عزت
 
هل ساعدك هذا المقال ؟

مقالات ذات صلة

اترك تعليقك !