نصائح للنجاح في الحياة




كل ما الضغط هيزيد عليك كل ما هيتفتحلك أبواب متعرفش عنها حاجة وعلى قد ما هتستحمل على قد ما هتتفاجئ من النفحات الربانية اللى بتقويك وتخليك تكمل لحد ما تعدى اختبارك على خير وتدوق حلاوة نجاحك اللى تستحقه فعلاً وعالجانب الأخر كل ما هتشتكى من الإختبار اللى انت فيه وتحاول تعظمه وتكسب بيه تعاطف الناس كل ما هتفضل مضغوط وتعبان ومش قادر تعمل أى حاجة تخرجك من الضغط ده عشان ربنا قال أما بنعمة ربك فحدث مش أما بإبتلاء ربك فحدث خلى إختبارك وإبتلائك لنفسك وحاول تستفيد منهم دنيا وأخرة ولما ربنا يخرجك منه على خير إبقى إتكلم عنه براحتك ساعتها هيبقى للتحفيذ مش لجذب التعاطف وتبرير الفشل .
– – – – – – – – – – – – –
واحد جرب 10 أفكار فشلوا ولسه مكمل بيتقال عليه غبى ومتسرع وواحد جرب فكرة واحدة نجحت بيتقال عليه ذكي وشاطر بينما صاحب الفكرة الناجحة واقف فى مكانه وخايف يكبر ليخسر ومع الوقت الزمن بيتخطاه وبيكتشف إنه فاته كثير أما اللى فشل لسه عمال بيجرب وعنده يقين إنه هينجح ولما يحصل ده هينجح نجاح كبير لأنه إتعلم حاجة من كل تجربة فاشلة مر بيها وعمل حاجة أهم الحقيقة أنا بسميها ” السعى وراء الخبرة “
 
أصل عادة اللى بيحاول مرة وإتنين وعشرة بيشوف حاجات الناجح بالصدفة مبيشوفهاش ودى اللى بتنورله طريقه بعد كده وبيعرف إزاى يختار صح ويعمل لنفسه الـ Blueprint اللى يمشى عليه فى أى فكرة تانية من الأخر سهل تنجح فكرة ” واحدة ” لو تعبت شوية والتوفيق كان معاك الصعب إنك تنجح فى أى حاجة تدخلها لأنك فعلاً كفئ وعندك ما يكفى من خبرات للحفاظ عالنجاح ده ويمكن ده واقع معظم الـ Gurus اللى إنت تعرفهم أى كانوا مين .
 
دائماً هتلاقى بدايتهم كان فيها فشل ووقعات كثيرة لحد ما عرفوا يوصلوا للوصفة بتاعة النجاح اللى مبتتشرحش ولا بتتقال فى كتب لأنها مختلفة من شخص لشخص عشان كده دايماً النفس الطويل مهم والإصرار على النجاح أهم من النجاح نفسه اللى عنده إصرار ينجح هيحقق ده فى يوم من الأيام وكل الأمثلة اللى فى حياتك هتلاقيها بتأكد ده أما اللى بيريح وبيقرر يسيب الدنيا تسوقه ويقعد مستنى الفكرة اللى هتغير حياته ولا المشروع اللى هيخليه مليونير وهو نايم عالكنبة بيوصل لحد هنا ويعمل scroll down لأنه عارف إن الكلام ده مش ليه .
– – – – – – – – – – – – –
قدّر اللى بيشتغل معاك بالشكل اللى يحسسه إنه شريك فى الهدف مش مجرد أداة لتحقيقه عشان لما اللى شغالين يحسوا إنهم شركاء بالمجهود مش ” موظفين ” هيبقوا عايزين ييجوا الشغل كل يوم ويطلعوا أفضل ما عندهم عشان يشوفوا مردود ده حاجتين
 
– تقدم ونجاح للمشروع
– تقدير أكبر منك
 
فكرة إنك توفر مناخ Friendly للناس اللى شغالة معاك مش ” عندك ” هيخلى بعضهم يكسل أحياناً بس هو ده المطلوب إنت محتاج تجذب لمشروعك الناس اللى تقدر فكرك وتساعدك على إنجاحه وتفلتر اللى مش قادرين يندمجوا ويقدروا المناخ ده ويكونوا أكثر إنتاجية وحماس للشغل .
 
اى حد بيشتغل فى مكان هو بيتعامل معاه بمنطق من 2 يا خطوة فى حياته توصله لمكان أفضل أو حلمه اللى عايز يحققه وبإيدك تخليهم يحسوا أى إحساس من الـ 2 دول .
 
متعاملش حد شغال معاك بـ دونية عشان بياخد مرتبه منك إنت لا أول ولا أخر واحد عنده شغل وبيدى مرتب وبمنطق ان السواق بيسوق 100 عربية وصاحب العربية مبيسوقش غير عربية واحدة الناس اللى شغالة معاك تقدر تسيبك وتروح مكان تانى لكن إنت هتفضل مكانك بعقليتك بتحاول تفرض مناخ عقيم على اللى هيشتغل معاك .
 
وعلى فكرة اللى هيكمل معاك وهو راضى بأسلوب التعامل الروتينى المُحبط ده عمره ما هيكون سبب فى إن مشروعك يكبر بالشكل اللى بتحلم بيه هيبقى مجرد إستنذاف لموارد المشروع وتضييع للوقت وهما دول اللى بيفضلوا فى مكانهم طول عمرهم يلعنوا الشغل واللى شغالين فيه بس لا قادرين يسيبوه ولا قادرين يحبوه .



 
حاجة أخيرة الناس اللى شغالة معاك مش موظفينك مش اللى شغالين عندك مش اللى تحت ايدك مصطلحات العبودية دى من وجهة نظرى لازم تنتهى لو عايز تبنى مشروع كبير تفخر بيه وكل اللى شغالين فيه يبقوا أول ناس تدافع عنه لما تيجى سيرته مش يبقوا هما اللى بيجيبوا فى سيرته أول ما يروحوا …
– – – – – – – – – – – – –
عادة أى حد بيحقق نجاح فى بزنس أون لاين بيكون قضى وقت كثير فى تجارب فاشلة والتجارب دى مش بس بتضيع وقت ومجهود لا فلوس كمان ، بس الشئ الثابت فى معظم التجارب الفاشلة اللى الواحد مر بيها انه الإستمرارية شرط أساسى فى نجاح أى فكرة خصوصاً لو بتبدأ بإمكانيات محدودة وفى سوق منافسته صعبة .
 
ودائماً بحب أضرب مثل بواحد قرر ينزل سوق مليان بياعين وبدأ بمكان صغير جداً مش متشاف اللى هو موقعك أو خدمتك اللى بتقدمها ونزل السوق ده يوم ، أتنين ، تلاتة ، شهر ، إتنين ولما ملاقاش حد بيشترى منه او بيجيله راح لامم حاجته ومروح بيته وفاضضها سيرة وراح يدور على سوق تانى معتقد ان العيب فى السوق اللى اختاره .
 
بس الحقيقة انك لو بتنزل السوق ده كل يوم هتبتدى تعرف البياعين اللى فيه ” منافسينك ” هتبتدى تفهم دماغ الزبون وايه اللى بيشده عند غيرك ، وهتبتدى تعرف ازاى تكبر واحدة واحدة وتاخد وضعك وتظهر للناس وتجيبهم لحد عندك .
 
النجاح أون لاين مش بس محتوى وكام باك لينك ، الموضوع تراكمى بشكل كبير كل يوم بيعدى هو اضافة لمشروعك ، بس كل يوم بيعدى وانت شغال عليه وبتتعلم من اللى حواليك وزى ما قلت فى الأول الأهم هو المواظبة يوم ورا التانى مش كل أسبوعين يوم وعادة لو اديت أى مشروع جديد من 60 لـ 90 يوم شغل بشكل يومى هتلاقى أكثر من اللى انت متوقعه .
– – – – – – – – – – – – – – – – – – – – – – – – – –
 
أحمد عزت
 
هل ساعدك هذا المقال ؟



تصنيفات : خواطر بالعاميه المصريه,معلومات عامة مفيدة

كلمات دلائلية : ,,,,

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..