نصائح وحكم وامثال

تعرف قيمة اللي قدامك من حلمه .
– – – – – – – –
خليك إنت الـ 1% مش 1 من 100 …
– – – – – – – –
إتعب بمزاجك النهاردة بدل ما تتعب غصب عنك بكرة
– – – – – – – –
إتعب لحد ما تتعب
مش لحد ما تزهق
– – – – – – – –
خليك أول واحد يسمع وأخر واحد يتكلم …
– – – – – – – –
الثبات على الهدف أصعب من تحقيقه .
– – – – – – – –
متستعجلش أى خطوة ربك مأذنش بيها لسه عشان متتعبش
– – – – – – – –
90% من النجاح بيحصل فى عقلك قبل ما يحصل على أرض الواقع .
– – – – – – – –
هتستريح لما تتعب . وهتتعب لما تريح …
– – – – – – – –
فى ناس لو شلت الغباء من عقولهم والحقد من قلوبهم مش هيتبقلهم حاجة يعيشوا بيها …
– – – – – – – –
البداية بتبقى صعبة بس بعد كده الموضوع بيبقى أصعب متقلقش !
– – – – – – – –
كثير مننا بيبقى عنده هدف عايز يحققه ويبدأ بحماس كبير جداً أول كام يوم وواحدة واحدة يبدأ يكسل ويريح وينساه من وجهة نظرى المرحلة دى طبيعية ولازم نمر بيها اللى بيفرق فى الأخر الإستمرارية ، فكرة إنك تكسل وتتعب فى النص بتبقى محبطة لما تقرر تبدأ من جديد ، بس طول ما أنت مقتنع إن اللى بتعمله ده هيوصلك لهدفك أى كان إمتى هترجع وتكمل تانى وتالت لحد ما تحققه ، الإستمرارية هى الأهم وهى اللى بتفرق فى الأخر ما بين اللى حقق هدفه واللى بيبدأ اكثر ما بيكمل .
– – – – – – – –
عادة لو بتبدأ حاجة لأول مرة هتغلط كثير وهتحبط أكثر
ده طبيعى لأنك مش هتعملها كويس أوى غير لما تعك فى الأول
 
ومهما سمعت من تجارب ناس وحاولت تتعلم منها بردوا هتغلط
وهتلاقى ناس بتقولك اللى بتعمله ده ملوش لازمة وأى كلام
 
ساعتها لازم تكمل خصوصاً لو حابب اللى بتعمله
لأن كل اللى بيكلمك على إنك غلط أو بيحاول يحبطك
مش عارف يعمل اللى انت بتغلط فيه ده …
 
بالتالى بيصبر نفسه بإنه يحاول يحبطك ويقنعك بفشلك
بس الحقيقة انك بتاخد خبرة كبيرة ونتايجها هتبان عليك
أسرع مما تتخيل وساعتها اللى كانوا بيحبطوك
يا هيختفوا ومش هتشوفهم وده الإحتمال الأكبر
 
يا هيبتدوا ينافقوك ويقولولك الله عليك
إحكيلنا بقى عملتها ازاى …
– – – – – – – –
فكرة الحدود والجنسية دى فكرة غير منطقية من وجهة نظرى كونك إتولدت بدون إرادتك فى مكان ما على كوكب الأرض ميجبركش تعيش بقيت عمرك بتعانى بسبب إختيار أهلك للمكان
 
وبالتالى مفهوم الوطنية ده مش منطقى خصوصاً لو كان حظك السئ خلاك تتولد فى دولة من دول العالم التالت المتخلفة اللى نظامها بيحكم على شعبه بالتخلف والمرض والرجعية بس لأنهم اتولدوا فى المكان اللى هو بيحكمه .
 
إذا كان الناس بتغير دينها بناء على قناعتها وعلى اللى بتعرفه عن الأديان التانية يبقى ليه الواحد يجبر على إعتناق جنسية دولة معينة وكمان يدين ليها بالولاء والإنتماء ويعرضلها فى كل المناسبات ويحارب اللى ييجى عليها
 
لو هو بالفعل قدامه فرصة يختار جنسية تانية ويروح مكان يقدر يعيش فيه بالشكل اللى هو عايزة اللى يلاقى فيه نظام بيديله حقوقه ويحترم إنسانيته ويساوى بينه وبين أى حد تانى حامل لنفس الجنسية .
 
كونى إتولدت فى مصر ده مش معناه إنى مصرى
ده معناه إنى مقيم فى البلد دى لحين إشعار أخر نقطة .
– – – – – – – –
بمناسبة الثانوية العامة عمرك شوفت حد عنده ٢٥ سنة كده قاعد بيقول ياريتني كنت جبت مجموع في الثانوية العامة عشان ابقي دكتور ولا مهندس ؟ اكيد لا لكن اكيد شوفت وقابلت ناس بعد ما نجحت ودخلت كليات كويسة واتخرجت بتقدير بتقولك انها كانت تجربة ملهاش لازمة وان حياتك الحقيقية هتبدأ بعد انتهاء الدراسة مش خلالها . مش معني كده انك متذاكرش ومتتعبش لو انت حابب توصل لحاجة معينة في التعليم بس متخليش نتيجة امتحان فيزياء ولا فلسفة تحدد مستقبلك
– – – – – – – –
طبيعي جدا اول ٥/٦ سنين في العشرينات يبقي عودك طري أي شوية ريح يودوك يمين وشمال وهنا بتكلم علي الأفكار اللي بتيجي في دماغك وبتلاقي نفسك مشتت وعايز تعمل ١٠٠ حاجة في نفس الوقت ، كل ده طبيعي عشان الخمس سنين اللي هتتسحل فيهم دول هما اللي هيتبني عليهم ٨٠٪ من مستقبلك عشان كده طبيعي تبقي مشتت اسعي وجرب كل حاجة تيجي في طريقك واتعلم منهم كلهم ومتستعجلش الاستقرار والركون لشئ واحد لان ده هيحصل لوحده في وقته …
– – – – – – – –
ربك خلقنا عشان نسعى من غير ما يطلب منا نتيجة محددة وده عشان تعقلها وتتوكل من غير ما تقعد نص عمرك تستبشر المستقبل وتتوقع النتائج وإنت قاعد عالكنبة .
– – – – – – – –
الغيرة بوصلة تحدد بيها هدفك عشان لو بتحب حاجة معينة مش هتحب تشوف حد بيعملها أحسن منك وأنا بتكلم عن الغيرة الإيجابية اللى بتديك حافز تشتغل وتتعب لحد ما توصل مش الحسد والحقد اللى يخليك تكسر فى اللى قدامك عشان تاخد مكانه فـ لو بتغير من حد اعرف ان هو ده هدفك اللى انت بتدور عليه انك تثبت انك مش أقل من حد انك تقدر تكون فى نفس المكانة وأفضل بمجهودك وشغلك وأفكارك أهم حاجة متقلدش ومتشيلش جواك حقد تجاه اى حد لأن اى حد بينجح حتى لو من وجهة نظرك إنه فاشل هو نجح لأسباب لا يعلمها إلا الله
 
يمكن أحياناً فى ناس بتنجح وهى متستحقش
عشان تستفذ ناس تانية تستحق تنجح .
– – – – – – – –
معظم الخطوات المهمة فى حياتك حصلت من غير ترتيب وتحضير ومناقشات وجدل ويمكن ده سبب حدوثها فى الأصل انها خلت من عامل اللت والعجن اللى مشهورين بيه فى مجتمعنا القى نظرة سريعة على الحاجات اللى عملتها ونجحت هتلاقى ان 90% منها كان من غير كلام كثير او استشارة اهل الخبرة اللى معظمهم هيحبطك من قبل ما تبدأ عشان يبان فاهم فقط لا غير
– – – – – – – –
من الذكاء إنك تعرف حجمك ووضعك الحالى ومتبالغش فيه عشان تعرف إيه المطلوب منك ومتحطش على نفسك ضغط عصبى أو نفسى زيادة عن اللى المفروض تتعرضله فى سنك أو فى خبرتك .
 
يعنى إنت لسه بتبدأ فى مجال ما وشايف نفسك متمكن منه أوى متفتحش صدرك وتخبط فى اللى بقالهم سنين فيه عشان تظهر وتفضل تحارب وتعمل حاجات مش بتاعتك عشان تثبت إنك أفضل
 
و تفضل تضغط نفسك أكثر وتدخل تحديات مش قدك لحد ما فى الأخر تكتشف إنك ضيعت شوية حلوين من عمرك بتفشخ نفسك حرفياً عشان تثبت لواحد بس إنك أحسن منه .
 
فى حين إن خلال الوقت اللى ضاع منك ده فى ناس طبيعية وسوية خدت طريقها واحدة واحدة من الأول تتعلم وتشتغل بهدوء لحد ما بقت أحسن منكوا إنتوا الإثنين .
– – – – – – – –
أحياناً الواحد بيبقى محتاج يخرج بره الإلتزامات والمسؤوليات اللى هو فيها ويقيمها كلها يعرف إيه اللى يستحق يكمل وإيه اللى لازم يخلص مهما كانت أهميته ، الدوامة اللى بندخلها برجلينا فاكرين إننا هنقدر نخرج منها وقت ما نستكفى ، بتتحول لروتين ثم أسلوب حياة صعب تغييره ، وبمجرد ما تبتدى تحن لأيام ما قبل الدوامة بيكون فات من عمرك كثير ، مسؤولياتك وإلتزاماتك هتستمر بس لو فضلت تصحى كل يوم الصبح تعمل نفس الحاجة اللى مبتحبهاش هيجيلك يوم وهتكره نفسك حرفياً لو روتين حياتك صعب إفتكر إنك إنت اللى حطيت نفسك فيه وقادر تغيره بشوية تعب فى الحاجة اللى تستاهل ، ولو مكانش اللى بتعمله بيغير حياتك وحياة اللى حواليك للأفضل يبقى مفهوم الأمان حالياً نسبى ولو إرتكنت عليه قريب جداً هيتحول لمفهوم تانى خالص إسمه عيشنى النهاردة وموتنى بكرة …
– – – – – – – –
مفيش صح وغلط مطلق غير فى الدين
 
لو إنت شايف وجهة نظرك غلط دلوقتى ممكن بعد كام سنة تلاقي نفسك شايفها صح وخلينى أضربلك مثال يعني لو فى بزنس ناجح النهاردة مش لازم تقلده عشان تنجح زيه لأن ببساطة اللى هو عمله ده لو صح النهاردة ممكن بكره يوصله لنتيجة غلط تؤدى لفشله ساعتها اللى كان صح فى عينك وبتحاول تقلده هيبقى غلط وهتبعد عنه .
 
بالتالى مفيش إختيار أو رأى ثابت إنه صح أو غلط
وقيس علي كده كل حاجة فى الدنيا ليه بقى بقول الكلام ده
 
عشان لو بتبدأ مشروع ، بتفكر تسافر ، تتجوز ، تغير كاريرك تعمل أى حاجة فى حد تانى بيقولك رأيه فيها خليك متأكد إن مفيش رأى بعينه صح حتى لو أثبت إنه صح قبل كده لأن ببساطة الصح النهاردة غلط بكرة والعكس صحيح وعشان كده ينصح دائماً إنك متبقاش over thinker بتفكر أكثر ما بتنفذ أى فكرة تجيلك أو قرار عايز تاخده نفذ من غير ما تدى ودنك للناس وبالتجربة هتصنع الصح بتاعك إنت .
– – – – – – – – – – – – – – – – – – – – – – – –
 
أحمد عزت
 
هل ساعدك هذا المقال ؟

تصنيفات : خواطر بالعاميه المصريه,معلومات عامة مفيدة

كلمات دلائلية : ,,,,

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..