اختبار الحب الحقيقي – علامات الحب الحقيقي

نكمل في الحب الحقيقي .. 🙂
 
الحب الحقيقي الروحي حب غير مشروط وليه بنسميه روحي عشان زي ماقولنا في الأساس والأصل اساسه الروح من روحك وزوج نفسك ونصك التاني الحقيقي اللي مخلوقين من نفس بعض ولبعض 🙂 ، عشان كده ده هو الحقيقي فعلا والمختلف عن اي حد في الدنيا وعشان كده التوافق الروحي هو اللي في المستوى الأول والأساس في المقومات الـ 3 للحب الحقيقي والزواج التام فالأصل في ده الحب إنك حبيته لأنه هو زي ماهو ، واللي هي ذاته دي لنفسه الجوهرية لروحه ولقيت معاه نفسك وروحك اللي بتكملك وزوجك اللي مخلوقين من نفس بعض ولبعض .
 
وعشان تتأكدوا أكتر ان حبكم حقيقي وغير مشروط بالنسبة للمحتارين من الطرفين وعايز يتأكد انه حبه الحقيقي الروحي فعلا ولذاته لأنه هو بدون اي شروط حبيته في الأساس وبتحبه لأنه هو لنفسه الجوى لروحه مش لشروط او اي حاجة تانية وصفات خارجية ومعايير مكتسبة وممكن تتواجد عند تانيين كتير او لمقاييس بشرية فقط دنيوية مش اساس النفس والروح والذات دي وان هي دي فعلا النفس والروح اللي كنت بتدور عليها وتتمناها وبتحلم بيها ولقيتها وحبك الحقيقي واللي عايز تكمل معاه العمر كله مهما حصل ومهما كان وتكونوا مع بعض للأبد في العالمين 🙂 ، وحبك مش مشروط لأي اسباب خارجية تانية فهتعملوا تمرين:
 
– جردوه من أي صفات وشروط خارجية وهنخلي بس صفاته الروحية والجوهرية اللي منها الأخلاق والدين والوعي والطباع والمبادئ واي صفات في النفس وبصمته الروحية الفريدة اللي هي دي هو وذاته بعيد اي معايير خارجية، فجردوا الطرف التاني والإنسان ده اللي تعرفوه من اي ماديات وشهادات او منصب او نسب او مال وحتى الجنسية وبقي هو بنفسه فقط زي ماهو من غير ده كله هتحبه ؟ ومشاعرك واحاسيسك وحبك هيكون زي ماهو ناحيته برضو ؟
 
وكمان اتخيلوا مثلا لو لاسمح الله الشخص ده اتحرق حروقات غيرت وشها او وشه او مرض مرض اثر على شكله الخارجي او شكل جسمه برضو وحتى اوعمل حادثة وفقد نظره اواتشوه برضو او بقى مشلول او فقد اطرافه فهل هتفضل تحبه زي ما هو بجد نفس الحب ونفس مشاعرك واحاسيسك ونظرتك من جواك كأنه محصلش اي حاجة وفخور بيه برضو وبتحبه وعايز تكمل العمر كله معاه بسعادة وهناء 🙂 ، وجاوبوه مع انفسكم بصدق بالأخص البنوتات ومش بإجبار للنفس ماشي 🙂
 
— وهأتكلم النهاردة في نقطة المواصفات، لأن اللي لاحظته منكم اغلب صديقاتي البنات لما بتسألوني ومحتارين سواء في اللي عايزة تعرف مواصفاته اواللي عايزة تتأكد من انه حبها الحقيقي ولما بسأل انا عن اذا فيه المواصفات اللي بتتمناها فتكون الإجابة بمواصفات عامة ممكن تتواجد كتير في اي حد او حتى بمقاييس بشرية او اجتماعية عامة من منظورالبنات التانية والمجتمع مش منظورها الخاص هي وتقول اي بنت تتمناه.
 
فجوابي ليهم كان واعيده لكم جميعا انه كل وحدة تقعد مع نفسها وتغوص في اعماق نفسها وتكتب بالتفصيل كل المواصفات اللي تتمناها في شريك حياتها من زمان الشكلية والجوهرية الروحية والعقلية والطباع وكل حاجة بالتفاصيل تغوص في روحها هي مش بمقاييس الناس ولا البنات حتى لو عكس كل الناس لأن بصمته هتكون جواك في نفسك انت متسجلة وروحك بتعرفها لأنكم من نفس بعض وبتعرفوا بعض من قبل ماتيجوا هنا 🙂
 
انا مثلا بمقاييس كتيير من البنات والمجتمع المواصفات اللي بحبها عكسهم سواء في الشكلية او الروحية الجوهرية اللي هي بصمة الروح الفريدة دي وفيها تفاصيل دقيقة كده مميزة مش في أي انسان ، مثلا في الشكل اغلب البنات بتتجنن على مهند التركي وتشوفه وسيم وفائق الجمال، اما أنا بالنسبالي في نظري العكس تماما مش بشوفه جميل ابدا ولا بيجذبني ولا بنجذب للي شبهه من انا صغيرة .
 
فماتقوليش كل البنات تتمناه المهم انتي من جواكي بجد يكون اللي بتتمنيه ، بالنسبة لأنه متدين فالتدين والإيمان الحقيقي هو المعرفي وليس السلوكي اللي في الروح والقلب، مش اي حد ظاهريا او بالعبادات السلوكية يبقى ايمانه في قلبه وروحه حقيقي وروحانيته عالية مش مقياس خالص فماتحكميش من خلالها انه خلاص اخلاقه هتكون تمام بس من كده او انه كويس فعلا من جواه، التدين القلبي المعرفي لابد يؤدي للسلوكي لكن السلوكي وحده مش دليل القلبي ياما ناس بتصلي وبتصوم وهي مجرمة واخلاقها وحشة وعندها ايجو عالي ، وافتكري الدين المعاملة، بالنسبة للشهادات من الطرفين مش دليل العلم الحقيقي ولا الثقافة والثقافة برضو مش دليل الوعي ولا العلم .
 
الوعي يكون من الروح وفي الروح والعلم الحقيقي ربنا اوجده جوانا في ارواحنا (وعلم آدم الأسماء كلها) قيمة الإنسان كل ماكان متصالح مع نفسه وكل ماوصل للفطرة السليمة وطهر روحه هيلاقي انها جواه مش بشهادات وضعها البشر ومش هتعنيله اي قيمة حقيقي ولا حتى النجاح محتاج للشهادات .
 
– هأتكلم عن نقاط بتستخدم في مفهوم الكتير على انها مقياس من ضمن المواصفات والمعايير على ان الشخص كويس ولا لأ وأصحح المفهوم فيها .. النقطة الأولى بلاقيها احيانا عند البنات تقول عايزاه يكون ابن ناس كويسين وعيلة محترمة او عيلة متدينة وممكن عند الشاب برضو بنت ناس وعيلة محترمة
 
اولا ده مش مقياس ولا شرط ابدا ما هو ممكن يكون ابن ناس كويسين فعلا بس هو انسان مش كويس أو نفسه خبيثة او أخلاقه منحرفة مش بيحصل ده ؟ ونفس الحكاية ممكن جدا البنت بنت ناس وعيلة محترمة بس برضو نفسها خبيثة او أخلاقها مش كويسة ومنحرفة ، وممكن جدا العكس هو الوحيد في عيلته اللي كويس وغير عنهم وهي برضو نفس الحكاية ويبقى ايه ذنبه او ايه ذنبها باختيارات وقرارات عيلته ( ولاتزر وازرة وزر أخرى)
 
النبي موسى اتربى في بيت فرعون أكبر طاغية وطلع نبي ، وابن النبي نوح اتربى في بيت نبي وطلع كافر كل انسان ومسؤول لوحده عن نفسه وتزكيتها وعن اختياراته وقراراته وحياته اومال ليه هنتحاسب فرد فرد كل واحد لوحده يوم القيامة ومش العيلة كاملة؟ احنا في عيلة كاملة وكل واحد فينا بيكون شخصية مختلفة تماما عن الباقيين صوابع الإيد نفسها مش زي بعض لكن زوج كل صباع من الإيد اللي مقابلاه هو اللي بيشبهه .
 
انا مثلا الوحيدة في اخواتي المختلفة تماما عنهم كده وحتى لو في أصغر واحد من اخواتي مقارب ليا روحيا لكن برضو شخصية مختلفة .
 
* * الشخص الوحيد في الدنيا اللي بيكون أكتر حد بيشبهك روحيا وداخليا هو نصك التاني زوجك اللي من نفسك لأنكم مخلوقين من نفس بعض ، وده اللي كنتوا معاه بالأرواح هناك قبل مانيجي للعالم ده وده هو المهم في الموضوع ده اللي هتتجوزيه انتي ودي اللي هتتجوزها وده اللي هتعيشوا معاه وتكملوا معاه العمر كله وفي الدارين هتكونوا مع بعض مش هتتجوزوا عوائل بعض ولا اخوات بعض ، فمنحكمش عالشخص من خلال العيلة المهم الشخص نفسه
 
– نكمل في النقاط اللي بيستخدمها البعض كمقياس على ان الإنسان كويس ولا لأ وهي مش شرط ولامقياس منها: ان أي حد زي مابيقولوا يجي من الباب على طول ويتقدم يبقى أكيد كويس او اول ما شافك من اول مرة وجا على بيتك على طول او اتقدم يبقى دليل انه بيقدرك ، ده مش شرط ولامقياس خالص اولا مش أي حد يجي من الباب على طول او يتقدم يبقى خلاص دليل انه كويس مكنش ربنا نزل الطلاق، كان اي حد اتقدم انه كويس مكناش نسمع ونشوف بلاوي كتير في حالات الجواز وقضايا في المحاكم اومال الحرامية والمجرمين وبتوع المخدرات والعصابات بيتجوزوا ازاي 🙂 ؟
 
فمش بس عشان كده وده لوحده يبقى سبب كفاية ودليل على انه انسان كويس ومحترم وطيب وهيعاملها كويس ودليل انه مقدرك ببساطة ممكن يكون دليل حب تملك بس، شاف حاجة عجبته وعاوز انها تكون ملكه هو ويتملكها بضاعة يشتريها للأسف ويعاملها كبضاعة وممتلك بعدين ويبهدلها ويرميها، وعادي ده بيحصل، والعكس صحيح مش اي حد عشان متقدمش ليكي على طول يبقى مش بيقدرك ، نصحح المفاهيم المغلوطة القديمة دي، وتانيا: موضوع السؤال ، برضو مش مقياس ودليل على ان ده كويس ولا مش كويس وانها كويسة ولا مش كويسة بناءا على كلام الناس بس، فبشوف الموضوع ده مالوش لازمة تلاقي مجرمين وواثقين من نفسهم ويقولوا اسألوا علينا اسم كذا والناس كلها تعرف مين فلان ، عادي ببساطة ممكن ايجو عالي
 
ممكن صحابهم وناسهم يمدحوهم ويغطوا عليهم، وممكن العكس كمان لو في ناس بيحسدوهم او بيكرهوهم او حاقدين عليهم فيقولوا عليهم كلام وحش بس انتقاما او من وجهة نظرهم وانعكاسهم هم وحكمهم او بناءا على حكم ظاهري وهم مش عارفين الحقايق، او زي ماقولنا يحكموا عالعيلة كاملة او من تصرفات فرد منها او بعض افرادها والشخص ده مختلف عن باقي عيلته، النبي موسى لو كانوا زوجته واهلها سألوا عليه في مدينته في مصر قبل مايجي عندهم او حتى طول فترة جوازهم فكانوا هيقولوهم ده قاتل ومجرم وهارب ومطلوب والناس كلها بتدور عليه ، لكن هم شافوه وعرفوا معدنه وجوهره من موقفه ولما اتعرفوا عليه وحكالهم وسمعوا منه كان كفاية وصدقوه وقاله ابوها (نجوت من القوم الظالمين)
 
فموضوع السؤال ده مش مقياس وبشوف انه مالوش اي لازمة اعرفوا الإنسان نفسه كل واحد هو بنفسه يقدر يعرف وده كفاية والمواقف بتبين أكتر وأكتر، رأي الناس وكلامهم عمره ماكان مقياس 🙂
 
بسمة صفوت
هل ساعدك هذا المقال ؟

تصنيفات : خواطر بالعاميه المصريه

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..