ازاى انسى حب قديم – ازاى انسى حبيبى

ازاى تنسى “قصة حب حزينه” فى ساعتين زمن؟؟
 
(لو انت الطرف اللى كان, “مخلص” “مؤدب” “مهذب” “ابن ناس” “كيوت” “بيضحى” “بيهتم” من الاخر يعنى الـــــ “bla bla bla “Victim” ,الكلام الجاى ده يمشي معاك زبادى).
 
اول نص ساعه
جهز قايمة mp3 فى منتهى “الكأبه” حط كل الاغاني اللى نفسك فيها, نكد نكد يعنى, وادخل اوضتك اقفل على نفسك الباب, حط السماعات فى ودنك, وافتكر كل المواقف اللى هتخليك تعيط!! وانزل عياط وشحتفه, واقعد على الارض, واسند راسك على الحيط, ولا يهمك, عيط جامد بصوت عالى, بصوت واطى, مش مهم, براحتك محدش معاك اساسا!!
 
تاني نص ساعه
بعد ما تكون غسلت وشك وخرجت من “الحمام” ارجع الاوضه تاني, واقفل على نفسك واختار مكان مريح متعود تقعد فيه لما تحب تفكر برواقه, واسأل نفسك: هو انا بعيط عشان كنت كويس؟ ولا عشان هو طلع ندل, وكداب, وبياع, وسابنى!!؟
طب لو انا كويس دى حاجه تستحق العياط؟ ولو هو اللى مش كويس, يبقا انا مخسترتوش؟ انا كسبت نفسي
ده انا اهبل اوى؟ ما انا كويس اهو
 
تالت نص ساعة
خد حمام والبس واتشيك وحط بريفم, وانزل اتمشى فى الشارع وشم هوا ساقع, من غير اى ضغوط ولا منغصات وحط قايمة بكل الكورسات اللى كنت مأجلها, واحسب الوقت اللى كان بيضيع منك فى افكار كتير مكانش ليها لازمه؟ هتلاقى انك كان عندك حاجا كتير كان المفروض تعملها بس انت كنت مطنش
 
رابع نص ساعة
اعمل حسابك انه هيرجع يكلمك فى اى وقت, وهيقولك كل الكلام اللى انت كان نفسك تسمعه, زى انه كان غلطان مش عارف هو قدر يبعد عنك كده ازاى؟, وحياته من غيرك ملهاش لون ولا طعم ولا ريحه, بس طلما انت عارف انه راجع, يبقا اكيد فاهم انه كل كلامه مش حقيقي, ده عشان اللى بيسبك مره اسهل حاجه عنده يكررها كذا مره
 
– شريكة حياتة
.
من فضلك اتأكدى انه فعلا الراجل اللى ينفع انه يكون ابو اولادك, وكمان فكرى كده لما تكوني زعلانه معاه هينفع تسيبي بيتك لانك مش طايقاه مثلا؟ ولا اخلاقه وقت الزعل بتكون فى منتهى النبل؟ وبيعرف يفصل؟
 
تاكدى انه اختارك بكل ما فيكي عيوبك, مميزاتك, وحَبك على كده وراضى بيكي على كده, لانك الوحيدة اللى ماليه عينه
 
وانك الوحيدة اللى معاكي سره, وانك الوحيدة اللى بتعرفى تخليه مبسوط, وانك الوحيدة اللى بتحسي بيه حتى لما بيكون بعيد!! تأكدى انه فعلا يستحق يكون بديل عن بابا عن ماما عن اخواتك؟
وانه “طباعه جميلة جدا” لدرجة انك عايزة الولاد تكون شبه؟
 
تأكدى انك لما هتكوني ماشية جانبه هتكوني كلك فخر وزهو انك بتحبي الرجل ده؟ عشان الراجل ده مبيحبش حد غيرك انتى ولا يتمنى حد غيرك انتى, عشان محدش يملى عينه غيرك “انتى”
 
ده اللى فاهم تفاصيل انفاسك, بيترجم لغة عيونك, بيخانق مع الحزن كل ما يفكر يزورك, عشان طول الوقت نفسه يشوفك فرحانه بتضحكى
 
ملحوظة: كلامه بيترجم لمواقف, تأكد انه هو كما شايفك شريكة حياته, الحب بيبان “صدقه بالجواز”
 
عمر حيدر
.
اقرأ أيضاً: كيف تنهي علاقة حب
هل ساعدك هذا المقال ؟

تصنيفات : خواطر بالعاميه المصريه

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..