اشعار جميلة جدا

– مطلوب حبيب ..
مش شرط يبقى الماضى ايه
انا عايزه حد أسند عليه
ويكون وطن و يكون دفا
و يكون طريق ..
ينفع يكون أقرب صديق
آخر أمل ..
آخر و سيله للحياه من غير وجع
من غير ضياع
من غير دموع وقت الوداع
و يكون كيان
ويكونلى حُضن و بيت و إيد
ينفع يكون إبنى الوحيد
ويكون مكان
دايما بروحه فـ وحدتى
و يكون طَموح ..
انا نص قلب و نص عقل و نص روح
محتاجه حد أكمّله و أكمل معاه ..
محتاجه حد يحلى فـ عنيا الحياه
 
محتاجه حد يكون ” انا ” ..
يقسم معايا الدندنه
يقسم معايا الصبح ..
و النوم و الكسل ..
ميكونش نقطة ضعف
أو سم فـ عسل ..
يشاركنى فـ دموع الفرح ..
ضحك العزا ..
و الصمت و الخوف و البكا
و الإحتياج و النرفزه
محتاجه حد ان سبته انا يقول مش هسيب !
مطلوب حبيب .. ميقومش بس بدور حبيب
– – – – – – – – – – – – – – – – – – – – – – – – –
الى الشخص اللى لسه مجاش ..
حبيبى اللى فـ علم الغيب /
 
شريكى المنتظر إنه ..
يكون وقت الخطر ” أحضان “
شريكى المنتظر منه
يكون وقت المطر مجنون
يغير نظرتى للكون
يأكد كل مفاهيمى عن
الحُب اللى فـ الأفلام
ويفهم انى محتاجه لمعاملة
اب و عقل صديق و قلب حبيب
يكون قسمه و أمل و نصيب
ويبقى أربع حيطان ساندين ..
و أهل و ضهر و حمايه
يكون نص الحياه و الدين
وأصل وصوره و مرايه ..
يغير لكن يكون واثق ..
يخاف لكن يكون سندى
و أبقى أهم شئ عنده
فيبقى أهم شئ عندى
يكون وقت الخناق ليّن
سياسى وهادى و حنين
لا يجرحنى ولا يهينّى
ولا يحسسنى انى ” جماد “
يكون عارف بإن الواحده أحياناً
بتاخد كل حاجه عناد ..
 
فيتحمّلنى لو قصّرت ..
ويمسك إيدى ميسيبهاش
ويعرف انى أحيانا ..
بكون محتاجه أقول حاجه
و مش عارفه فـ مبقولهاش ..
وبرضه ببقى محتاجه
لحضن طويل ..
وكلمة شكر ..
و طيبه و طبطبه و حنان ..
و انى ساعات بكون خايفه
ومحتاجه لدفا و أمان ..
انا طفله .. وهفضل طفله طول عمرى
فمتقللش من قيمتى ..
عشان انا قيمتى من قيمتك ..
وحاول بس تفهمنى ..
و هتحس ان انا فهمتك
 
الى الشخص اللى ممكن أكون
قابلته و لسه مش عارفه
بإنه هيبقى أبو ولادى
وجايز لسه مقابلتوش
وتجمعنا الحياه عادى
محدش عارف الدنيا
هتعمل ايه ..
محدش فينا عارف حتى
فين و إزاى ..
انا واثقه بإنك جاى
ومستنيه مهما تغيب
و عارفه ان اللقا ترتيب
و إن معادنا مترتب
بأمر الله ..
وواثقه فـ ربنا و عارفه
بإنك بكره تبقى ” حياه “
 
انا واثقه بإنك جاى
ومستنيه مهما تغيب
و عارفه ان اللقا ترتيب
و إن معادنا مترتب
بأمر الله ..
وواثقه فـ ربنا و عارفه
بإنك بكره تبقى ” حياه “
– – – – – – – – – – – – – – – – – –
مجرّد صاحبتك جدا وتوأم روح ..
تموت فيها لكن عايش عشان غيرها
عشان موجوده قدامك مبتحسش بتأثريها
محطتهاش فـ خانة ” زوجه ” ولا مره
وطول الوقت كنت شايفها من بره
صحاب جدا ..
صحاب و الله مش أكتر
محبتهاش .. وحبيتها
مخبيتهاش و خبيتها
وغيرت عليها غيرة ” أخ ”
وخوفت عليها خوف ” أنتيم “
و فضلت عايشه علشانك
بدون ولا شكر ولا تكريم
 
ووقت الأزمه كانت هى ” 100 راجل “
ووقت الحزن كانت حُضن بيساعك
وشالت كل اوجاعك ..
وسمعت كل حواديتك
عن البنت اللى حبيتها
وضحكت ضحكه مكسوره
وخبطت قلبها فـ الحيط
كإن عنيها بتقولك
” انا بتمنى أكون هى ”
ياريت تفهم بقى يا عبيط !
 
بحبك عمرى ما هقولها
هقولها ازاى و امتى تحس ؟!
مشاعرى ناحيتك اكبر
من انك تبقى صاحب بس
بخاف انطقها نخسر بعض
واخاف اسكت و اعيش خسرانه نفسى معاك
بقيت مش عايزه غير انى أكون وياك !
وماشيه و عارفه انى طريقنا آخره ” سراب “
وعمرى انا و انت ما هنبقى سوى ” اصحاب “
مشاعرى لا هقدر اكتمها
ولاهقدر اقولهالك
هعيش بين البنين ” صاحبه “
فـ يوم زعلك تقول مالك
وهفضل ساذجه طول عمرى
و مش هقدر على النسيان
فـ جرحك هبقى إيد بتداوى و تطبطب
فـ فرحك هبقى انا مش صاحبة الفستان
وجايز هى ترمى الورد وآخده أنا
وجايز ابقى ذكرى صداقه مش لازماك
 
غبيه و عارفه انى غبيه و انت أغبى ..
عشان ضيعت أكتر واحده بتحبك
عشان ضعيت أكتر واحده كانت فهماك !
– – – – – – – – – – – – – – – – – – – – – – – – – – – – – – – – – – – –
 
الشاعر محمد إبراهيم
 
هل ساعدك هذا المقال ؟

تصنيفات : خواطر بالعاميه المصريه,خواطر جميلة

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..