التربية النفسية للاطفال – الإحتياج إلي المدح

الإحتياج النفسي الرابع للطفل : الإحتياج إلي المدح
 
يعني ببساطة طفلك محتاج يتمدح لأن ده بيشبع تقدير الذات عنده
 
المشكلة الإمهات طول اليوم بتعدد الصفات السلبية اللي في الطفل سواء أمامه أو لأ ، و الطفل عنده إحتياج للمدح فيبدأ يتولد عنده رغبه داخليه إنه يعزز التقدير جواه فممكن التعزيز ده يكون بالإنطواء أو بالعنف
 
يعني لما تقولي لطفلك انا زعلانه منك علشان انت شقي و وحش فيكون رده تكسير و عنف ده رد فعل طبيعي و تنفيس لإحتياجه للتقدير و المدح
 
الطفل ده لما يكبر هيشتري عربيه غاليه يتمنظر بيها علشان يتمدح و يستمد قيمته من العربيه ، البنت دي لما تكبير هتبالغ في الإهتمام بشكلها علشان تسمع كلام جميل من الناس علشان تشبع إحتياجها للمدح
 
– ازاي أشبع إحتياج الطفل للمدح ؟؟
 
1- ركزي علي إنجاز الطفل مش علي ذاته ، امدحي الفعل مهما كان بسيط و ابعدي عن التعميمات اللي الطفل مش بيستفيد منها حاجه زي انت رائع انت هايل
مثلا:
انتي موقعتيش أكل بره الطبق ، كده انتي شاطره برافو عليكي
انت بتقول كلمات جميلة خالص انت كده مؤدب برافو عليك
شكرا علشان انت بتشارك أختك في لعبك ، كده حاجة كويسه جدا برافو عليك
 
2-امدحي المحاولات حتي لو لم تكن ناجحه ( امدحي السعي لا تمدحي النتيجة ) حتي لا يتعلق بالنتيجة
مثلا:
برافو انك بتحاول تلبس نفسك انت مره الجايه اكيد هتعملها صح
شاطر انك بتحاول تربط حذاءك انا هساعدك علشان تتعلمها بسرعه
 
3-امدحي و انتي مقتنعه و صادقة مش بتقولي و انتي بتجاملي علشان قريتي انك تعملي كده و بتعمليه ، الطفل بيحس ، نظرة عينك و نبرة صوتك بتوصل المعني قبل الكلمات فكوني صادقة
 
4- بلاش يكون المدح هدفه تفاخر علي أقاربك أو أصحابك
علشان ابنك ميتعلمش منك و تلاقيه بعد كده بين أصحابه يقول أنا كذا و انت لآه….. لا لالا ‏‎:)
 
5- لما طفلك يجيلك يقولك علي إنجاز له يبقي عايز يسمع كلمه حلوه ، سيبي اللي في ايدك مهما كان و قوليها و مع حضن ، طفلك يستحق لأن أفضل المدح اللي في لحظة الإنجاز مش اللي بعد ما تخلصي اللي وراكي
 
الخلاصه مدح الطفل بيوصله انه محبوب و ده بيشعره بالإطمئنان
اشبعي احتياج طفلك يتربي سوي نفسيا و تتحل كل المشاكل تلقائيا
 
سمعوا أولادكم و كل الناس كلام حلو ، هيجيلكم كلام حلو من أزواجكم
انفقي مدح يجيلك مدح
 
صباحكم كلام حلو 🙂
 
نانسي شبانة
 
هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..