الفرق بين الدين والتدين – التدين الصحيح

معنى التدين
 
كتير بنسمع ناس بيوصفوا واحد بأنه متدين ولما بنشوف إيه الصفات اللي موجودة فيه واللي خلتهم يوصفوه بالتدين فبنلاقي إنها غالبا صفات شكلية .. إما لظهوره بشكل معين مخصوص أو ثياب معينة أو التحدث بطريقة معينة وبكلمات معينة أو بأداء طقوس معينة
 
والمشكلة إن هذا المتدين بيصبح بالنسبة للناس رمز للدين .. فيسألوه في الدين ويقدموه عليهم عند أداء الطقوس وكمان بيعتبروا تصرفاته دليل على الدين فلو أخطأ بيعتبروا خطأه خطأ في الدين نفسه
 
وفي الوقت نفسه مش دايما بيكون اختيار اﻹنسان الموصوف بالتدين للمظاهر الشكلية والطقوسية من أجل الدين ولكن أحيانا بيكون اختياره للمظهر الشكلي بسبب أمور نفسية زي :
– حب الظهور والتميز
– عدم الثقة في النفس والبحث عن أمر يجعله أفضل ممن حوله
– عدم التميز في أي مهارة واللي بيخليه يبحث عن شيء يتميز فيه
– البحث عن اهتمام الناس به وإثارة إعجابهم خصوصا لو هو فاقد اهتمام الناس به
– الخوف الشديد وفقدان اﻷمان
 
وهناك الكثير والكثير من اﻷسباب اﻷخرى اللي ممكن تخلي اﻹنسان يختار التدين مش علشان الدين لكن علشان أمور شخصية أو نفسية
 
الخطأ اﻷكيد هنا إننا خلينا التدين مرتبط بمظاهر وخلينا المظاهر دي سبب في تعاملنا مع الناس دي ومع الدين نفسه بطريقة معينة .. لكن ما هو معنى التدين ؟
 
أظن إن أفضل إجابة موجودة على السؤال ده في سورة الماعون اللي بدأت بسؤال هو :
 
أرأيت الذي يكذب بالدين ؟
وحددت اللي خرج عن الدين بأنه :
 
1- يتعامل مع اليتيم بقسوة واستغلال ( يدع اليتيم )
2- لا يحض على طعام المسكين .. فلا يهتم بالفقراء والمحتاجين والضعفاء
3- وهو اللي بيصلي وبيؤدي الطقوس والمظاهر الشكلية ولكن هذه الطقوس مش بتأثر فيه ولا بتنعكس على أخلاقه وأفعاله وإنما هو متمسك بهذه المظاهر علشان منظره قصاد الناس .. ( فويل للمصلين الذين هم عن صلاتهم ساهون الذين هم يراءون )
4- وهم الذين يمنعون الخير عن الناس ( ويمنعون الماعون )
 
وبالتالي لو دي صفات اللي بيكذب بالدين فإن المتدين هتكون صفاته هي الاهتمام بالناس وخصوصا الضعفاء والفقراء .. وتقديم الحب للآخرين بلا حدود
 
التدين توجه داخلي لا تدل عليه المظاهر والطقوس ولكنه شعور داخلي بالحب المطلق والخير المطلق ينعكس على أفعال اﻹنسان تجاه اﻵخرين
 
التدين شيء غير مرئي ولا توجد علامات عليه ولا يمكن لأحد إنه يحكم على أحد بأنه متدين أو غير متدين مهما كانت أقواله وأفعاله وأشكاله ومظاهره
 
التدين شيء غير متعلق بدين معين فهو متاح لكل إنسان مهما كان دينه ( إن الذين آمنوا والذين هادوا والنصارى والصابئين من آمن منهم بالله واليوم اﻵخر فلا خوف عليهم ولا هم يحزنون )
 
التدين = الحب + الجمال
 
أحمد مجدي
 
 
هل ساعدك هذا المقال ؟

تصنيفات : نحو الصوفية

2s تعليقات

  1. بجد لفتة جميلة
    كنا بنقرأ السورة وفهمينها غلط خالص
    بجد انا امتن ليك كتير ولموقعك الرائع اللى ديما بستنى مقالاته الجديد

    رد

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..