المواطن المصرى – الضغط النفسي اسلوب حياة !

عايز تبقی مصري أصيل ؟ بسيطة ….

ذاكر في دراستك .. عاني شوية .. مش فاهم ؟ وكمان المواد مش بتفيدك في حاجة ! ، مش مهم .. اضغط علي نفسك ودوس عليها .. احفظ .. دخلت كلية مش عجباك او عجباك بس الدراسة زبالة ملهاش دعوة بالواقع الحديث المتغير و مواد وأفكار منتهية الصلاحية .. مش مهم ما المجتمع كله كدا .. عاني في الكلية شوية .. بتدرس بتنجان لا علاقه له بالواقع فى تخصصك + مواد الحشو كتير ؟ …. الضغط زاد عليك … مش مهم .. عاني شوية كمان .. اضغط علي نفسك شوية كمان .. أتخرجت بعد ما ضيعت 4 او 5 او 6 سنين من عمرك علي الهري .. لا أنت استفدت في مجال عملك .. ولا استفدت حتي في الحياة عموماً .. لا تعاملك مع الحياة ولا في العلاقات .. مش مهم ..

ادخل بقا المعركة الأكبر والأسرش التي ستقضي علي ما بقا منك من عقل ومشاعر أو إحاسيس تشعرك بنفسك وبالحياة .. وهذه المعركة هي الجيش والشغل والحياة .. لو دخلت الجيش يتم دخولك بالإجبار .. ثم الشغل في الغالب انت لا تحبه تم فرضه عليك .. ثم الحياة التي لم تعيشها بعد ولا تعي عنها شيء .. ربما تعلم عنها بعض من القشور والأفكار السائدة الفاسدة .

خلصت الجيش مبروك .. دور علي شغل .. لقيت مبروك .. بالواسطة ولا من غير .. مش مهم .. المهم فيه فلوس تمام .. فيه سعادة طب او راحة نفسية ؟ .. مش مهم .. هم بيقولوا أن المهم الفلوس اهم ..

عايز تكون أسرة .. وعايز تعيش مع إنسان تاني .. وأنت لم تستطع أن تعيش سعيد مع نفسك ؟! .. ( ربنا يكون في عون الإنسان التاني والأطفال اللي هتربيهم .. في الغالب انتوا الاتنين كدا .. ربنا يعينكم علي بعض ) .. عايز تتجوز .. عاني شوية .. ضيع أفضل سنين حياتك في مهر وآثاث وشقه والفرح وأكل المعازيم وكلام فارغ لن يفيدك ولن يفيدها في شيء ، سوي انه سيزيد من جرعة الضغط والمعاناة في حياتك .. بتحبك بتحبها .. مش مهم هي جبانة وانت كمان جبان .. مش قدرين تختاروا شكل حياتكم .. عالة علي أنفسكم !

مبروك عليك انت تقوم بإغتصاب روحك بشكل ذاتي ، ومبروك عليكي أنتي تقومين بإغتصاب روحك بشكل ذاتي .. وقلب من تدعي محبته يحدث له عملية تدمير وتحطيم ..

انت مش فارق معاك بلا حب بلا بتاع . المهم اتجوز .. النتيجة واحدة انت ومن يحب .. ( اقتل احلامك ونفسك بلا أحلام بلا بتاع .. ) المهم الفلوس وبسسس .. ما هم بردوا بيقولوا أن الحب = الجنس .. والزواج يعني الجنس .. وانك تجيب كام عيل إنجاز بقا وكدا .. مبروك عليك بقا معاك الفلوس اللي يرضي غرور وحماقات المجتمع الأكثر فقراً في كل شيء معنوي او مادي .. للأسف أنت قمت بتحطيم جزء كبير منك ، وانتي مبروك عليكي القلب المدمر الذي قمتي بالارتباط به .. زواج كما يرضي غرور المجتمع .. ولكن قلب ميت .. ( قلب بلا احلام .. بلا شغف .. قلب ميت )

اتجوزت مبروووك .. فكر بقا هتعيش انت وبيتك منين .. اشتغل شغلانة تاني .. عاني كمان .. مسئولياتك كبرت .. معلشي ما انت اللي بتجري ورا الفلوس وبس .. ابنك وبنت خليهم يمشوا في نفس مشوارك .. ابنك وبنتك كبروا مبروك .. بنتك هتتجوز امتي ؟ .. وابنك هيشتغل امتي ؟ معروفة ( قمية البنت = عريس .. قيمة الولد = فلوس )

المهم البت تتجوز امتي بقا وترتاح منها .. البنت ااتجوزت مبروك .. الولد اتجوزت مبروك .. يارااجل .. بقا عندك حوالي 50 او 60 سنة كدا ؟ .. حسيت انك ضعيت حياتك كلها في التضخيات .. وان حياتك كلها كانت غلط .. حاسس انك حزين !؟ .. انت عملت ايه لنفسك ؟ دائرة من الضغط والمعاناة المستمر في دائرة الموت !!

ابنك وبنت هيخلوا اولادهم يعيشوا نفس حياتهم ويبدأوا المشوار من الأول .. أهلاً بيك كمواطن مصري ! ،،، ( المعاناة والضغظ والإجبار والقهر والكبت اسلوب حياة في مصر )

ايه ابنك وبنت مش بيسألوا عليك ، يدوب بينزلولك الأكل كل فترة وبتحس انك تقيل عليهم لما بتروح لهم البيت !؟؟

طب وأنت زعلان ليه .. ما هم كانوا حمل تقيل علي قلبك بردوا زماان ولا نسيت !! .. أصلك ربيتهم على الضحية والمعاناة مش الحب ، أصلك ربتهم على الفلوس مش الحب ، أصلك ربيتهم على القهر مش الحب ، أصلك ربتهم على المادة البحتة 🙂 … وأنت ضيعت عمرك كله حاسس انهم حمل تقيل عليك “مش هم سعادتك او حته منك او …. ” .. جه دورهم بقا … متزعلشي 🙂

تعالي اقولك كلمة في سرك 🙂 :

الإنسان بيحب ويعشق من يرتاح له من تطمن له روحه ، من يحبه وفي نفس الوقت يعطي له الحرية اللازمة ليكون كيفما يريد .. من يشعر بأنه على طبيعته 100% بدون أى تكلف عندما يجلس معه … من لا يخاف أن يذكر امامه أفكاره وأحلامه ومشاعره وعيوبه ، وعندما يذكر عيوبه يتأكد ان أمامه قلبه سيفهمه وسيحتضنه ، وعندما يخطأ يعلم ان هذا القلب سيلتمس له الأعذار وسيحضنه بقوه …. يُحب من يعطيه حب وحنان وآمان وحرية موش فلوووس ، موش قهر ، موش فرض أفكار ، موش إغتصاب أرواح ، موش إجبار ، …

عندما تعيش حياتك كلها ، وانت تفعل أشياء لا تحبها ..
أشياء مجبر علي فعلها ، أو أشياء تم فرضها عليك بقوة المجتمع
أو أشياء سائدة لم يختارها قلبك ، وربما أشياء تخنقه !

لن تزيدك تلك الأشياء لا علم ، ولا معرفة ، ولا سعادة ، ولا حب !
لن تزيدك إلا ضغط وألم ونكد وهم وغم … ستدمرك أنت وستدمر كل علاقاتك
علاقتك بنفسك ، علاقتك بالله ، علاقتك بشريك حياتك ، علاقتك بالآخرين ، ..

أحذر أن تعيش حياتك كلها وأنت تدمر نفسك تدمير ذاتي !

عبدالرحمن مجدي

اقرأ أيضاً: ما معنى التضحية ؟ – هل هو جيد أم سئ ؟
اقرأ: اسباب تأخر وصعوبة الزواج في مصر – وحلوها الحقيقة والقوية
اقرأ: الدعارة فى مصر – اغتصاب الأرواح والأجساد باسم الله!
اقرأ: الحياة قصيرة جدا – كن سعيدا وأفعل ما تحب

هل ساعدك هذا المقال ؟

تصنيفات : عاهات مجتمع

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..