تعلم الفيزياء من الصفر

ازاي تبدأ مع الفيزيا من الصفر ؟
.
من غير مقدمات كتير خلينا نقول معلومات مختصرة و محددة, موضوعين أساسيين هنتكلم عنهم لانهم الاهم لأي مبتدئ فيزيا : التفاضل و التكامل، الميكانيكا الكلاسيكية
 
– أفضل بداية مع الفيزيا هيا مع الرياضيات الاساسية، و أفضل منهج شفته الحقيقة هوا منهج المرحلة الثانوية، منهج سنة أولى بجانب رياضيات 1 و 2، فيها ميزتين رئيسيتين، انو المنهج ده متاح على النت مكتوبا و مشروحا على يوتيوب في اكتر من مكان و برة النت لأن مدرسينك بتوع الثانوي او طلبة ثانوي اللي تعرفهم ممكن يساعدوك، و كذلك الكتب اللي بتشرحهم متاحة و سهلة، المعاصر مثلا مليان شروحات و حلول و مسائل .. و لامي و المعلم و غيرهم، ده هوا أفضل بداية ممكنة ..
 
من خلال دراسة الكم ده من الرياضيات هتتعلم أساسات التفاضل و التكامل، المتتاليات، اللوغاريتمات، الدوال و انواعها و دراسة سلوكها و معناها ، دراسة المعادلات الخطية، المحددات، مقدمة فظيعة الروعة في الميكانيكا، الهندسة الفراغية،الاعداد المركبة، حساب المثلثات، المتجهات، التباديل و التوافيق و نظرية ذات الحدين ، المحتوى ده كفيل انو يدعمك لخطوة كمان قدام
 
– عم الحج ده – بالعربي – كمان هيساعدك بساطة لدراسة مقدمة في اهم موضوعات الرياضيات : اضغط هنا
 
في شكل محاضرات بسيطة جدا و شاملة بيشرح مقدمات اساسية في التفاضل و التكامل و المتجهات و الاعداد المركبة و موضوعات تانية كتير
 
– بعد ما تتعلم الرياضيات الاساسية ابدأ مع عم الحج ده ، ده راجل بيشرح منهج الفيزيا ببساطة و سلاسة و بيبدأ بأقل قدر ممكن من المعادلات، هتبدأ بال58 فيديو بتوع الـ A level physics ، بعدها هتبص على الفيديوهات الخاصة بالميكانيكا الكلاسيكية من نفس اللستة اللي قدامك : اضغط هنا
 
الميكانيكا الكلاسيكية هيا أساس الفيزيا ، و ضيف ليها الميكانيكا التحليلية اللي بيحط ليها الراجل ده مقدمة كويسة برضك، ممكن من خلال فيديوهاته تتعلم مقدمات كويسة جدا عن الكم،النسبية، الكهربية و المغناطيسية، الكونيات، الديناميكا الحرارية، في مجموعة كورسات صغيرة و مميزة
 
– اضافة ، عم مايكل هنا بيشرح كل الفيزيا بسهولة و بساطة و مع امثلة ، شيء بديع , بشكل أبسط و اقوى من Doc A : اضغط هنا
 
كده خلصنا, انتا كونت فكرة كويسة جدا عن الفيزيا و موضوعاتها و ممكن تتخصص أكتر و تختار اي جزء من الفيزيا و تكمل بشكل اعمق فيه، خلينا بقا نضيف بعض الملاحظات للمستويات الأعلى:
 
– واحد من الموضوعات الهامة علشان تدرس فيزيا هوا الجبر الخطي, لكن ده هتقابله أكتر في مستويات أعلى شوية , عموماً فيه مقدمة جيدة جداً ليه مع خان أكاديمي من هنا: اضغط هنا ،، و بالعربي عم الحج هنا: اضغط هنا
 
– لو ليك مزاج في مستوى أعلى أكتر – جامعي :
1- واحدة من أشهر الكورسات في الفيزيا هيا محاضرات جامعة ييل للبروفيسير شانكار, في شكل كورسين عن أساسيات الفيزياء, في حوالي 50 محاضرة, بيلمو منهج الفيزياء بتاع اول سنتين جامعيتين, أفضل ما يمكن و أشمل ما يمكن في عدد محاضرات اقل، و الكورس الأول منهم مدبلج عربي على يوتيوب للي يحب هيلاقيه بسهولة، كذلك هتلاقي مقدمات كويسة ف النسبية و الكم ف الكورس التاني.
 
الكورس الأول: اضغط هنا
الكورس الثاني: اضغط هنا
 
2- بص على الكورسات التلاته دول من MIT و متترجمين من موقع شمسنا العربية : اضغط هنا 
تفاضل و تكامل بمتغير واحد ، بعدة متغيرات، معادلات تفاضلية .. التلات كورسات دول عصب أساسي في دراسة الفيزيا
 
3- و على شغل ليونارد ساسكيند من هنا : اضغط هنا
 
واحد من افضل الناس اللي بيشرحو موضوعات مهمة بداية من الميكانيكا الكلاسيكية، الكونيات , الكم, النسبية, فيزياء الجزيئات، ميكانيكة احصائية .. بشكل متوسع أكتر, شغل جامعي ، كل كورس بتاع 10 محاضرات الواحدة ساعة ..
 
بجانب المحاضرات فيه كتب مشهورة زي سيرواي و university physics , و كتب شوم خاصة كتاب الميكانيكا الكلاسيكية بتاعهم بعنوان : الميكانيكا العامة و تطبيقاتها.
 
– عموما ركز على التالي :
1- الفيزيا يعني حل مسائل ، مش نوم على جنبك و قراءة كتاب او الفرجة على فيديو
2- محدش بيجري وراك ، فخد وقتك، الهدف هوا التعلم، مش انك تبقا عالم او عارف او مثقف، الكنز في الرحلة للنظرية النسبية ، في فهمها ، في التمتع بفهم التفاضل و التكامل و كأن نور اتفتح في اوضة ضلمة، كأنها قطعة جاتوه جميلة، مفيش أي داعي للاستعجال، استمتع بكل قطمة
3- خصص مهمة واحدة لنفس الوقت , يعني مش تدخل ف كل الكورسات بطريقة أحمد حلمي:”يا ترى انهي واحدة فيهم .. يا رب تطلع كلهم”
.
ملحوظة هامة: دي خبراتي الشخصية، مش بالضرورة تكون الافضل، لكنها اسهل الطرق من وجهة نظري للي عاوزين يبدأو فيزيا، أنا شخصيا اعتمدت على معظمهم و ذاكرتهم بالترتيب لما حبيت أبدأ من الصفر و كانو مفيدين ليا كخط سير جيد و ممهد و مفيهوش تعقيد.
شادي عبدالحافظ
 
هل ساعدك هذا المقال ؟

تصنيفات : مقالات ثقافية متنوعة

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..