حل ازمة الدولار فى مصر

حل أزمة الدولار ببساطة إن يكون عندنا موارد دولارية داخلة من برة لداخل مصر
 
دة ببساطة يحصل لما يجي لك مستثمرين اجانب يستثمروا في مصر او انت تصدر كتير او يجيلك سياح كتير يصرفوا جوة البلد او يكون عندك مصدر قومي ايراداته بتزيد بالدولار زي قناة السويس او بتصدر تكنولوجيا و اختراعات و ابتكارات علمية مش شرط سلع بس او بيجيلك تحولات من المواطنين المغتربين
 
بالعقل كدة و بعدين عن اي انحياز
هل في مستثمر عاقل هيستثمر في بلد كل مواردها تحت سيطرة القوة المسلحة؟ و جيشها بيبيع مكرونة و لحمة و بيض و فراج و زيت و سكر و رز و شغال مقاول و مسيطر على كل طرقها و بيفرم المدنين اللي بينافسوه لان لا بيدفع لا جمارك ولا ضرائب ولا ماية ولا غاز ولا نقل و لا بنزين ولا عمالة؟!! دة يبقة مستثمر اهطل لو فكر يدخل الفخ دة برجله يبقى مجنون لو حط دولار واحد في بلد برلمانها بيطبخ ٥٠ قانون في اليوم بدون مناقشة و بالأمر المباشر من العصابة اللي خاطفة البلد ممكن قانون واحد متفصل لحساب حد من العصابة يخرب بيته و بيت اهله.
 
تاني نقطة الصادرات احنا اكتر صادرتنا حاصلات زراعية و مواد اولية و حاليا المواد الاولية تحت سيطرة الجيش اللي مسيطر على اراضي البلد و الحاصلات الزراعية بتقل نتيجة الشح المائي و تلوث التربة و فدادين بتتبور عشان الماية مش بتوصلها و مفيش دعم للفلاح ولا تشجيع على الاستثمار الزراعي اما الانتاج الصناعي حدث ولا حرج اي منتج مدني له منافس في الجيش بيفرموه فرم عشان الجيش يبيع يبقى بأي منطق هيكون عندك سلعة مدنية تنافس برة لما انت بتقتلها جوة؟!!
 
السياحة منهارة لان مفيش سائح هيدخل بلد السياح بتتخطف فيها و تتعذب لحد لما تموت مفيش سائح هيدخل بلد بيتزرع على طياراتها قنابل مفيش سائح هيدخل بلد لها سنين مش عارفة تسيطر على تمرد ارهابي مسلح في محافظة زي شمال سيناء مفيش سائح هيجي بلد بيطلع فيها طيار اهطل يضرب السياح بالاباتشي مفيش سائح هيجي بلد كل سمعتها الدولية انها دولة بوليسية قمعية مواطنيها بيتخطفوا من بيوتهم و العالم كله يعرف دة الا بهاليل النظام الحاكم في حالة انكار مستمرة
 
قناة السويس اللي اتضحك على الناس بالمليارات اللي هتدخلها بعد الترعة الجديدة اللي اتصرف عليها مليارات و دخلها بيقل مش بيزيد لان العالم بيخلق بدائل اقل تكلفة و بسبب كساد حركة التجارة بين الشرق و الغرب لان اللي عمل الترعة و صرف عليها مليارات الدولارات مكنش يفرق معاه خراب البيوت اللي هيحل علينا بعد الصرف على مشروع فاشل لان كل همه هو كسب اي شرعية مزيفة حتى على هلى حساب دم الناس اللي بتتفرم دلوقتي من الغلاء طالما بيصدقوا اعلام النظام الكداب
 
تصدير التكنولوجيا و العلم نجيبه منين و النظام بيخفض ميزانيته التعليم لانه عايز شعب جاهل يسوقه يصدق العلاج بالكفتة و ترعة الفنكوش و يصدق نحنحة رخيصة في نفس الوقت حملة الماجستير و الدكتوراة بيتقبض عليهم لما بيطالبوا بحقوقهم و يترموا في سجون شوية جهلاء خاطفين البلد بقوة السلاح
 
اخر نقطة تحويلات المصريين المغتربين
اي مصري كان بيتغرب عشان يبعت فلوس يحوشها هنا لانه مشتاق يرجع اما دلوقتي بالكتير بيبيعت لاهله اللي يعيشهم كويس و بيحوش فلوسه برة لانه مستعد يعيش في كينيا او ناميبيا بس ميرجعش هنا تاني و مهما كان مشتاق يرجع هو عنده مليون سبب يخليه يخاف يرجع لو مش خايف على نفسه بيخاف على ولاده اللي هو عارف ان مش هيكون ليهم مستقبل في البلد دي
 
حل ازمة الدولار بسيطة بس النظام ميفرقش معاه يحلها ولا لا طالما هما عايشين في كومباوندات و ثرواتهم برة و مأمنين اسرهم و البزنس بتاعهم شغال و اللي يفتح بقه في سجون جديدة بتتبني او ياخد طلقة بين عنية او يتخطف من بيتهم و ميظهرش تاني و في اعلام رخيص هيلوم الضحية و بهاليل هتصدق ان المجني عليه زيهم هو الجاني.
 
$ ‏الزتونة‬
 
* تعليقات بعض االآخرين علي الموضوع
 
– محمود : دايما بتلخص كل الي ممكن يتقال
هقول حاجة واحدة
في نوفمبر 2014 كنت في منتدى اقتصادي في ألمانيا و كان الضيوف أربعة الي هم مديرين الغرف الألمانية التجارية في مصر و أوكرانيا و روسيا و ميانمار
و فاكر سؤال سأله للضيوف عن مصر تحديدا
و هو ازاي ممكن حد مستثمر يستثمر في دولة منافسه فيها هو الجيش ذات نفسه
مش ممكن انسى السؤال ده
و وضخ السؤال اكتر
و قال ليه استثمر و المنافس بتاعي معندوش كل
over head costs
الي عليا كمستثمر؟؟؟!!!!
 
الكلام ده من نوفمبر 2014
الفكرة ان العالم كله عارف الي بيحصل في مصر زي مانت قلت
مفيش الا بهاليل النظام الي منهم يا عارف الحقيقة و بيكابر يا فعلا اهبل و مش عارفها
 
و زي منت قلت الحل موجود
بس النظام مش مهتم انه يحل
 
– بكر:  ابراهيم عيسى بعد نقاش مع الخبير الإقتصادى هشام توفيق اسهب فيه الراجل بكم الأخطاء و التخبط الحكومى اللى هيودى البلد فى داهيه راح ابراهيم عيسى قاله .
كدا لو رئيس جهاز الأمن القومى أو رئيس المخابرات بيتفرج دلوقت هيقولك انت كده هتولع البلد يا هشام بيه .
رد الراجل بكل أدب و قاله .
البلد كده كده بتولع بالفعل و انا بتكلم عن حقيقة الوضع كون اى حد هيسيب الحقيقه و يمسك فيا انا دى بقى حاجه تانى .
ربنا يسترها يا مينا بجد .
كلنا رايحين فى داهيه بجد .
 
– عماد: يعنى انت جبت ان أصل كل المشاكل هو حكم الجيش .يعنى لو حكمنا بكره واحد مدنى كل المشاكل حتنحل؟؟ لا طبعا . المشكلة ان مصر غير جاذبة للاستثمار و لازم نحل هذه المشكلة فى الأساس بصرف النظر عن كينونة من يقوم بالحل. و ابسط مثال على ذلك الصين. الصين يوجد بها حكم ديكتاتوري و تقدر تقول عسكري لكن يملك أدوات الحلول الحقيقية التى يفتقر لها الحكم الحالى. اخيرا فى اخر الكلام هاجمت رجال الاعمال ساكنى الكومباوندات لكن لازم نعرف ايضا انهم يبحثون عن فرص استثمار حقيقية فى مصر او خارج مصر فهذا حقهم و من مصلحتنا و مصلحتهم ان تكون داخل مصر. حل لولا دى سيلفيا فى البرازيل خير مثال . و اشكرك مينا
 
– يامن شاهين: فيه حوالي 800 الف مصري بيشتغلو اونلاين… مصممين ويب, مطورين ويب, تسويق الخ… دول لو يتوفرلهم الفرصة انهم يفتحو حسابات في البنوك بدون ميطلب منهم مستندات تعجيزية… هيدخلو دولارات كتير… تصور لو كل واحد فيهم بيدخل 100$ شهري… يعني 80 مليون دولار شهري… او حوالي مليار دولار سنوي
 
مينا المنسى أنيس صليب
 
هل ساعدك هذا المقال ؟

تصنيفات : عاهات مجتمع

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..