قواعد القراءة ، مهارة القراءة – تعريف القراءة

القواعد الـ 10 للقراءة
1- القراءة اختيار ، مش نموذج أفلاطوني لحياة جيدة سعيدة مثالية , هي اختيار بعض الناس لا اكثر, و هوا إختيار بتعتبر سعادتك انو أفضل من غيره لا أكثر – برضه. كونك مثقف لا يعطيك السلطة على أي حد, و مش بيلبسك عباية “الصح” , و مش طريقة لكسب الحوارات بطريقة: “أيوة بس جورج لوكاش بيقول ….”
 
2- الدكتورة في قسم الفيزيا في أرقى جامعات العالم متفرقش بأي شكل من الأشكال عن الراقصة على مسرح في فرح شعبي , كلنا بشر و مدى معارفنا لا يشكل حكم نهائي علينا, مفيش حكم نهائي, فلاسفة و علماء و عظماء من المفكرين لعبو لعبة “الحكم النهائي” دي قبل كده .. و موصلوش لحاجه.
 
3- القراءة مبتعملش اورجازم زي اعلانات اكل الشيكولاته الكادبوري و الله, و لا الشيكولاته نفسها الحقيقة, كتب كتير صعبة، و معقدة, مش بتكملها, و ساعات تقعد شهر في صفحة واحدة لحد ما تقرب من أعراض الانهيار العصبي, لكنك بتتحمل الصعوبة دي في سبيل المعرفة, الكتاب مش هدف لذاته, لكن لما يقدمه من معرفه, المعرفة بقا هيا الأورجازم الحقيقي يا حنفي.
 
4- القراءة مش موضة, مش بتنزل مع الجاكت و البطلون و الشال و نوع القهوة, مش درجة من درجات “الأنتكة” بأي حال من الأحوال, مش عارف و الله !
 
5- القراءة مش تعويض عن نواقصك, مش فرصة تتمنظر على الآخرين بمعارفك و مصطلحاتك المعقدة التي تتمظهر فيها دوافع غريزيه نجد جذورها تتغول في – بدرجة ما – فلسفات فريدرش نيتشة و – بالتأكيد – آراء سيجموند فرويد النقدية للحضارة التي تتبدى واضحة في كتابه “قلق في الحضارة” بينما لا حدود في الأفق لحل المشكلة الإجتماعية أو الإتفاق على نظرية إجتماعية موحدة من بارسونز حتى هابرماس .. أيوة منظرة زي الشوية اللي فاتو دول كده
 
6- مش لازم تحفظ كل اللي قرأته ، المهم تفهم هدف الكاتب يقصد ايه , تتشرب ما كتبه , المعلومات هتتركب واحدة بواحدة في دماغك لما تقرأ أكثر من مرة في نفس الموضوع, من الطبيعي انك تنسى اللي قرأته
 
7- الكتاب مش بيبان من عنوانه, بيبان من المؤلف, من الطبيعي اني و أنا بحط عنوان لكتابي أختاره جذاب و حلو علشان يشدك, خاصة بقا لو قررت أحط اسم من نوعية “بيلاسكا, بيدوفيليا, بيداجوجيا, أفلابوبساك” .. السر ف المؤلف, لو متعرفوش بص على الفهرس, و المقدمة, الكتاب اللي معاه مصادر أحسن من اللي ممعهوش, و قائمة الكتب الأكثر مبيعا قد تكون دليل جيد للكتب اللي ممكن متتقراش حالياً, و ربما للأبد.
 
8- الروايات مش كل حاجه, فيه علوم و فلسفات, سير عن عظماء غيرو فكر العالم, إقرأ عن فلسفات شككت البشر في أعتى ثوابتهم, و علوم غيرت وجهة نظرنا لحجات زي “الزمن” , “المكان” , “العدم” , “الفراغ” , “الفرد” , “الذكاء” , “الحياة” .. لازم تجرب تروح هناك !
 
9- اقرأ ورقة، اتنين، تلاته ، فصل ، مش لازم علشان بدأت كتاب تخلصه, اقرأ 5 دقايق، 15، ساعة ، اكتر او اقل ، و قت ما تسمح الفرصة .. اقرأ ف الحمام، ف الباص، عند الدكتور ، و انتا عيان ، و انتا كويس …, شيل معاك كتاب دايما على التاب او الموبايل او في شنطتك
 
10- القراءة مش بتاعت الناس العميقة الغميقة المملة فقط، مفيش ناس اتخلقو بتوع قراءة و ناس اتخلقو بتوع طاولة, القراءة بتاعت الكل, ممكن تبقا بيه و بتقرأ, شاب سيس, سرنجاتي , خمورجي, فيلسوف , رقاصة, دكتور نفسي, ديلر, طالب ف جامعة بقالك 8 سنين بتحاول تعدي من مادة دكتور غبي … و بتقرأ,
 
* القراءة حرية. تنميطها , تحويلها لحمل على الأكتاف, و اختزالها في شخص أو موضوع معين هو كارثة حقيقية
شادي عبدالحافظ
 
هل ساعدك هذا المقال ؟

تصنيفات : خواطر بالعاميه المصريه

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..