الرئيسية » خواطر بالعاميه المصريه » كلام عن الرجولة – مفهوم الرجولة

كلام عن الرجولة – مفهوم الرجولة

بواسطة عبدالرحمن مجدي
1173 المشاهدات
كلام عن الرجولة - مفهوم الرجولة
مفهوم الرجولة ….
.
كان قاعد قلقان وصاحبه بيقوله مالك؟ قاله مفيش, مستني تليفون مهم جدا, بعد شوية تليفونه رن, ابتسم ورد بنبرة كلها”شوق ممزوج بفرحه” وبرغم ان صوته كان يدوب مسموع إلا ان صاحبه كان خد باله ان جملة “حبيبتى” اتكررت كتير اثناء المكالمة ؟
 
بعد ما خلصت المكالمة, صاحبه لاحظ, انه ملامحه كلها اتحولت والقلق راح والتوتر مبقاش له وجود, لدرجة انه قاله: ها نفسك في ايه؟ عايز تاكل فين؟ طب عايز تشرب ايه؟ اطلب اى حاجه نفسك فيها
 
صاحبه كان مندهش قبل يسأله ويقوله: بص انا اكيد فرحان, انك بقيت مبسوط, بس هو انت مالك؟ ومين البنت دى؟ دي بنت جديدة صح؟
 
رد عليه بمنتهى السعادة وقاله: لاء خالص دى”ملك”
 
صاحبه عينه طلعت لبرا وفتح بوقه وهو بسأل: “ملك” ؟؟ اللى كنت بتزعق لها فى كل مكالمة؟ اللى كنت بتكون عايز تقفل التليفون كل ما تشوف رقمها؟, مش دى اللى كانت مش فاهمك؟ وانسانه نكدية؟ وكانت بتغير مودك؟ يابنى مش انت قولت انها اكبر غلطة كانت في حياتك!!؟ ايه اللى حصل؟ وخلاك تتحول بشكل ده؟ تتحول ايه؟ انت بقيت واحد تاني؟
 
ابتسم قبل ما يرد ويقوله: عندك حق لازم تستغرب, انا نفسي مستغربني جدا, بس فى نفس الوقت فرحان باللى انا بقيت فيه؟
 
صاحبه رد عليه بانفعال: انت مجاوبتش ياعم؟ ايه اللى حصل خلاك كده فهمني؟؟
 
– كنت غبي, مش فاهم حاجه وفاكر نفسي, جايب التايهه, انا هقولك, فى يوم كنا بنتخانق كل المعتاد, والمكالمة وصلت لذروتها فى قلة الذوق والجلايطه مني, ده غير صوتي العالي, وزعيق بقا, وهى صمت رهيب مبتردش ومبتقولش اى حاجه, قولتها انتى كمان ساكته مش عايزه تردي؟ طييييييب انا هقفل يلا سلام ؟
 
بعدها بشوية جالى اتصال من المدير بتاعي, بيتكلم وهو عصيبي وكان هيطلع فيا ويدهمولى, ده غير انه لمح لي انه ممكن يخصم لى حوافز الشهر!!, ده غير خصم نص مرتبي؟
 
برغم ان الموضوع اللى بيتكلم فيه مكانش غلطتي؟ نهائي ده غلطة ناس تانيه بس هو مكانش فاهم؟
 
= انجز ايه علاقة ده بسؤالى؟؟ فين الاجابة
– سبنى اكمل وانت هتفهم!!
= كمل ام نشوف اخرتها؟
 
– مخبيش عليك فضلت اهدى فى المدير, وامتص غضبه, واحده واحده, وفهمته انها برغم انها مش غلطتى بس سهلة انا اقدر احل المشكلة؟ بمنتهى البساطة, وزودت كام جملة, “سنجفا”
زى اني “اتعلمت منه” وانه يعنى “قدوتي في مجال البزنس”, الراجل يا بنى اتحول تماما تماما, والصوت العالى بقا هادى, وبيتكلم بمنتهى الشياكة اللى في الدنيا, بعد ما كان شبه سواق مكيروباص الزباين بتفاصل معاه على الاجرة؟, واعتذر لى تخيل؟ ودى اصلا عمرها ما حصلت؟
 
وبعد ما كان هيخصم من مرتبي والحوافز؟ قرر انه هيدني علاوة استثنائية؟ وققل وهو بيأكد عليا
انى لازم ازوره بكره فى مكتبه علشان, الفرع الجديد اللى هيفتحه لشركة, محتاج يسمع منى اهم ملاحظاتي, وقالى من تحت لتحت كده انى جايز انا اكون دراعه اليمن هناك؟
 
بعد ما قفلت المكالمة والمفروض انى اكون طاير من الفرحه؟ حسيت احساس فى منتهى الوحاشة اللى فى الدنيا بعد ما عملت مقارنه ما بين طريقتى وانا بتكلم مع المدير, وطريقة كلامى مع “ملك”
 
حسيت انى شخص منافق جدا, وده لاني كنت بتلكك لها على اي حاجه؟ عشان اقول انها بتزعلنى؟ في حين ان المدير كان كلامه كله غلط؟ وكان بيزعق لى؟, ومع ذلك انا كنت بحط “مليون عذر” عشان استحمل طريقته واسلوبه الوحش معايا؟, و في الاخر نجحت اني اخليه يتحول من قمة العصيبة الى منتهى الهدوء والرقى؟
 
وفضل سؤال, يزن في راسي كتير كتير كتير؟ هو انا ليه بتعامل معاها كده؟
هو المدير احسن منها فى ايه؟
في حين انها حتى لو كانت بتضايقنى او كانت بتتصرف غلط فهي هدفها الحقيقي انها تسعدني؟ وانى اكون مسبوط وانها ترضيني؟؟
 
انا وحش جدا وبوشين؟
 
وقتها اتعلمت اهم درس في حياتي, وهو اني لو قررت انى ازعل من حد,
او اتهمه انه في كل العبر الوحشه؟
لازم اتأكد انى “شفته من كل الزوايا؟
واتأكدت ان نيته فعلا نحيتى ماكنتش حلوه؟
وانى حاولت كتير التمس الاعذار واحط نفسي مكانه,
وانى افترضت حسن النيه مش سوء النيه مقدما ومسبقا
,” واخير لو اكتشفت انى عملت كل ده؟ وهو مش كويس معايا”
برضه مش من حقي انى اقول او احكم عليه او اتعامل معاه بطريقة وحشه؟
 
وده عشان انا برضه معرفش الحقيقة ومعرفش هو عنده ايه ؟ ولا ظروفه ايه؟
ضيف بقا على كل اللى فات انى مش ملاك
عشان اشوفه شيطان؟
 
تخيل ده بقا مع اى حد يبقا المفروض انى اتصرف ازاى مع انسانه “بتحبنى” وانا وحش معاه؟ ومش شايفه منى غير كل الطباع السيئة والحلو اللى عندى بيكون مع الناس الغرب؟
مش عايزه اى حاجه منى غير انى اكون اسعد واحد في الدنيا؟
واحده ابوها وامها شايلنها من على الارض شيل؟
اميرة وملكة وسط صاحبتها, اقوم انا اجي وامحى شخصيتها عشان عملت حاجه مش على مزاجي؟
استغل عواطفها ومشاعرها نحيتى باني اتحكم فيها؟ اشمعنه مش هقبل كده على اختى؟ بس عادى لما انا اعمله معاها؟ لا لا لا انا مش كنت؟ غبي انا كنت حمار فاهم حمار؟ انت معايا؟ ولا نمت مني؟
= لاء بس اصل كلامك خلاني اكتشف انى حمار
 
عمر حيدر
 
هل ساعدك هذا المقال ؟

مقالات ذات صلة

اترك تعليقك !