كيفية التعامل مع الاطفال

اتكلمت Jo Frost في super Nanny عن حاجة اسمها القواعد العشر في تربية الطفل بتلخص فيه طريقتها في التعامل مع أغلب المواقف ، القواعد دي مبينة علي الملاحظة مش علي النظريات ، انا حطيت عليها التاتش بتاعي ‏‎:)

١- المدح و المكافأة : و أفضل مكافأة هو اعطاء الطفل الإهتمام و المدح و الحب ، الطفل بيتعود علي التقدير المعنوي أكثر من التقدير المادي فبيكون نظرته للحياة لاحقا فيها عمق روحاني أكبر ، يعني مكافأة الطفل بمدحه و انك تحطي stickers علي يده أو تخرجي معاه أو تخديه في حضنك أو تتكلمي عنه حلو قدام حد

٢- التماسك : يعني لو حطيتي قاعدة معينة لا تكسريها لأي سبب من الأسباب ، يعني مش علشان ترتاحيلك شوية نخلي الكرتون ٣ ساعات بدل ساعة ، ولا علشان خايفة من الإحراج في المول تستجيبي للصريخ ، دايما احرصي إن لو في حد بيشاركك في تربية أولادك زي زوجك أو والدتك أو والدة زوجك أو ال nanny انهم يلتزموا بنفس القواعد مع الطفل و القاعده تبقي قاعدة مهما اختلفت الظروف ، الطفل لو وجد إن في وسائل لما بيستخدمها انتي بتكسري القواعد هيستمر في إستخدمها و بأسوأ الطرق

٣- الروتين : النظام و الترتيب و الروتين الثابت للجميع ، مواعيد للإستتيقاظ و مواعيد لوجبات الأكل ، مواعيد الإستحمام ، مواعيد اللعب و مشاهدة الكرتون ، موواعيد النوم ، المواعيد و النظام بيعتبر أحجار الزاوية للحياة العائلية و بعد ما يتحول هذا الروتين لأساس البيت ممكن التخلي عنه بمرونة في الأجازات و السفر و الظروف العائلية ، مع الروتين يكون في المرونة علشان الحياة متبقاش جمود فيتحول الروتين لعبء

٤- الحدود : الأطفال دائما محتاجين اللي يذكرهم بأن في حدود معينة في تصرفاتهم لا يجب أن يتعدوها ، يعني الصوت العالي و ممتلكات الأخرين و التدخل في أمور الكبار ، دايما نفهمهم أن هناك ما هو مقبول و ما هو غير مقبول و أن احنا بنتوقع منهم المقبول

٥-التأديب و الإنضباط :يعني الحدود و القواعد اللي انتي حطتيها لن تطبق بالشكل الكافي الا لو كان هناك تأديب ، يعني تكوني انتي مسيطرة بشكل حازم و هادئ في نفس الوقت ، يعني نبرة صوتك تكون صارمة و ثابتة و توصلي رسالتك بشكل مختصر و واضح و لا يحتمل غير معني واحد ، وفي أساليب كتيير جدا ممكن نبقي نتكلم عنها و كلها بعيد عن الضرب و العقاب البدني

٦- التحذير : نوعان
الأول : ان تكوني أنتي من تخبرين طفلك بموعد دخول الحمام و النوم و وجبات الطعام ووو
الثاني :تكوني أنتي من يخبر طفلك بعواقب التصرف السئ
ده بيعطي الطفل فرصه لأنه يتصرف بشكل جيد و كمان يديه فرصه انه لو أخطأ يتراجع بسرعة قبل ما انتي تلجأي للتأديب

٧-التفسيرات : الطفل قبل ٥ سنوات لا يدرك طريقة التصرف الصحيحة الا لو انتي علمتيه ، يعني تشرحيله و توريله و تفهميه بوضوح الطريقة و الشكل اللي يتصرف بيه ، بدون ما تعطي أسباب و تعقدي الأمور ، دور الأم بيكون في الفترة دي توضيح المفاهيم البسيطة

٨- ضبط النفس : حافظي علي هدوءك لتكوني انتي المسيطرة ، لما بتغضبي طفلك اللي بيتولي زمام الأمور في هذه اللحظة ، لا تستجيبي لغضب أو صراخ طفلك بغضب و صراخ مماثل ، انتي الأم الكبيرة الناضجة المتحكمة في زمام الأمور ، الطفل ذكي و بسببك ممكن يتقن الأساليب اللي تخليه هو المسيطر

٩- المسئولية : دعي الطفل يقوم بإنجازاته الصغيرة بنفسه ليزداد ثقته بنفسه و يتعود علي النجاح ، ليعيش النمو و التدرج بكل ما تحمله الكلمة و يستشعر الحياة الحقيقية ، علميه المهارات الإجتماعيه و خليه يشترك في تفاصيل الحياة العائلية و الإجتماعية اليومية ، لكن توقعاتك لا تزيد و وكلي له مهام تناسب عمره حتي لا يقع في إحباط من الفشل

١٠-الإسترخاء : الوقت اللي بتقضيه مع أولادك مش بالكم يكون بالكيف يعني الوقت يكون فيه جودة ، يعني متكونيش ماسكة التليفون و فاتحه فيس أو بتتفرجي علي التليفزيون و تعتبري ده وقت بتقضيه مع أولادك ، تأكدي من إن كل طفل من أطفالك بيحصل علي نوعية جيدة من الوقت علي حدة ،و بيحصل علي حنان و اهتمام منفرد ، حدوته قبل النوم و قبلات و أعناق و تأكدي إن طفلك بينام و هو سعيد

طبقي القواعد دي مع أي موقف يبواجهك مع طفلك و هتلاقي النتايج هائلة

نانسي شبانة

هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..