كيفية التعامل مع الطفل العنيد والعصبي

الأطفال و الصبر

كثير ما تشتكي الأمهات من إن الأطفال بيصروا علي ان الشئ يكون حالا و مش بيكون عندهم صبر و ده اللي هتكلم عنه و ازاي نحله و الطفل يتدرب يكون عنده صبر

أول خطأ بتقع الأم فيه إنها بتفترض إن الطفل المفروض يكون صبور و انه لما يستعجل و يصر يبقي كده مش طبيعي و بيعمل حاجة خطأ

إزاي أعلم طفلي الصبر من صغره :

الصبر مش صفة فطرية الصبرشئ بيكتسب بالتعلم و التدريب و بدليل حديث الرسول عليه الصلاة والسلام

إنما العلم بالتعلم وإنما الصبر بالتصبر وإنما الحلم بالتحلم

يعني الإنتظار ده فن محتاجه تعلميه لطفلك بالتدريج و يعني مثلا دايما قولي عبارات زي الأرز علشان ينفع ناكله لازم نستني لما يستوي ، اللبس المغسول علشان ينفع نلبسه لازم نستني علشان يجف ، علشان نوصل الملاهي لازم نستني في العربية علشان الطريق و هكذا

مثلا تمرين السباحة بتاع أولادي بيكون يوم السبت العصر و من أول ما يصحوا بيبقوا عايزين يروحوا ، عرفتهم إن ميعاد السباحة الساعة ٣ و وريتهم الساعة و عرفتهم لسه وقت أد إيه ، قلت لهم علشان نروح يبقي نخلص ترتيب لعبنا و نساعد ماما في كذا و كذا و نلون كذا و نلعب بكذا و كده هتكون الساعة ٣ جت و نروح التمرين

قدمي دايما نموذج بنفسك للصبر ، يعني لا تبدي ضيق من أي حال إنتظار و بيني لطفلك تقبلك لحال الإنتظار و ازاي بتتفنني في انك تجدي طرق تستثمري هذا الأنتظار

بالتدريج طفلك هيتعود علي الفكرة و هيبقي سلوكه الصبر

لو الطفل بقي عنده فعلا اصرار علي عدم الإنتظار نعمل إيه ؟

١- شجعي أبسط سلوك للصبر يعني مثلا لو انتظر أخوه يشرب الأول ، إشكريه علي إنتظاره و عرفيه ان ده سلوك كويس و انك مبسوطة منه جدا

٢-خليكي هادية مهما كان ولا تستجيبي للإلحاح ، لما طفلك يصر علي شئ و يحتج و انتي تنفعلي يبقي انتي نموذج رائع في عدم الصبر و متلوميش عليه بعد كده ‏‎:) ، ببساطة قولي لنفسك طفلي لسه بيتعلم و هيتعلم أسرع لما يشوفني هادية و صابرة

٣- استخدمي معاه طريقة علشان تلعب بالعجلة تعلق هدومك في الدولاب أو علشان تلون تحط شوزك مكانه ، والتزمي بتطبيق اللي تقوليه و كوني حازمه و لكن بهدوء و حنان ، خلي الطفل يدرك انك فعلا تعني ما تقوليه

٤- متقوليش لطفلك لأ مش هتعمل كذا علشان انت معملتش كذا ، قولي علشان تعمل كذا يبقي تعمل كذا الأول ، يعني علشان أعملك اللي انت عايزه اعمل الأول اللي أنا عايزاه

ابني مره استخدم الطريقة دي معايا بطلب منه حاجة قالي اعملي كذا الأول و انا أعمل اللي انتي عايزاه ، قالي مش انتي لما بعوز حاجة بتقولي لي اعمل كذا الأول ، ابتسمت و قلت له حاضر خلاص هعمل أنا الأول و انا متأكده انك هتعمل اللي أنا عايزاه بعدها اتفقنا ؟ قالي اه اتفقنا ، وفعلا التزم و ده الشئ اللي بيوطد العلاقة و بيجعل في رصيد ثقة بينك و بين طفلك

٥- أكدي له انك عايزه تحققي رغباته ، ولكن عدم التزامه هو اللي مخليكي مش بتعملي اللي هو عايزه و انه أول ما يعمل المطلوب انتي هتستجيبي مباشرة لأنك بتحبي تعملي له اللي هو عايزه و ان ده شئ بيبسطك ، و أول ما يعمل المطلوب منه استجيبي مباشرة و احتضنيه و عبري عن سعادتك بيه و اشكريه بصدق

٦- لما الطفل يصر علي شئ غلط بذكاء دخلي بديل يشغل تركيزه و إقنعيه بيه و لو رجع يصر علي الشئ الأول ناقشيه و اشرحي له السبب و لو أصر كوني حاسمه في إنه شئ غير مسموح

حاجات متعمليهاش علشان التشبث و الإصرار ميزدش :

١- متجبريش طفلك علي إنه يعمل أي شئ حالاً الآن ، لأن ده هيعلمه انه هو كمان ممكن يعمل كده ، فخلي عندك مرونه و طول بال

٢- لا تستجيبي أبداً لتشبثه لأن ده هيعتبر مكافأه لعدم الصبر و تعزيز له ، استحملي نوبة غضب اربع خمس مرات بالتجاهل التام أفضل ما يتحول عدم الصبر لسلوك دائم يطول تعديله

لو مثلاَ هتخرجوا و هو جاهز بس انتي لسه بتعملي حاجات و هو بدأ يصر علي الخروج و يروح و يفتح الباب ، لما تجهزي أكدي عليه ان انتوا خرجتوا علشان انتي خلصتي مش علشان انت روحت و فتحت الباب و ان ده كان سلوك غلط و انك متأكده إنه مش هيكرره

نانسي شبانة

اقرأ أيضاً:

هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..