كيف اتعامل مع حبيبي

عزي نفسك يا بطة 🙂 
.
وش فيكم من تحبون واحد إندفقتوا عليه كأنكم واحد جوعان في مأدبة؟ مايصير تروحين تركضين إنتي وراه يا بطة. لازم هو يجري وراك وتحفى أقدامه حق تعطينه وجه. ليش الله خالقك إنثى، إعتباطا؟ أنثى يعني جسديا إنثى وهذا مختلف عن كونك مرأة. ( الشرح في وقت لاحق )
 
أنثى يعني دورك تغرينه وتجذبينه بالأنوثة وإذا صار عندك تطنشين له ويبدأ هو بتقديم فروض الطاعة والولاء من باب الحب طبعا. يعني إذا حبه لك صادق وقوي بيحاول يتودد لك ويحاول يراضيك ويتقرب لك بطرق كثيرة. هاذي العملية مهمة جدا لتتأكدين بأنه فعلا فعلا يحبك ومقتنع منك وما عنده أي شك في حبه ومستعد يسوي أي شي للوصول لك.
 
هذا جزء من اللعبة، لازم المرأة تثقل شوي لأنها إذا جات كلها مرة وحدة تصير ثقيلة على القلب. دورك هو جذبه والمحافظة على رغبته بك أطول مدة ممكنة. يعني مو من أول يوم تفتحين الكاميرا. تخلينه يحرق أعصابه ثلاثة أو أربعة شهور لين ترضين تكلمينه صوتيا وعقبها شهرين أو ثلاثة لين تعطينه صورة قديمة يوم كنتي صغيرة. في البداية تكلمينه أكثر وبعدين تخففين وتشغلين نفسك عنه. صيري مثل المدراء العرب إللي ٢٤ ساعة في إجتماع، لو تتصلين به الساعة ٣ الصبح يقول لك في إجتماع هههههههههههههههه
 
إيي عيشي حياتك وإستمتعي وهو إذا جاد فعلا لازم يسوي المستحيل حق يوصل لك. أرسلي له حب ووجهي قلبك نحوه بس في الجانب العملي كوني رزينة. أظهري له الحب وقولي له كلمة حب وحدة وخليه هو يكمل الباقي ويغرد لك ساعتين حق تقولين له أحبك مرة ثانية.
 
لا تجيبين طاري العرس. وإذا إسألك متى؟ قولي له إذا الله كتب. خليه يمشي وهو يطالع السماء ههههههههه لازم تتكون عنده رغبة في الحصول عليك بدرجة متفجرة وهذا إللي يخليه يتحرك.
 
هاذي العملية ضرورية جدا لتزيد الترابط بينكم وبتبين عيوبه كلها لك. إللي ما يحبك بما يكفي بيبتعد وإللي حبه من نوعية رديئة بيفقد أعصابه ويفقع غير مأسوف عليه لكنك بتستفيدين إنك تدربتي عليه ورفعتي ذبذباتك للضحية القادمة إلى أن يجيك الشخص إللي يحبك فعلا ويعزك فعلا ويقدر وجودك في حياته.
 
لا تصيرين بضاعة رخيصة، إللي ما تعز نفسها ما تلقى إللي يعزها. وكل شي بالعقل يعني لا تتطرفين في الإبتعاد والتطنيش. لاحظت إن الوسطية عندكم معدومة إلا ما رحم ربي.
 
س: كلام جميل ..بس ينطبق ع الزوج
 
ج: كل ما فوق التراب تراب ههههههههههه
الرجل هو الرجل قبل وبعد الزواج. نفس الأمر ينطبق عليه. لا تخلين الورقة تخدعك، هاذي للحكومة فقط لأنها تريد أن تعرف من ينام مع من
 
س: تقصد شحذ همم سلاح الانثى ؟
 
ج: لازم تشحذ همتها. يعني الوحدة يطلع لها واحد يحبها نص نص وهي تعتقد إنه فارس أحلامها
 
س: هل يطبق هاد الكلام ايضا ع قرار الارتباط ؟ اذا اثنين سوا لمدة اشهر ، ضرورى تستنى البنت الرجل يقرر متى يجى يخطب حتى تعز نفسها و ما تبين لهفتها وراه ؟!!
 
ج: طبعا، لازم هو يقرر بدون ضغط منها. أصلا المفروض هي تفتح المجال ليغادر، تشجعه على الهروب وما يستمر معها إلا إللي يحبها فعلا.
 
س: ما اظن بقى في راجل يتابعك بعد المقال ده ؟
 
ج: موجودين كثير بس أكثر الرجال على الصامت وبعضهم يتكلمون على الخاص
 
س: عندي فضول هو مقالاتك بتكون حسب اسئلة تتلقاها و لا موقف تشاهده لان احس ان كلامك بيكون كلام حد تم استفزازه
 
ج: المقالات أحيانا إلهام وأحيانا أسئلة بايخة وأحيانا أسئلة مكررة وأحيانا حل لقضية عرضت علي وأشوف إنها تصلح للجميع.
 
س: بس مش ستايل اتقلي عليه يلزق دة بيبقى حب تملك
و لو تؤام الروح محتاج بردوا كدة تكتيك استراتيجي
و لا التعامل على الطبيعة؟
 
ج: من وين تخترعين الأسئلة؟
توأم الروح حبه ما فيه تملك ومع ذلك نفس الأسلوب يمشي عليه.
 
ترى مب كل واحد تحبونه تقولون توأم الروح، العملية محتاجة درجة عالية من التطهر الروحي
 
س: طيب كﻻم حلو ياعارف بس ماتمشي مع شباب العرب الي عايشين بالغرب! الشاب العربي عايش بﻻ زواج مع سويدية وﻻ روسية كل تفكيره حب مع رغبه! ان اتعززت البنت عليه رده سريع وجهاز يقارنها في الغربيه. اعتذر منك بس الشاب العربي ايفكر الجنس أهم من الحب هنا بالغرب. الطريقة الي تتكلم عندها هاي على زمن جدتي وأمي ماتمشي الحين ممكن تمشي في السعودية ﻻكن في بلدان ثانية أيضا صعب أعتقد من خﻻل الي اشوفه.
 
ج: غيري تفكيرك تتغير النتائج إللي تحصلين عليها
 
س: البنات فضحونا و هن اللي نزلوا قيمة المرأة، تجدهم يموتوا على الزواج وتنقص من كرامتها للحصول على زوج، يا ستي عنه ما جا المهم عزة النفس.
 
ج: وإللي تنقص قيمتها تحصل على زوج ناقص
 
س: كيف يمكنني كسب ثقته اني احبه لكن اريده هو يتحرك لانه ممكن يظن اني لا احبه ويتركني اندم اني ما تنازلت ؟؟ الرجال عندهم كبرياء اقوى من النساء لا يرضى بالذل وخاصة اذا كانت رغبته الجنسية هي من يقوده ؟؟؟؟!!
 
ج: ايه يا بطة؟ كل كلامك غلط من أوله إلى آخره. حتى علامات الإستفهام غلط.
 
إقرأي المواضيع القديمة حق تضبطين معتقداتك
 
س: بدر لذهني سؤال اتمنى تجاوبني .. كيف افرق بين حب الرجل الحقيقي لي ولروحي ولحب الجنسي او التجاذب الجنسي لي فقط دون حب لانو الرجل الحب والجنس عنده في دائرة واحدة … ارجو توضيح
 
ج: ليش ما تبين تجاذب جنسي؟ تتوقعين الله خلق الجنس زيادة عن اللزوم؟
 
إنتي شيلي تفكيرك بالجنس وإللي بيظهر لك بيحبك لذاتك. إنتوا تفكرون في الجنس وتجذبون الرجال جنسيا وبعدين تقولون الرجال بس يفكرون في الجنس. طيب لو فكر الجنس وش فيها؟ هاذي تركيبة طبيعية.
 
أنا ما أشرح دور الجنس لأن ما عندي مزاج أدخل في مهاترات مع ناس ينكرون الحقيقة، مترهبنين
 
س: ماذا بعد الزواج ؟… نزيد جرعة التقل ؟؟ ولا جرعة حب ؟؟
 
ج: زيدي جرعة الأكل 😀
 
س: كل مشاكلنا العاطفية سببها الكبت الناتج عن العادات والتقاليد عيب حرام عيب حرام عيب حرام
 
ج: ولأن كل شي عيب وحرام ما نقدر نزيد لكم الجرعة
 
س: والله معك حق ما عندنا وسطية ههههه يا اما بنثقل يا اما ما بنثقل ما في وسط انا شخصيا بتصرف بعفوية ما بعمل اي شيء قصدا هو هدا خطأ ولا صح ما بعرف؟
 
ج: إذا إنتي متوازنة عفوية فهذا جيد. العفوية مطلوبة دائما بس الوحدة أول شيء تعرف الحقائق
 
عارف الدوسري
 
هل ساعدك هذا المقال ؟

تصنيفات : اختيار شريك الحياة

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..