مراحل تغذية الطفل

تناول الطعام عند الأطفال
 
الوضع الصحي لأي طفل لا يتحدد بكميات الأكل و لكن بيتحدد بالنمو و التطور الطبيعي للطفل وفقا لمقايس الوزن و الطول المعروفة ، غالبا الأمهات اللي بيشتكوا من إن أطفالهم عندهم مشاكل في تناول الطعام بيكون بسبب تقدير خاطئ منهم و قلقهم الزايد ، لأن غالب الأمهات يتمنوا إن أطفالهم يأكلوا كميات أكبر و بيعتبروا ده مصدر سعادتهم ، لأنهم شايفين إن الطفل لما ياكل أكتر ده نوع من التعبير عن الإهتمام و الرعاية ، وإن الطفل لو مأكلش تحس الأم بالتقصير و تأنيب الضمير ، وده غير صحيح لأن الطفل من حقه رفض الأكل في بعض الأوقات وفقا لحالته الصحية و المزاجية ،
في مرحلة عمرية ما بتختلف من طفل لطفل بيرفض فيها الطفل الطعام و تنتهي هذه الفتره بهدوء لو تم التعامل معها بشكل سليم ، أما لو تم إجبار الطفل علي تناول الطعام ، بتزيد المشكلة و بتطول مدتها ، لكن مع إتباع بعض النصايح اللي هقولها هتتلاشي بالتدريج بإذن الله .
 
ازاي أعرف ان طفلي شبع ؟
 
١- يبقي فمه مغلقا عند تقديم الطعام
٢- قال لا ورفض تناول المزيد
٣- بكي و صرخ
٤- ابعد وجهه عن الأكل الموجود أمامه
٥- دفع المعلقه او الطبق بعيد
٦- بصق الطعام من فمه اكتر من مره
٧- احتفظ بالطعام في فمه فتره طويلة و رفض ابتلاعه
٨- حاول الخروج من كرسي الطعام
٩- تقيأ أو حاول التقيؤ
 
– علشان طفلي يتناول طعامه بشكل جيد اتبعي الأتي :
 
١- تناولي الطعام مع طفلك ، فالوجبات التي تجتمع عليها العائلة لها تأثير كبير في فتح شهية الطفل ، ولو طفلك عنده مشكله خلي طفل شهيته كويسه يتناول الطعام معاه ،ده هيشجع طفلك
 
٢- قولي كلام إيجابي عن الأكل اللي الطفل هيتناوله لشخص أخر غير الطفل
 
٣- ثبتي روتين يومي لمواعيد الطعام و التزمي بيها ، الأطفال بيحبوا الروتين علشان بيخلي عندهم توقع للي هيحصل ( ٣ وجبات رئيسية و ٢ وجبة خفيفه بينهم )
 
٤- مكان الطعام يكون محدد و ثابت و مريح و مناسب للطفل و ميكنش في حاجه تشتته و تشغله زي التليفزيون و يكون جالس علي كرسي ، يعني بلاش أكل علي سرير أو علي الكنب و الطفل في غير وضعية الجلوس ، كمان بلاش يمسك الأكل ياكله و هو بيتمشي في البيت ، لازم بتعود إن تناول الطعام يكون هو جالس علي الكرسي و يركز في الأكل علشان يخلص في وقت قليل
 
٥- اعطاء الطفل كمية مناسبة ، ويفضل لو أعطيه كمية بسيطة و لما يخلصها أسأله لو عايز تاني
 
٦- قدمي الطعام للطفل و بعد ٢٠ دقيقة شليه حتي لو كان أكل كميه بسيطه ولا تبدي اي ملاحظه أو تعليق ، لأن الطفل بياكل اللي هو عايزه في خلال ٢٠ دقيقة فلا داعي لإطالة المدة و استمرار وجود الطعام لفتره طويله قدامه، ولا داعي أيضا لمحاولة إجبار الطفل ، و قدمي الوجبة التي تليها في موعدها ، لكن لو طولتي المدة الطفل مش هيكون لحق يجوع علي موعد الوجبه اللي تليها و كده هتلخبطي النظام و هتعودي الطفل علي استغراق وقت طويل في الأكل
 
٧- امدحي طفلك عندما يأكل جيدا ، ولا تعطي له اهتمام في حال عدم تناوله الطعام ، لأن الطفل بيعمل اللي يلفت انتباهك و اهتمامك ، ولو وجد ان عدم تناول الطعام بيخليكي تهتمي و تيجي تعدي معاه علشان تأكليه بنفسك هيستغل ده و هيستمر
 
٨-لما تقدمي لطفلك اكله أول مره ياكلها كلي منها الأول أمامه ، عادة الاطفال بيستمروا في أكل نوعيات محدده لفتره و ده احيانا بيخلي عندهم بعض المخاوف من تجربة الحاجات الجديدة و ده أمر طبيعي هيزول بالتدريج و هيتجرأ ياكلها لما يشوفك و يشوف ناس تانيه بتاكلها أمامه ، يفضل تقدميها بكميات بسيطة و تزوديها بالتدريج ،وممكن تقدمي النوع الجديد و الطفل جائع ، و لما تكوني خارجه تآخدي معاكي أي طعام من الطفل متعود عليه و عارفه علشان ممكن يرفض ياكل الحاجه الغريبه اللي ميعرفهاش
 
٩- لما طفلك يكون بيتكلم و فاهم ، اشركيه معاكي في شراء الطعام و إختيار الخضروات و لما تيجي تطبخيها خليه يشوفك و قوليله شوف كذا اللي انت اشتريته مع ماما
 
١٠- اشركي طفلك في الطبخ البسيط ،ولو في صعوبه إنه يعمل معاكي بنفسه خليه يكون معاكي و انتي بتجهزي و اشرحيله الخطوات اللي انتي بتعمليها
 
١١- يفضل يكون للطفل أدوات الطعام الخاصه به و تكون ألوانها حلوه و هو بيحبها ، و ممكن تخلي الطفل يغرف لنفسه و يحط الكمية اللي تناسبه
 
١٢- الطفل بيتعلم تناول الطعام بتقليد من حوله ، فقدمي لطفلك نموذج لعادات سليمة
 
١٣- شجعي طفلك انه ياكل بنفسه حتي لو كان سنه صغير و تحملي الفوضي اللي هيعملها
 
١٤- ممكن تخيري الطفل قبل ما تطبخي و تعطيله ثلاث أختيارات يختار منها ، و وقت الأكل تقوليله ماما عملت لك كذا اللي انت اختارته و بتحبه ، لا تسأليه تحب تاكل أيه؟ ، علشان ممكن يختار حاجه غير صحية
 
١٥-عودي طفلك علي عدم فتح الثلاجة و عدم تناول شئ بدون إذنك ،يعني الأكل اللي الطفل ياكله تكوني انتي اللي مقدماه وفقا للروتين اللي انتي حطاه
 
– أشياء لا تفعليها :
 
١- لا تتعجلي الطفل لإنهاء وجبته
 
٢- لا يتم تقديم الحلو علي إنه مكافأه عن تناوله طعامه ، لأنه هيعتبر كده أن الحلو أفضل من المالح
 
٣- لا تبعدي عنه وجبة طعام رفضها و تقدمي وجبه تانيه مختلفة ، لأن الطفل هيستغل ده علي المدي الطويل ، علشان كده قدمي صنف تكوني واثقة ان الطفل هيتناوله ، يعني مثلا قدمي ارز مع نوع خضار فلو رفض ياكل الخضار ياكل الأرز ، كده الطفل هيكون جاد في تناول الوجبه التي تليها ، حاولي في المره القادمة تقدمي هذا الصنف بطريقة أفضل يحبها
 
٤- لا تطلبي من طفلك تناول الطعام و هو يشعر بالتعب ممكن تعطيه عصير خفيف و ينام لما يصحي ياكل
 
٥- لا تجعلي طفلك يصل لمرحلة الجوع الشديد ، لأن الطفل الجائع لا يأكل بشكل جيد
 
٦- لا تقدمي حليب أو عصائر قبل تناول الوجبة بساعة
 
٧- لو الطفل رفض ياكل الوجبه الرئيسية لا تعجلي إعطاءه الوجبة الخفيفة التي تليها علشان تطمني إنه أكل أي حاجه وخلاص ، بل التزمي بمواعيد الطعام لأن ده هيخليه جاد في تناول الوجبة التي تليها
 
٨- لا تتوقعي ان طفلك هيرفض طعام معين علشان رفضه قبل كده ، لأن قدرة الطفل علي التذوق بتتغير من وقت لوقت ، قدمي الطعام مرة أخري بعدها بإسبوعين و لو رفض تاني كرري كل اسبوعين حتي لو عشر مرات ، و متقوليش لحد قدام الطفل (طفلي مبيحبش ياكل كذا)
 
٩- لا تشعري بالتقصير أو التأنيب لو محاولاتك مع طفلك فشلت ، استمري في تقديم الطعام بهدوء و حافظي علي السلوك الايجابي و عدم الإجبار
 
١٠- لا تكافئي طفلك بأكل غير صحي زي الشيبسي أو الكاندي ، علشان هيتحول كده الأكل الغير صحي لشئ مرغوب فيه
 
– في أمهات كتير بيظنوا إن أولادهم عندهم مشكلة في تناول الطعام و ده مش بيكون صحيح ، ازاي أعرف اذا كان فعلا طفلي عنده مشكله ولا لأ؟
 
اولا : تشوفي وزنه و طوله بالنسبه لعمره وفقا للمقياس المعروف ،و لو متساوي أو أكثر يبقي مفيش مشكلة ،ولا داعي للقلق حتي لو بياكل كميات بسيطه ،اما لو أقل يبقي نلجأ لطبيب لإستشارته
 
ثانيا : بنعمل للطفل تحاليل علشان نشوف الحديد و الكالسيوم و بناء علي النتيجة بنحدد
 
ثالثا : اكتبي قائمة بجميع الأطعمة و المشروبات اللي بيتناولها الطفل خلال إسبوع و لو هذه القائمة فيها كل المجموعات الغذائية ( الخضروات -الفواكه – البروتين – الحبوب – الألياف – الدهون – الأطعمة الغنية بالكالسيوم) إذا لا داعي للقلق ، لكن لو في حاجة مش بياكلها الطفل ابدأي ركزي عليها و تفنني في طرق تقديمها له
 
لازم نأكد علي حاجه إن دور الأم هو الإستمرار في تقديم طعام صحي و مغذي من إختيارك و تترك الطفل علي حريته في إختيار الكمية و النوعية اللي يفضلها من اللي انتي مقدماه له ، يعني إختياراته تكون ضمن إختياراتك ، و احترمي دائما قرار طفلك بالتوقف عن الأكل عندما يشعر بالشبع ، وده علي المدي الطويل هيخليه عنده عادات كويسه في الأكل
 
لو الطفل بيرفض الأكل ممكن يكون لعدة أسباب :
 
١- سابقة إجبار الطفل علي تناول الطعام
 
٢-تقديم كمية كبيرة يضطر لتناولها و هي لا تناسب إحتياجاته ، فيلجأ بعد كده لرفض الطعام
 
٣- تقديم نوعيات من الطعام لا تناسب الطفل من حيث المرحلة العمرية
 
٤- وجود مشتتات أثناء تقديم الطعام زي بعض الألعاب أو التلفزيون
 
٥- تغير الشهية و ده بيحصل من فترة لفترة علي حسب عمر الطفل
 
٦- مرض الطفل أو التعب أو قلة النوم أو الخوف من شئ
 
٧- تكرار إحساسه بالجوع ، فبيبدأ الجسم تلقائيا يكتفي بالكميات القليلة
 
٨-عايز يجرب إحساسه بالإستقلالية و يشوف رد فعلك
 
تفنني و ابتكري و تبني استراتجيات جديدة كل يوم غير الإجبار ، قدمي الأكل بشكل جذاب للطفل و بألوان مختلفة ، لو رافض اللحوم قدميها كفته علي شكل نجوم و مثلثات و دوائر معاها أي صوص
 
لو رافض أي صنف فاكهة قطعيه في الزبادي ، لو رفض نوع خضار قطعيه مع الجبنة ، لو رفض صنف من الخضار المطبوخ اعمليه بيوريه أو داخل أي صنف أخر
 
كثير من الأمهات بيكلموا أولادهم من سن صغير علي موضوع الأكل الصحي و غير الصحي ، أنا شايفه إن ده نتايجه مش قويه لأنك بتلفتي إنتباه الطفل لوجود نوع أخر م الطعام الغير صحي و بيكون عنده فضول يجربه
 
– إيه هي أداب تناول الطعام اللي تعلميها لطفلك :
 
١- عدم البدأ بالأكل قبل أن يجتمع الجميع و يبدأوا سوا
 
٢- الجلوس في مكان ثابت و بشكل مستقيم و عدم ترك مكانه أثناء الوجبة
 
٣- بلع الطعام قبل الكلام ، وأفهمه إنه لو إتكلم و الأكل لازال في فمه ممكن يخرج ودي حاجه مش حلوه
 
٤- ملء الطبق بالكميات اللي هيقدر ياكلها و لا يترك باقي في الطبق ، علشان كده أنا بفضل إن الطفل يتعلم يغرف لنفسه
 
٥-الإستئذان لما يحتاج حاجه و الشكر لما ياخدها
 
٦- المضغ و الفم مغلق ، علشان لما يمضغ و الفم مفتوح بيطلع صوت مش لطيف
 
٧-لو تجشأ الطفل يعتذر و يكمل طعامه
 
٨- عدم اللعب بالطعام ، و عادة ده بيكون دليل شبع ، عودي طفلك لما يخلص أكله ينتظر علي المائدة حتي ينتهي الجميع
 
٩- التحدث بصوت منخفض
 
طبعا الحاجات دي تعوديه عليها بالتدريج و واحده واحده و بمنتهي اللطف و الود دون أوامر و إجبار
 
– اقتراح لمواعيد الوجبات و مكوناتها :
 
الإفطار
الساعه 6:30 صباحا
(حليب أو أي عصير طبيعي ) أنا أحيانا بعمل مع الحليب موز أو جوافه أو بلح أو تفاح
(بيض) حد أقصي 4 بيضات في الإسبوع
سندوتش جبنه او مربي او حلاوة طحينية أو فول
شوفان أو كورن فلكس
 
وجبه خفيفة ١
الساعة ٩:٣٠ صباحا
ثمرة فاكهة ودي بتساعد لفتح شهية الطفل علشان يتناول وجبة الغذاء بشكل جيد
أو ثمرة خضار ( خيار أو جزر أو فلفل أو ذرة أو طماطم )
 
الغذاء
الساعة ١٢:٣٠ ظهرا
إختاري نوعيات مختلفة كل يوم بس حاولي دايما تكون بتحتوي علي خضار مطبوخ و بروتين و نشويات
 
وجبة خفيفة ٢
الساعة ٣:٣٠ عصرا
صنف حلو زي بسبوسه أو أم علي أو كريم كراميل أو مهلبية أو أرز بالبن أو تمر أو بعض المكسرات
و ممكن تبقي ثمرة فاكهة
 
العشاء
الساعة ٦:٣٠ المغرب
لو قدمتي له في الفطار العصير قدمي له في العشاء كوب من الحليب أو العكس
أو زبادي أو بطاطس بيوريه مطبوخة باللبن
و حدوته قبل النوم و أحلام سعيدة
 
معظم الأطفال بيفضلوا ياكلوا وجبات صغيرة متكررة عن وجبة واحدة كبيرة ، تناول طعام بين الوجبات بيقلل الشهية جدا و بيكون سبب قوي جدا لرفض الطفل الطعام ، التزمي بمواعيد الوجبات و امنعي اي أكل بينهم ، كمان يفضل تقليل استخدام السكر للأطفال علشان بيقلل الشهية ،و العصائر الطبيعية لا تضيفي لها سكر ، لو طفلك بياكل كميات قليلة إحرصي إن النوعيات اللي ياكلها تكون عالية في القيمة و السعرات الحرارية
 
– إزاي نخلي أطفالنا يطبخوا معانا ؟
 
اعتبري الموضوع ده نشاط عائلي إسبوعي و ممكن كمان الأب يشارك فيه ، ده هيساعد إن يزيد الترابط بينكم و تقضوا وقت لطيف مع بعض ،و طفلك هيتعلم أساسيات الطبخ و أسماء الأكل الصحي و هيتعود عليه، ممكن نبدأ من عمر ٣ سنوات بتقطيع بسيط للفاكهه أو ساندوتش جبنه و عمل البيتزا ، هي تجربه هتكون فوضويه جدا ، تقبلي الموضوع و استمتعي و علمي طفلك يساعدك في التنضيف بعد ما تخلصوا
 
إختاري حاجات تاخد وقت بسيط و الطفل يقدر يشارك فيها بسهوله و يحس بعدها بالفخر إنه أنجز ، صوريها و خلي العيله تشوفها و قوليلهم بفخر إن طفلك اللي عملها
 
راعي الأمان طبعا ، يعني السكاكين و التوابل و البوتجاز و الحاجات السخنه ، لازم تعرفيه إن دول ممنوع الإقتراب منهم ، علميه كمان يغسل إيده قبل ما يبدأ في الإعداد معاكي ، خليه يلبس ملابس متكنش واسعه علشان متمسكش في حاجه و كمان تكون مفيش مشكله لو اتبهدلت و اتبقعت
 
ابتكري بقي و بدعي و استمتعي بالوقت و اضحكوا و هزروا سوا ، ممكن تجيبوا من علي النت صور لأفكار ممكن تخلوا أولادكم يشوفوها و تقولوا لهم يلا نعمل زيها
 
مساءكم فن و روقان 🙂
 
نانسي شبانة
 
هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..