الرئيسية » معلومات عامة مفيدة » موقع سيو صح – نصائح عامة مفيدة

موقع سيو صح – نصائح عامة مفيدة

بواسطة عبدالرحمن مجدي
887 المشاهدات
موقع سيو صح - قصة نجاح احمد عزت في شغل المواقع
للمهتمين بـ Google Analytics
 
ملحوظة صغيرة بخصوص الـ Bounce Rate وازاى تقيمه صح نظراً إن فى أكثر من 100 رأى فى الموضوع ده ، أحياناً الـ Bounce Rate يبقى عالى وموقعك الـ Loading Speed بتاعه كويس والمحتوى كمان جذاب لليوزر بشكل أو بأخر والأكبر من كده إنه ساعات بيبقى محتوى مطول حاجة 1000+ كلمة مثلاً ، ده تفسيره الوحيد هو الـ Sessions .
 
الـ Session فى جوجل أنالتكس ليها مدة محددة وهى 30 دقيقة ، بعد كده لو اليوزر فتح صفحة تانية بتتحسب سيشن جديدة ولو قفل الموقع تتحسب Page view 1 وده معناه زيادة فى الـ Bounce Rate يعنى تعالى نفترض انا دخلت موقعك
 
وفتحت صفحة قعدت أقرا فيها شوية وبعد كده سيبتها مفتوحة وروحت أتغدى ، رجعت كملت قراءة للصفحة وروحت قافلها وخارج فى حين إن الـ Session بتاعتى عدت الـ 30 دقيقة وهنا مدة بقاء الزائر عندك كبيرة نظراً إنك بتقدم محتوى كويس ، بس إتحسبت كزيادة فى الـ Bounce Rate لأنى معملتش غير بيدج فيو واحدة بس ، وفى حالة إنى خلصت المقالة وفتحت صفحة جديدة فجوجل أنالتكس هنا بيتعامل معايا كـ Session جديدة تماماً مش بيشوفها على إنها 2 Page view .
– – – – – – – – – – – – – – – – – –
واحد من أهم الأسباب اللى بتخلى جزء كبير من اللى بيشتغلوا على الإنترنت ميحققوش نجاح مرضى ودائم إنهم معندهمش هدف عايزين يوصلوله مش عشان معندهمش خبرة أو قدرة على تحقيق النجاح ده لأن الحقيقة الـ Online Business مش علم من علوم الفضاء ومش صعب بالدرجة اللى بعض الناس بتصورها لكن الحقيقة هى إن طول ما إنت معندكش هدف واضح عايز توصله هتبقى مجرد ورقة أى شوية هواء يطيروها وأول ما الهواء ده يخلص تقع بمعنى إنك عمال تجرب أى طريقة تظهر قدامك فـ بتدخل أى جروب بيتكلم عن الربح من الإنترنت . بتشتغل على اليوتيوب ، بتكتب محتوى . بتشتغل فى الأفيلييت وبتشتغل فى الـ CPA . بتعمل بيدج وتكبرها ، بتشتغل إعلانات وتبيع تيشيرتات ، بتتعلم برمجة وتقرأ فى تطبيقات الهواتف ، بتصمم لوجوهات وتتعلم موشن جرافيك . من الأخر إنت مش عارف إنت عايز إيه ومش راسم صورة محددة فى دماغك عايز توصلها .
 
قرر إنت عايز تبقى إيه وفين خلال سنة من دلوقتى ومتخليش تفكيرك فى الفلوس دلوقتى لأنها هتيجى لوحدها فكر فى المكانة وشكل الحياة اللى عايز تعيشها بعد سنة أو خمس سنين من دلوقتى هل عايز تبقى مليونير بس بتشتغل 18 ساعة فى اليوم ؟ ولا عايز تباشر شغلك وإنت بتسافر حول العالم ولا عايز تبقى Entrepreneur وعندك شركتك الناجحة ولا شخصية مؤثرة وليها متابعين بالألاف ولا كاتب مشهور والناس بتقراله ولا صاحب موقع عالمى بيتابعه ملايين من جنسيات مختلفة أى كان شكل الحياة اللى نفسك تعيشها شوف الطريق اللى ممكن يوصلك ليها وإديله وقتك ، عقلك ، فلوسك وخليك وراه ومتبصش على أى طريق ثانى مهما كان مغرى لأن الطريق ده هو شوية الهواء اللى هيطيروك شوية ويوقعوك فى الأخر .
– – – – – – – – – – – – – – – – – – – – – – – – –
إفتكرت حاجة قريتها من فترة بتقول إنك لو عندك مطعم أو محل مسؤول عنه المفروض إنك بتروح كل يوم الصبح تحط يافطة مكتوب عليها OPEN وتبدأ شغلك عشان لو الناس راحت المطعم بتاعك كذه مرة ولقيته مقفول مش هيروحوا تانى حتى لو فتحته 24 ساعة بعد كده
 
بنفس المنطق ده إزاى عايز تنجح فى بزنس عالإنترنت وإنت مبتفتحش كل يوم! بتسيب موقعك مقفول بالأيام والأسابيع من غير ما تضيف محتوى جديد ومن غير تسوق موقعك بشكل يومى لجمهور جديد إزاى مستنى مشروعك ينجح وهو أولوية تانية وأحياناً تالتة ورابعة
 
فكرة إنك بتشتغل من البيت بتديك أريحية إنك تشتغل فى أى وقت يناسبك أو متشتغلش أصلاً بس لو فعلاً عايز تبقى Home Entrepreneur يبقى لازم تغير طريقة تفكيرك فى الشغل ومتدخلش أى مشروع جديد لو مش هتقدر تلتزم بيه كشغل يومى لحد ما ينجح فعلاً .
– – – – – – – – – – – – – – – – – – – – – – – – –
من سنتين تقريباً عملت كامب كان كل مشترك فيه بيعمل موقع فى المجال اللى هو مهتم بيه وبيتبع خطة عمل ثابتة مع اختلافات بسيطة لكل مجال بدون كلام كثير من ضمن الناس اللى كانت فى الكامب كان فى شخص شغال فى مجال الـ Travel مش عايز أقول إسمه عشان مدوشوش بأسئلة الناس إلا لو هو معندوش مشكلة و لحد وقت الكامب ده عمرى ما كنت اشتغلت فى المجال ده قبل كده
 
ولكن من خلال رؤيتى للموقع الخاص بيه وإطلاعى على المجال عن قرب إبتديت أمسك طرف خيط بسيط وقعدت وراه تقريباً سنة كاملة فى محاولات فاشلة إعتماداً على جوجل أدسنس فى مواقع مختلفة لحد ما وصلت من كام شهر لتجربة أفيلييت الحجوزات والفنادق
 
حبيت أكتب البوست ده عشان أوصل معلومة مهمة إن كلنا بنتعلم من بعض فطبيعى جداً إنت تبقى ناجح فى مجال معين وتلاقى فكرة فى مجال تانى تشدك تبدأ تتعلمها من اللى مجربينها بالفعل او على الأقل تاخد منهم طرف الخيط وتكمل .
 
والنقطة الثانية إنك عشان تتمكن من أى فكرة وتنجح فيها الموضوع بياخد وقت والتجربة هى اللى بتوصل لحاجة فى الأخر مفيش حد نجح وهو عمال يحكم على الأفكار بالسمع من غير ما يجربها كل تجربة الواحد بياخدها حتى لو فاشلة بتفيده وربك بيعوضه عنها طالما فعلاً أخلص وعمل اللى عليه …
– – – – – – – – – – – – – – – – – – – – – – – – –
من أول يوم دخلت فيه المجال ده وأنا بشوف ناس بتفكر بأسلوب واحد وهو إيه هى اسهل طريقة ممكن أكسب منها وإيه هى الثغرات اللى ممكن أستغلها عشان أتحايل عالسيستم عشان بردوا أكسب فلوس سهلة وسريعة ويمكن دى مشكلتى من أول يوم قررت أكتب فيه أو أشرح إنى مبحبش الطريق السهل وإن كنت أكيد بستخدمه فى بعض الأوقات ولكن ده بيكون بعد ما الواحد تعب واتعلم وجرب وفشل وخسر عشان ينجح فى حاجة بيحبها
 
اللى بيدايق الواحد انه يشوف نسبة كبيرة من الناس بتدخل المجال ده بعقلية الربح فقط لا غير يعنى كام واحد بيقدم شئ مفيد عالإنترنت بداية من المحتوى أو الخدمات أو حتى الفيديوهات اللى عاليوتيوب كام واحد قرر يوقف نقل فيديوهات من قنوات تانية ويصنع محتوى خاص بيه بدل العك اللى بنشوفه ، كام واحد قرر يبطل يعمل مواقع مبيفهمش فيها حاجة بس عشان فلوسها كويسة ومش مهم ان اللى بيتكتب فيها هو نفسه مش فاهمه!
 
انك تدور عالربح ده مفيش فيه ادنى مشكلة وان يكون عندك بعض المصادر اللى بتدخلك ما يعرف بإسم ” العائد السريع ” سواء كان افيلييت او CPA ده بردوا مفيش فيه مشكلة طالما بتعمله وانت فاهمه وحابه وبتقدمه بجودة عالية فعلاً اللى تخليك تعتمد عليه كمصدر ربح دائم مش بتعمله بس عشان غيرك بيكسب منه .
 
الإنترنت ميزته إنه مفتوح وبيتطور مش منتج واحد بس بيتحكم فيه لو اعتبرته هو شغلك الشاغل ومصدر دخلك الوحيد هتتعب عشان تحقق حاجة فعلاً عليها القيمة تقدر تعتمد عليها سنين مش شهرين تلاتة وده عشان يحصل لازم هتجرب كثير اوى وهتخسر فلوس ومجهود فى التجارب دى وهتتحدى كل عاداتك السلبية من كسل وغيره عشان تقدر تنجح فكرة واحدة من الأفكار دى فعلاً وتقدر توصل فى وقت من الأوقات للـ Passive Income
 
إنك يبقى عندك مشروعك القيّم اللى تعبت عليه جداً عشان ينجح واديتله من وقتك وفلوسك ومن تفكيرك وأبدعت فيه لحد ما بقى يدخلك أرباح وانت نايم . والمرحلة دى مبيوصلهاش غير اللى تعب جداً فى بدايته ومستسهلش ومجريش ورا الربح السريع اللى أكيد مش مضمون ولا يعتمد عليه ” لوحده “
 
أنا مش ضد إنك تخوض تجارب مبتقدمش قيمة حقيقية للناس بغرض الربح فقط وانا عن نفسى نفذت أفكار زى دى كثير لكن دائماً بجانب شغلى الأساسى عشان كده متقنعنيش انك معندكش أى شغف نفسك تحققه معندكش أى طموح معندكش أى رغبة فى ترك بصمة فعلاً فى الحياة دى أصل كلنا وجدنا لسبب ما فـ لو حياتك فاضية دلوقتى مش معنى كده انها لازم تفضل فاضية لحد ما تموت .
 
متضيعش نص عمرك بتجرى ورا حاجة مبتحبهاش ولا بتفهم فيها عشان فى الأخر نجاحك فيها عمره ما هيستمر لان ببساطة شديدة مفيش مدرس بقى لعيب كورة عشان فلوسها حلوة ومفيش مهندس بقى مغنى عشان فلوسها سهلة .
– – – – – – – – – – – – – – – – – – – – – – – – –
عايز أقول نصيحة للناس اللى نفسها تنجح فى الديجتال ماركتنج
وبتحضر إيفينتات وبتاخد كورسات سواء منى شخصياً أو من غيرى
 
متكتفيش باللى بتسمعه من أى حد لو فضلت بتطبق اللى بتسمعه بس
عمرك ما هتحقق حاجة والأمثلة كثير لناس ضيعت شهور وسنين
حضرت فيهم عشرات الكورسات والإيفنتات والمحصلة صفر
 
أفضل خبرة هتكسبها فى مجالنا ده هى من تجاربك الشخصية
الـ Case studies ما هى إلا مجرد ضوء فى أخر النفق
لازم هتمشى النفق كله عشان توصل وهتمشيه لوحدك على فكره
 
لا أنا ولا غيرى هيبقى معاك فى أى خطوه بتمشيها ا
 
عشان كده إسمع المعلومة والتجربة وإبنى عليها وطورها
إبنى تجربتك الشخصية اللى بعد فترة تقدر تقف تحكيها للناس
طوّر من نفسك وشغلك عن طريق غلطاتك إنت مش حد تانى
 
إحضر إيفنتات وخد كورسات زى مانت عايز بس متفضلش
طول حياتك رد فعل منتظر الـ Copy عشان تعمل Paste
خليك صانع للحدث مش مجرد متابع
– – – – – – – – – – – – – – – – – – – – – – – – –
زمان فى 2006/2007 الشغل فى المجال ده كان سهل جداً كان 1+1 يساوى 2 وكان اللى يعرف يعنى ايه Backlinks بيعمل فلوس زى الفل واللى بدأ أى موقع ساعتها ومكمل لحد دلوقتى بقى مليونير
 
ده كان زمان حالياً نظراً إن المجال إتطور بشكل كبير جداً وبقى الموضوع مش مجرد SEO أو حبة باك لينكس بقى الشغل نوعين ، نوع ” عيشنى النهاردة وموتنى بكرة ” وده نوع كلنا عدينا عليه على الأقل مرة فى حياتنا والنوع التانى ” يلا نبنى Business “
 
النوع الأول بتاع إدينى رمضان ” إدينى باك لينكس ” إرمى أى كلام فى أى موقع وهات باك لينكس كثير … كثير أوى من كل حتة ومن أى حته وجوجل أدسنس معيشنا زى الفل المشكلة هنا إن النوع ده مبيتطورش ، يعنى زى ما قلت كلنا مرينا عالمرحلة دى ، كلنا بندور عالفلوس بشكل أو بأخر ، بس منين وإزاى هو ده السؤال .
 
يفترض اللى إحنا بنعمله ده هو شغلنا الشاغل فـ لما يبقى شغلك الشاغل مدونة مجانية بتنشر صور هيفاء وهبى ولا مدونة بتشتغل الناس بأخبار وهمية عشان تجيبهم من على الفيس بوك يدوسوا عالإعلان ويخرجوا ، يبقى إنت فى قاع القاع يا صديقى و مفيش حاجة زى دى إستمرت أكثر من سنة او اتنين بالكثير .
 
يعنى فى ناس مننا حالفها الحظ وإتأسست صح وفهمت الديجتال ماركتنج من منظور عام وشامل بداية من الـ Branding و الـ Content Promotion مروراً بالـ Outreach والـ Backlinks وكمان فهمت يعنى إيه Social Engagement وازاى تبنيه ، وابتدت تتعمق بقى الـ Analysis و تفهم يعنى ايه Conversion rate optimization و فى مننا اللى خد التراك ده لأخره وابتدى يطور كمان طبقاً لحاجته الشخصية .
 
مينفعش يبقى بقالك شغال على الإنترنت أكثر من سنتين 3 ولسه مبدأتش Business ما ، حتى لو كان مدونة شخصية بإسمك بتنشر فيها أرائك أو خبراتك وبتشتغل ما يعرف بالـ Personal Branding حاول تبص للى بتعمله وبص للى باقى الناس بتعمله ، إنت عارف إنك ممكن تتعاقب فى أى لحظة وعارف إنك شغال ” شمال ” سواء on أو offpage عشان كده متريحش أوى على العك وتفتكر إنه بيدوم صدقنى ما بيدومش ومعظمنا مر بالتجربة دى قبلك وخد عز عزها أيام ما كانت الصفحة الأولى مبتاخدش فى ايد الواحد 3/4 أسابيع .
 
بس فى الأخر الحنفية بتتقفل وهى من وجهة نظرى طبيعة كونية 😀 ، كونك بتعك وبتاخد رزق غيرك ده مبيدومش كثير ومهما طال مسيره يخلص ، وهتكتشف انه لما يخلص انك ممعكش فلوس 😀 ومحتاج تبدأ من الصفر .
 
فـ إختصر على نفسك وقت وإبدأ من دلوقتى .
– – – – – – – – – – – – – – – – – –
الـ CTR لما يوصل لـ 20% ممكن تعمل اى حاجة …
 
من سنة إتعرفت على واحد إسترالى من WarriorForum كان عنده Niche فى نفس المجال اللى انا شغال فيه ، المهم فضل يقاوح فيه فترة ومكانش عارف يطلع منه أرباح لأنه محتاج نفس طويل شوية فسابه ، متكلمناش فترة كبيرة المهم فتحت سكايب من أسبوع لقيته اون لاين اتكلمنا شوية عن الشغل والجديد .
 
لقيته بيحكيلى إنه بقاله 8 شهور شغال على موقع بيدخله حالياً ما يقرب من 15 ألف دولار فى الشهر من أدسنس ، فالفضول طبعاً خلانى أساله على مجال الموقع فإتضح إنه موقع Downloads لبرامج ، فطبعاً الفكرة مش جديدة فبردوا أكيد فى حاجة تانية اللى بتدخل المبلغ الكبير ده ورانى الموقع وشرحلى فكرته بالتفصيل وبصراحة كانت عبقرية .
 
هقولها للى حابب يجربها على مسؤوليته الخاصة
هو عامل موقع بيقدم فيه برامج كاملة ، طبعاً الموضوع ده مخالف لأدسنس ، وفكرة إنه ينزل برامج مجانية هيبقى صعب جداً إنه ينافس عمالقة المجال ده زى softpedia و cnet وغيرهم عشان كده قرر انه يتجه للبرامج الـ Cracked بس هو بمنتهى الوضوح مبيكتبش كلمة cracked أو سيريال نهائى داخل الويب سايت أو فى عناوين الصفحات .
 
كل اللى بيعمله إنه بيعمل صفحة لكل برنامج في عنوانها كلمة Full Version دائما و وصف وسكرين شوتس من جوه البرنامج زى أى موقع عادى وعشان تحمل البرنامج بتسجل أكونت فى الموقع بإيميلك ، والبرنامج اللى انت عايز تحمله بتدوس على زرار مكتب عليه Send Me Download Link
 
هو بيبعت لليوزر لينك الداونلود للبرنامج كامل على الإيميل بس من على External server مش سيرفر الموقع اللى هو شغال عليه بالتالى هو هنا بيتحايل على قوانين أدسنس بإنه مش بيعمل هوست للفايل على السيرفر بتاعه والمحتوى كمان مفيش فيه حاجة مخالفة ومفيش أى عملية تحميل بتتم من على الموقع للبرنامج وفى نفس الوقت معاه حالياً ميل ليست فيها فوق الـ 650 ألف سبسكراير اللى هما يوزرس الموقع .
 
الموضوع ده فى مواقع كثير بتعمله فى مجالات مختلفة زى موقع offliberty.com مثلاً وإنه بيستخدم أدسنس فى محتوى ليه حقوق زى الأغانى أو الفيديوهات اللى بتتحول على موقعه ، بس هو بيعملها هوست على سيرفر تانى غير السيرفر اللى هو شغال عليه وبالتالى الفكرة نوعاً ما ناجحة بس بردوا أكيد فيها خطورة .
 
أخيراً : الفكرة فى مواقع الـ Downloads
إن الـ CTR فيها بيوصل أحياناً لـ 15 و 20%
لأن اليوزر مش داخل يدور على محتوى
هو داخل يدور على زرار يدوس عليه عشان يحمل
بالتالى ده يوزر أصلاً الـ Behavior بتاعه إنه داخل يـ Click
 
* الفكرة فيها Risk كبير ولو هتجربها يبقى على مسؤوليتك
– – – – – – – – – – – – – – – – – – – – – – – – –
 
أحمد عزت
.
.
هل ساعدك هذا المقال ؟

مقالات ذات صلة

اترك تعليقك !