لما جيت أبدأ سيو صح معملتش سيرش على إزاى اكسب من الانترنت ، الموضوع كان طموح شخصى ورغبة فى تقديم حاجة مختلفة عن الموجود وكنت مبسوط وأنا بسهر كل يوم للفجر أكتب مقالة جديدة وكنت بتعب عليها جداً عشان تبقى حاجة مميزة أى حد يقراها يشوف الفرق ما بينها وبين أى حاجة تانية ، حتى لو مكانش في حد بيشوف الموقع أصلاً ساعتها !
عشان كده انا مقتنع تماماً ان اللى بيعمل اى حاجة وكل اللى بيفكر فيه الفلوس بس ، مبيكملش فيها أكثر من شهرين تلاتة وشوفت أمثلة كثير قدامى كده وفى اللى مكملش أسبوعين تلاتة على بعض .
لو وقتك بيضيع فى حاجة انت مش حاببها ، بس عشان فلوسها ، مستحيل تكمل فيها لما الدنيا تشد عليك وتبتدى تختبر ارادتك وقوة تحملك .
بالتالى أنا بنصح أى حد لسه بيبدأ او شغال على حاجة دلوقتى شوف اللى تضيع فيه وقتك ومجهودك وانت مبسوط وعادة دى هتبقى حاجة واحدة او حاجتين بالكثير ، دورك انت تدور عليهم وتمسك فيهم وتديهم كل وقتك ” هما بس ” متعملش معاهم حاجة تانية ، عشان شوفت واحد صاحبك ولا واحد عالنت بيكسب منها او ناجح فيها .
وأخيراً أى كان شغفك ايه وبتحب تعمل ايه خليك واثق انك لو عملت اللى بتحبه ده بكوالتى عالى أوى هتلاقى جمهورك وهتلاقى نجاحك الشخصى ويليه الفلوس اللى اكيد مهمة ومينفعش تنساها ، ولو عايز إثبات عملى على الكلام ده خد من وقتك 3 دقائق شوف المقالة دى : http://goo.gl/I3c5JN
– – – – – – – – – – – – – – – – – –
فى معظم الأوقات سبب فشل أى مشروع جديد بتكون الدوشة اللى حواليه والدوشة دى هى بإختصار شديد كثر الكلام والأراء اللى عكس بعضها والإقتراحات اللى كل واحد بيبقى شايف إنك لو طبقتها هتنجح فى حين إن معظم الإقتراحات دى بتبقى نتيجة معلومة هو قراها او فكرة جاتله وهو نايم عالسرير فقرر يشاركك بيها على أمل إنك لما تطبقها وتنجح يقول إن هو اللى قالهالك .
وعشان أتكلم على الحاجة اللى انا بفهمها كويس لو عندك مشروع بزنس جديد عالإنترنت قبل ما تبدأه حدد ليه هدف ومصدر مساعدة واحد بس مصدر المساعدة ده ممكن يبقى شخص بتثق فيه وعارف إنه عنده تجربة فى مشروعك قبل كده ، ممكن يبقى موقع معين وممكن يبقى كورس هتطبق اللى فيه إلخ ..، ليه بقول كده لأن إحنا اللى شغالين فى المجال ده كل واحد فينا عنده ما لا يقل عن 500 بنى أدم فى حسابه كل واحد مر بتجربة شكل وفى اللى نجح وفى اللى فشل لو بس لـ لحظة قررت تسمع لكل واحد وتجرب اللى بيقوله هتضيع من وقتك كثير جداً بتجرب حاجات مش بتاعتك ومش ليك أصلاً ، ممكن بعضها ينجح لكن الأغلب هيفشل .
أسوء حاجة ممكن تعملها فى نفسك فى المجال ده إنك تسمع لكل الناس وتطبق كل اللى بيتقالك خصوصاً لو لسه بتبدأ ، طبيعى إن كلنا بندور عالمكسب وعالعائد الأكبر منين ، بس خد بالك المكسب ممكن ييجى بمليون طريقة ، بس من المليون طريقة دى إنت مش هيمشى معاك غير طريقة واحدة ” طريقتك إنت ” وطريقتك دى عادة هى الحاجة الوحيدة اللى إنت عندك إستعداد تضحى بنومك ، وقتك ، صحتك فى سبيلها ، مش الحاجة اللى بتشتغلها وإنت مخنوق ونفسك تخلص بأى طريقة .
أنا فى الأون لاين تحديداً تقريباً إشتغلت فى كل حاجة ، بداية من ترجمة الأفلام أون لاين ، مروراً بالمنتديات العربى والأجنبى ، خدت من وقتى فترة كبيرة أتعلم برمجة Apps للأندرويد وطبقت حاجات بسيطة منجحتش ، إشتغلت على Niches لا حصر لها فى اللى نجح منها وفى اللى فشل ، جربت أشتغل Viral Content فترة وأعتمد عالـ Social Channels وملقتش نفسى فيه ، إشتغلت فى الـ Consulting والـ Training جوه وبره مصر ، كل الطرق دى لو واحد ركز فى واحدة بس فيهم هيقدر يقدم حاجة للناس وفى نفس الوقت يكسب كويس . بس لو أنا جيت أقولك إشتغل فى الـ Consulting ده فى عملاء أجانب فى بعض المجالات الكبيرة بياخدوا الـ Consulting Session بـ 5 ألاف دولار ، وروحت إنت قررت تبدأ فى المجال ده وإنت مش حابه ومعندكش خبرة فيه أصلاً ، أولاً مش هتحقق حاجة وثانياً هتكره المجال وهتروح تدور على حاجة تانية تعملها .
حدد دائماً هدف عايز تحققه ومتخليش هدفك الفلوس
الفلوس هى دائماً نتيجة تحقيق الهدف
الهدف ممكن يبقى إفادة الناس وإن إسمك يتعرف فى مجالك
الهدف ممكن إنك بعد ما تنجح فى مشروعك تهاجر تعيش برا
الهدف ممكن يبقى إنك تبدأ Life Time Business
يخليك متشتغلش تانى طول حياتك عند حد .
كل دى أهداف وغيرها كثير نتيجتها الطبيعية هى الفلوس.
أسف إنى طولت عليكم بس يمكن الكلام ده هيفرق مع ناس مشتتة جربت 100 حاجة ولسه مفيش حاجة نجحت معاها بسبب الكلام اللى انا قولته فى البوست ده
– – – – – – – – – – – – – – – – – –
عادة معظم اللى شغال أون لاين وبيفكر إنه يبدأ مشروع جديد أو فكرة جديدة بيبقى عايز يبدأها ” بأفضل شكل ممكن ” وتوضيح لأفضل شكل دى إنه عايز أفضل Web Host وعايز أفضل Template لو مكانش متصمم مخصوص لموقعه ، وفى اللى فكرته محتاجة Development دقيق جداً والموضوع مش هيتم غير لو البرمجة تمت بالشكل اللى هو متصوره 100% ، وفى اللى مستنى يجمع تيم كامل عشان المحتوى ، وفى اللى مستنى الفلوس تكمل عشان الإعلانات اللى هيصرفها وفى اللى مش عايز يبدأ غير لما شريكه يكون جاهز إلخ …
معظم التجارب الناجحة ” للأفراد ” مش الشركات أو المستثمرين ، بتبدأ بـ Prototype مجرد نموذج صغير للفكرة بالإمكانيات المتاحة فى وقتها ، بالتمبليت المتاح وقتها ، بالهوست المتاح وقتها ، بالبرمجة البسيطة اللى تقوم عليها الفكرة من غير bugs ، بتيم الكونتنت اللى مفهوش غيرك دلوقتى ، بالـ 50 دولار اللى معاك عشان الإعلانات إلخ …
بكتب البوست ده عشان أنا ضيعت من عمرى شهور وسنين مستنى بعض الأفكار توصل لمرحلة الكمال ويتوفرلها أفضل ظروف محيطة من كل العوامل اللى قولتها دى وأكثر ، والحقيقة إن ده عمره ما حصل لحد النهاردة ، بس كل مرة بدأت بالمتاح الفكرة إتطورت بشكل أسرع مما كنت متخيل ، لأنك بعد ما بتبدأ بتكتشف ان الفكرة عشان تنجح هتنجح بالمجهود اللى هتقوم بيه مش بالظروف والإمكانيات اللى هتهيئها ليها فى البداية وإن كانت ” مهمة ” أكيد ، لكن لوحدها مبتنجحش فكرة .
فنصيحة لكل واحد مستنى الظروف تتحسن والإمكانيات تتوفر ، إبدأ بالمتاح بس أهم حاجة تحرص عليها هى الأساس السليم ، عشان لو الفكرة نجحت تقدر تطورها ، يعنى أنا بتكلم على الأساسيات اللى تقدر الفكرة تقوم عليها من دومين و Shared Hosting إلخ … طبعاً الحاجات دى أحياناً بتبقى غير متوفرة برده للبعض فى البداية ، ده ميمنعكش إنك تبدأ بـ Free Test ، يعنى مدونة على بلوجر أو وورد بريس على سبيل المثال ، ولما هتعمل كده لازم تعرف انك بتاخد خبرة أكثر ما بتدور على نجاح كبير ، لكن حتى الأفكار اللى بتبدأ بشكل مجانى بتحقق نجاحات كبيرة أحياناً لو فعلاً صاحبها تعب عليها .
ويمكن من الأمثلة اللى شغالة بشكل مجانى ومحققة نجاح كبير جداً هى البلوج دى : https://baltagy1.blogspot.com.eg/ وطبعاً اللى شغالين عليها بيقدموا فيها محتوى مش بيتقدم مكان تانى من برامج Cracked وبورتابل فى نفس الوقت .
لو وصلت لحد هنا أنصحك تشوف المقالة دى لأنها هتغير تفكيرك بشكل كبير جداً عن الشغل أون لاين والنجاح فيه :
– – – – – – – – – – – – – – – – – –
معلومة صغيرة كده بس يمكن بتعدى على ناس كثير شغالة اون لاين
لما تعمل أى باك لينك فى أى حته فى الدنيا إبقى دوس عليه وادخل على موقعك
فى 95% من الحالات انت بتبقى دخلت الموقع ده من على جوجل و الـ bots بتاعة جوجل دخلت الموقع وراك تتابع الـ session بتاعتك وتقيمها فبمجرد ضغطك على اللينك اللى انت عملته بتضمن بنسبة 99% إن الباك لينك ده هيتأرشف وهيتحسب فى أقرب وقت .
– – – – – – – – – – – – – – – – – –
فكرت فى أهمية الـ Host قبل كده ؟
مكان الـ Data Center اللى عليه موقعك بيفرق فى ترتيبه فى السيرش وتفضيل جوجل ليه عن باقى المنافسين وبدون كلام مرسل كثير موقع يلا كورة بيستخدم الداتا سنتر بتاعة شركة Link Development اللى فى طريق مصر حلوان الزراعى ، بالتالى هو أكبر موقع رياضى فى مصر ومن أكبر 3 مواقع رياضية فى الوطن العربى ، فى المقابل هتلاقى فى الجول بيستخدم سيرفرات شركة إسمها Rackspace وده فارق معاه شوية فى سرعة التحميل وترتيب نتائجه فى مصر والوطن العربى .
جوجل من فترة كبيرة وهو بيستخدم الـ Localization فى نتائجه ، يعنى لما تدور على أفضل مطعم سمك وانت بتستخدم جوجل مصر ، مش هيطلعلك نتيجة لمطعم سعودى ودى ببساطة هو عرفها من الأى بى بتاعك ، فكمان هو بيحاول يقدملك أقرب النتائج ليك عشان تجربة البحث بتاعتك تبقى دائماً مميزة ، ومفيش أقرب من سيرفرات حلوان بالنسبة لك وانت جوه مصر ، ملحوظة أخيرة اماكن السيرفرات بتفرق وبتأثر لكن مش هى العامل الوحيد اللى بيخلى موقع يتفوق على موقع تانى لكنه عامل مساعد لما تبقى بتنافس على مستوى كبير زى يلا كورة ومصرواى وفى الجول وغيرهم …
– – – – – – – – – – – – – – – – – –
أحمد عزت
.
اقرأ أيضاً: موقع سيو صح – قصة نجاح احمد عزت في شغل المواقع
.
هل ساعدك هذا المقال ؟
1 تعليق
لطالما ابهرتنا اخي احمد بمواضيعك الجد مميزة و رائعة اتمنى ان تعطينا مزيدا من ابداعاتك و شكرا لك