الرئيسية » أعرف » عاهات وتقاليد » ولد وبنت = شهوة !! – في مصر

ولد وبنت = شهوة !! – في مصر

بواسطة عبدالرحمن مجدي
2706 المشاهدات
ولد وبنت = شهوة !! - في مصر

ولد + بنت = شهوة !!
قاعدة مشهورة ان #البنت عورة … #الولد حيوان !!

دي النظرة السائدة للمجتمع وبالذات في الطبقات الإجتماعية المتوسطة والفقيرة في مصر .. وبالذات العقليات التي تنظر أن هذا دين وأخلاق !!

لدرجة بقا الولد والبنت بيتكهربوا اول لما يتكلموا مع بعض..
مش كهربة حب !! .. ياريت حـب !
كهربة شهوة ، نظرة الناس ،خوف ، قلق ، توتر ، …

دا .. اسمه قرف .. أنا كولد بيحس تعالوا احكي لكم حكاية بسيطة ..

كنت بكون قرفان من نفسي بسبب 3 حاجات …
1- من اول 6 ابتدائي .. وكل حاجة بدأت تتغير .. ” أنا حيوان ” لابد ان اتقبل بهذا .. أصحابي بدأوا … !!

1- من اول 3 إعدادي … بقيت بقسم أي أنثي .. لجزئين .. جزء من رقبتها لفوق .. وجزء من رقبتها لتحت .. والأهم من رقبتها لتحت ! .. انا اصلا مش ببص غير علي الجزء دا !! والأنثي بالنسبة لي تمثل هذا الجزء فقط !! … اتحولت ليه كدا ؟!!

3- أني أسلم على اي أنثي أحس بإثارة ” شهوة ” … حتي بنات خلاني !!! .. حتي زوجات خلاني !! وأي انثي اسلم عليها احس بكهربه وشهوة! … ايه الى بيحصل فيا دا ؟!! ازي اتحولت لكدا؟!! أنا مكنتش كدا خالص !!

أنا لقيت نفسي بتحول من إنسان من قمة السعادة والسكينة والفرحة … ايام ابتدائي …لإنسان كئيب جداا حزين جداا .. وإني حيوان متحرك .. والمجتمع كله بيعاملني كدا !! .. ويقولي لي هذا دين !!!!

طبعا اتخبطت جامد ..صرخت كتيييير أوي وبكيت وخبطت راسي في الحيطان وفكرت كتير في الانتحار وحاولت فعلاً .. بس صعبت عليا نفسي فأخترت الحياة .. فالطريق الوحيد قدامي الإلحاد .. الدين كان يمثل لي كمية أموار ونواهي وجدت فقط لكي أعيش حياتي في جحيم لا نهاية له !!!

جات لي فكرة هبله … وإني اقول للناس .. للأفكار الى وصلت لها .. أن الحياة برا الدين أحسن لأني حسيت براحة كبيرة أول لما أخدت القرار دا .. وكنت عاوز اناقش الفكرة دي مع رجال دين او مسلمين اصحابي من الأزهر او ….. ونتحاور ونتناقش قال! … الحمد لله .. صوت خفيف حدثني بداخل قلبي ♥ .. قال لي إلزم بيت جدتك … قدامك الكمبيوتر والنت وعقلك وقلبك .. والحمد لله اتبعت هذا الصوت … لأني أكيد لو كنت خرجت للمسلمين .. أكيد وبنسبة 100% كنت زماني دلوقتي ملحد 100%… الحمد لله إني اخترت العزلة والصدق مع قلبي وروحي والصدق في طلب الحقيقية المطلقة .

قعدت 2 أسبوع .. للبحث فقط عن حقيقة كل شيء
وأهم خطواتها .. أنا طفل حر .. أنا مش مسلم ولا سني ولا شيعي ولا مسيحي ولا هندوسي ولا بوذي ….. انا طفل … خلقت عارياً.. هم من أختاروا لي ديني …. المهم فيها تفاصيل كتير الحته دي سيبك منها… تعالوا نكمل في موضوعنا الأساسي .

أنا تعبت اوي من الجزيئة دي في حياتي وأي شاب بيتعب جدا بسببها ..التربية كانت غلط اوي ..والمجتمع حقير !!
#الزنا سهل جدا ..انا في اعدادي !! اه والله سهل وكل لما اكبر بيكون أسهل
#اتكلم فقط مع بنت !!صداقة !! حلم بيجمعنا !! لعب!!مشاعر !! صعب جدا !

ممكن : ولد + بنت = فكرة.. فريق.. حلم.. هدف… حب.. صداقة..
اه طبعاً ممكن.. بس مش في الطبقة الإجتماعية بتاعتك !! ليه!! حرام !! ليه !! خوف من كلام الناس!! ليه !!

أنا الآن كولد .. مش حيوان .. وروحي تنقفل علي نفسها كالقوقعة ؛ أمام كل من يعاملني كذلك.. أنا مش كل الى فى دماغي من البنت .. شهوة ومش نظرتي ليها نظرة شهوانية بحتة !!

انا ولد … بشعر بالقرب والتجاذب الفطري قبل الشهواني للأنثي
فكروا يا قوم .. الكلام دا لقوم يتفكرون ! ..
أنا كـولد :
بحب امي اكتر ليه ؟ .. شهوة !!
بحب جدتي ليه اكتر ؟.. شهوة !!
لما بشوف أطفال .. بـميل أكتر للطفلة الأنثي .. شهوة !!
فطرة … مش شهوة ! .. يا بشر.. أفلا تعقلون !

قصة واحد صحبي … من ابتدائي متحرم عليه يكلم بنات.. لحد الثانوية لانه كان فى أزهر.. وكان شايف أنها حرام بجد !!.. وبعد الثانوية دخل معهد تبع التعليم العالي

وفي الأجازة بيكلمني وبيقولي ..
“وهو مبتسم وسعيد.. انا فرحان أوي اني كونت صداقات مع بنات وفرحان بطريقة معاملتهم ليا !…وكان في البداية كلامه وحش اوي مع البنات وخبط جامد فيهم كذا مره .. بس هم عقلهم كبير وقلبهم نضيف وراقي.. وهو كمان معجب بواحدة .. وقالي بالنص ” عرفت الفرق بين لما اتكلم مع بنت صديقة فقط والبنت الى انا معجب بها !!
والله العظيم قالي كدا بالنص .. عرفت الفرق !!!

#الولد دا قبل ما يسافر القاهرة للمعهد السنة الى فاتت..
قفل النت كله من البيت .. عشان اخواته البنات ميكلموش ولاد على الفيس !! .. وكان بيتخانق معاهم كتيير .. وساعات بيوصل الأمر للضرب !!

هو طبعا مش عارف ايه سبب السعادة الي هو فيها .. وايه سبب سعادته وراحته .. وحبه انه يقعد هناك السنة كلها !!.. دي حتة نفسية ..
—-
لما الولاد كلها تبقي محترمة وتبقي مؤدبة ويعقلوا ..
“أنثي” ابقي اتكلم معاهم..
“ذكر ” اسمح لأختي او بنتي انها تتكلم مع ولاد عادي..

شـاب : متعملينيش كحيوان … وبعد كدا عاوزاني أعاملك كويس !!

أنا هارد عليكي واقولك : مش هايعقلوا … اتعاملي كويس واختاري مين الي يقرب ومين الى يبعد .. وتعاملك مع الكويس والوحش هايديكي خبرة ..

أنا جوايا شهوة ومشاعر حب عميق لإنسانة واحدة بس + ميل فطري لأي أنثي ككائن حي … كجنس مختلف عني .. كصداقة ..
انا مش شهوة بس .. حتي الحيوانات بتحس وبتبكي وبتحب .
حتي الحيوان معندوهمش علاقات عشوائية … زي ما علمونا ..!!
بيكون ليها قوانين .. أنا سمعت كدا من أفلام وثائقية عاملها علماء فى الغرب
—-
رسالة من شاب .. لـ بنت
انا عملت لك ايه ؟ ولا طلبت منك ايه ؟ لما اطلب منك حاجة حرام بجد وانتي عارفها ايه هي كويس .. ابقي ابتعدي عني ومش تتكلمي معايا تاني ؟

وانا لو عاوز اعمل حاجة غلط .. والله هاعلمها وهاظهر قدامك بتكسف وخجول لما اكلم بنات واني مؤمن ومتدين .. ويوم ما هاتجوز ..هاتجوز بواحدة متدينه أوي في عين المجتمع…
—–
وانا بقول يكون فيه كلام وصداقة .. بين الولد والبنت في كل مراحل حياتهم… عشان يحصل اتزان للطرفين أولاً …وثانياً المجتمع يكبر والمشاريع والأعمال التجارية تكبر … وثالثاً يختاروا شخص فعلاً مناسب ليهم عند الزواج

لان مش هاعرف الأنثي غير لما اتعامل مع الانثي .. والعكس صحيح
لا الكتب هاتفهمك الجنس الآخر ولا الأفلام الأجنبي ” Twilight , …. ” العالم الخيالي !! هايفهمك الجنس الآخر .

عشان الاتنين يفهموا بعض .. ويفهموا أنفسهم أولاً… وعشان تختار الأفضل ..
وعشان الراجل يتعود يبص للأنثي كـقطعة واحدة .. ويتعامل معها ويحترم عقلها وقلبها

—-
أين الغيرة يا أخي ؟ اتقي الله ؟ … هل انت ديوث ؟ أترضاه لزوجتك؟! أترضاه لأبنتك؟! ..هل تدعها تتحدث مع رجل أجنبي ؟!

أنا : اه والله هارضاها 🙂 ..ليه .. هاربيها علي الحـب بجد .. أغلب تواصلي مع زوجتي او بنتي هايكون تواصل مع الروح وليس الجسد !

#نصيحة للشعب الشهواني بطبعه…

مش كل رجل هتلاقيه واقف مع اختك ..فيه بينهم علاقة جسدية !!
مش كل رجل هتلاقيه واقف مع زوجتك ..فيه بينهم علاقة جسدية !!
مش كل رجل واقف مع أنثي … فيه بينهم علاقة جسدية !!
ومش معني ان اغلب المجتمع بينظر للموضوع كدا .. يبقي دا صح !

أحمد زويل او غيره ممن سافروا للدول الغربية تعرف علي أصدقاء أجانب .. أصدقاء ذكور وأناث.. يتحدث معهم وقد تصل الصداقة للدردشة علي الميل والتليفون الشخصي… هل تجزم أنت ان بينهم علاقة جسدية ؟!

#ارتقوا_يرحمكم_الله
——
على فكرة الأسلوب الى بتتعامل بيه الأم او الأخت مع الولد .. بتربي رجل مش بيعرف يحب حد ومش بيحس بحد … رجل شهواني من الدرجة الأولي .. رجل شهواني جسدياً وفكرياً .. الحب بالنسبالة امتلاك للآخر وأوامر وتحكم … وطبعا شك مستمر .. تحت مبرر الغيرة والرجولة !! ..

هي بتبقي غيرة حمقاء ، غيرة مرضية … بعد كدا الأنثي روحها تذبل وتموت .. قلب الراجل بيحس بكدا طبعاً .. فبيدخل يتفرج علي الأفلام الأجنبي يري الأنثي مشرقة مبتسمة … فيري نساء الكرة الأرضية كلها حلوين إلا مراته أو أخته .. لانها تعتبر ميتة في نظره .. جسمها بس الى عايش معاه .. والأسرة يزداد التفكك بينهم أكثر وأكثر وتخرب !!!
——————
في اختيار شريك الحياة …
المشكلة فى الوسط الاجتماعي بتاعنا اني أنا مش بقدر اشوف جمال روح البنت دي .. : الصراحة ، التلقائية ، الوضوح،..أشياء نفتقدها وكمان هي #حرام
فانا مضطر اني اشوف خارجها وشكلها بس …وبعد كدا اقولها بحبك !!!
ازي دا اسمه حب ! .. حبيت ايه فيها ؟ المظهر ؟!!

يا صديقي : حسن المظهر كالفلفل، حار في البداية لكن سرعان ما يفقد لسعته الحارقة..
أقرأ هذا الموضوع : أجمل إمرأة !
——————
أنا عن نفسي والله حاولت كتييييييييير ومعرفتش
بحس اني بكدب على نفسي … فرجع في كلامي ومش بحب اقولها للبنت الى اعجبني مظهرها فقط !
——————
الترتيب المنطقي بالنسبة لي في الزواج
حـب .. عشق .. خطوبة .. زيادة الحب والعشق.. زيادة الإنتماء بين الطرفين .. جواز .. حياة
الجنس يأتي أخيراً .

غير كدا صدقيني في الأغلب بنسبة 90% من وجهت نظري .
هايرتبط بيك أو بيكي شخص …أما وحش أو محترم ولكن غير مناسب لروحك .

بصوا ..انصحكم بمشاهدة الفيلم العربي “لا مؤاخذة “… أول مرة في حياتي أحترم فيلم عربي بجد … الفيلم دا منع من العرض سنة 2008 .. وسمح به السنة الماضية..
—————
أخيراً أختم بكلام الله عز وجل …

بسم الله الرحمن الرحيم
“وَمَا يَتَّبِعُ أَكْثَرُهُمْ إِلَّا ظَنًّا ۚ إِنَّ الظَّنَّ لَا يُغْنِي مِنَ الْحَقِّ شَيْئًا ۚ إِنَّ اللَّهَ عَلِيمٌ بِمَا يَفْعَلُونَ ” –
“وَإِن تُطِع أَكثَرَ مَن فِي الأَرضِ يُضِلُّوكَ عَن سَبِيلِ اللّهِ إِن يَتَّبِعُونَ إِلاَّ الظَّنَّ وَإِن هُم إِلاَّ يَخرُصُونَ ” –
صدق الله العظيم

زي الناس الى بتشكك في علم الطاقة الحيوية وقبله قانون الجذب ووو…

واحد يطلع يقولك دا حرام …
تجد جيوش تنشر وتقول ان هذا حرام لنصرة الدين !

تسأله بالعقل .. ياعمي دا حرام ليه ؟
يقولك اهو كدا خلاص .. وممكن يجيب لك آيات وأحاديث لا توجد علاقة بينها وبين هذا العلم او الفكرة الي هو شايفها حرام !!

يا عمي دي ناس تأملت وتفكرت وعملت ابحاث ودراسات في اكتر من بلد وصرفت ملايين الدولارات … هو اي كلام وخلاص …
اه صحيح نسيت … حرام بمجرد النظر ههههه
————————–
هل تقول ان عادات وتقاليد المجتمع في التعامل بين الولد والبنت صح ؟
وفكرته عن العلاقة الحميمة صح .. وهي لا تخالف شرع الله ؟

أعطوني دليل … أو رجاءاً اصمتوا .

أعطيكم انا أدلة كثيرة :

1- الرجل المصري ينشأ علي الأفلام الإباحية .. بنسبة تزيد عن 99%
منهم من يخرج من هذا العالم .. ومنهم من يستمر بعد الزواج وانتم تعلمون .

2- أغلب الشباب والفتيات …يمارسن العادة السرية بشراهة ! ، وأغلبهم حياتهم = أكل وشرب ونوم وانتظار الزواج للتكاثر!

3- الشاب المصري ينشأ علي السجاير والحشيش كأشياء أساسية في حياته ..للهروب ضغوطات المجتمع بما فيهم ذلك الأمر ..

4- 40% من الزواجات تنتهي بالطلاق من السنة الأولي !!
وباقي الـ 60 % أنتم تعلمون .. ان الأغلبية منهم يعيشون مع بعضهم البعض قهراً …
الرجل : أنا مش معايا المؤخر ومش معايا فلوس اتجوز تاني واهي جوازة والسلامة..
الأنثي : ضل رجل ولا ضل حيطة
(طبعاً أنا لا أحث المتزوجين علي الطلاق .. لان فيه حلول كثيرة لحل مشاكلهم .. أهمها القراءة والغوص في الروح .. وانا تطرقت بالفعل في هذا المقال عن : كيفية تحقيق السعادة الزوجية ؟ ، وسوف أغوص اكتر واكتر في أعماقها وسأقدم لكم أقوي المقالات في هذا القسم : السعادة الزوجية بإذن الله .. لسعادة زوجية حقيقية.. ولكن ان وجدت خلافات كبيرة .. فالأفضل الطلاق ولكن طلاق بإحسان !)

5- طول عمري بسمع الآية دي من دينكم .. قال تعالي “الطلاق مرتان فإمساك بمعروف أو تسريح بإحسان …”
لا بشوف إمساك بمعروف !! ، ولا تسريح بإحسان !!
بشوفها في الغرب الكافر بدينكم .. بشوفها في الغرب الذي يكتشف كل ما هو عميق في دينكم … الغرب الذي يصلح في الأرض

كفاية كدا … النتائج السلبية ، تكفي كتب وكتب والله العظيم .

لا يعيش الإنسان في جحيم ، وغيره يعيش في نعيم .. عبثاً
ربنا خلق الدنيا دي كلها بمقادير وقوانين شديدة الدقة وعادلة جداا

لن تميزك لأن دينك كذا ، او مذهبك كذا ، أو طريقة لبسك كذا أوكلامك!… الخ

عبدالرحمن مجدي

هل ساعدك هذا المقال ؟

مقالات ذات صلة

2 تعليقات

حسن 19 يوليو، 2015 - 10:06 م

مرحبا اخي اتمنى تكتب بالغة العربيه الفصحى مع احترامي لك

رد
Aboda Magdy 20 يوليو، 2015 - 5:11 ص

حاضر أخي .. سوف أقوم بنشر باللغة العربية الفصحي .. حالياً أنا فقط أنقل مقالات قديمة تم نشرها من سنة لأنني قمت بتطوير الموقع .. فحالياً انا انشر مقالات قديمة … بعضها مكتوب العربية الفصحي وبعضها بالعامية المصرية … أوعدك بعد أن انتهي من نقل المواضيع القديمة .. أي موضوع جديد سوف اقوم بنشره باللغة العربية الفصحي
.

رد

اترك تعليقك !