الرئيسية » العلاقات » مقالات عن تربية الاطفال » الحاجات النفسية للطفل – الاحتياج النفسى الاول الى الاعتبار

الحاجات النفسية للطفل – الاحتياج النفسى الاول الى الاعتبار

بواسطة عبدالرحمن مجدي
1765 المشاهدات
الحاجات النفسية للطفل - الاحتياج النفسى الاول الى الاعتبار
علشان أقدر اتعامل مع طفل لابد يكون عندي الحد الأدني من الفهم عن طبيعته من دوافع و إحتياجات
 
عدم فهم طبيعة الطفل بيخلينا نتعامل بشكل خاطئ و السلوك السلبي للطفل بيكون رد فعل لتعاملنا الخاطئ و كل ما بنزيد في التعامل الخاطئ بيزداد سلوك الطفل سوءا
 
عدم تلبية حاجات الطفل النفسية ينتج عنه امر من اتنين :
 
١- الإنطواء و الإحباط و ده بيكون مؤشر لضعف الشخصية في المستقبل
٢- العدوانية و العنف و العناد و ده بيكون ردة فعل هجومية علي المحيط لتلبية احتياجاته النفسية
 
كل ما هتفهمي طبيعة الطفل و إحتياجاته كل ما هيكون عندك قدرة عالية علي توجيهه بشكل سليم
 
يلا نبدأ واحده واحده 🙂
 
أول إحتياج نفسي للطفل هو الإعتبار
 
يعني بإختصار الطفل عايز يقول أنا هنا أنا موجود و الموجودين يحسوا بيه
وده بيكون أول طريقه للإستقلالية و الإعتماد علي النفس و الشعور بقدراته
 
طريق و هيمشي فيه بالتدريج و بشكل طبيعي لكن اللي بيحصل من الأهل إن الطفل لا يحصل علي الإعتبار فيأخذه بالقوة و بالسلوك السلبي
 
ادي للطفل برستيجه 🙂 بصي له لما يتكلم ، ردي علي كلامه ، حسسيه انه موجود و خدي رأيه
 
بلاش تتعاملي معاه علي انه قطه سارحه حوليكي و مش فاهمه حاجه ، عامليه علي انه شخص كبير له كيان و يستحق الإهتمام
 
– الطفل هيعمل إيه لو محسش بالإعتبار :
 
١-العناد : هيعارض رغباتك بشكل مباشر او غير مباشر بالنسيان
 
٢- التخريب : هيخرب علشان يلفت الإنتباه
 
٣- قلة الأكل : لو حس ان الموضوع بيزعجك هيستخدمه
 
٤- الصراخ : عايز يقول أنا هنا
 
٥- حركات بقي محرجه في الأماكن العامه و قدام الضيوف
 
٦- الكذب الخيالي : بيدي لنفسه إعتبار بحواديت هو اللي تخيلها
 
– إزاي أخلي إبني يحس بالإعتبار :
 
١- خلي لطلفك وقت انتي و هو بس اسمعيله و متمسكيش حاجه في ايدك
 
٢- الطفل يحاكي فإستشعري قيمتك لنفسك علشان الحالة تتنقل له طاقيا
 
٣- امنحي طفلك الحرية متتصرفيش نيابه عنه و متعمليش كل حاجه مكانه و متتكلميش عن لسانه
 
٤- خليه يختار ، اوجدي اي فرصه للإختيار اتلككي يعني ، طبق اخضر ولا احمر تحب تاكل علي الكرسي ده ولا ده
 
٥-إسأليه عن رأيه ، حلوه الكنبه الجديده ، ايه رأيك في خروجة انهارده و اتناقشوا و لو عجبك كلامه قولي ان كلامه مقنع
 
٦- كلفي طفلك ببعض المسئوليات ، شيل معايا الشنطه ، هاتلي تليفوني ، امسك اختك ، …
 
٧- امدحي طفلك علي افعاله ، امدحي الفعل مش الطفل ذاته ، يعني رسمتك و ألوانك جميلة مش انت فنان
 
٨- افتخري بطفلك امام الناس ، بس في المعقول متزودوهاش أوي علشان تبقوا مقنعين ، بلاش تتكلموا عليه سلبي قدام الناس التصرف ده مؤذي جدا للطفل
 
٩- لا تقارن بين طفلك و بين أي طفل غيره ولا تمدح طفل و تبالغ امام طفلك و انت فاكر انك بتحفزه انت كده بتزرع جواه الضغينه و الحقد ، في امهات بيعملوا كده للأسف بين الأخوات و ده امر مضر جدا
 
١٠- لا تبالغ في الإهتمام بطفلك هيطلع مدلل و أناني و معتمد عليك
 
١١- لا تكلف الطفل بأكثر مما يستطيع فيحبط ، كلفه بمهام يستطيع القيام بها فينجزها فيفرح و يكون واثق بنفسه و يحاول اكتر
 
مساءكم تقدير و إحترام 🙂
 
نانسي شبانة
 
هل ساعدك هذا المقال ؟

مقالات ذات صلة

اترك تعليقك !