الرئيسية » خواطر بالعاميه المصريه » نصائح وحكم ومواعظ

نصائح وحكم ومواعظ

بواسطة عبدالرحمن مجدي
1816 المشاهدات
قصة خيالية قصيرة - نيكولاس فوجيسيك
لو عايز تحقق أى حاجة إلتزم بيها 60 يوم بس .
– – – – – – – – – –
فى البزنس متعرضش شراكة على حد غير لو كان هو اللى طالبها ومتحمس ليها
لما تجيلك الفكرة اتعب عليها عشان تبقى ” موجودة ” وتظهر على أرض الواقع
واول بس ما تبتدى تبان ساعتها مش هتحتاج تعرض شراكة على حد
فى أغلب الأحوال هتجيلك الـ Investments من حيث لا تدرى
– – – – – – – – – –
الرسول عليه الصلاة والسلام أقسم أن لا نقص مال عبد من صدقة
متستخسرش فلوسك فى التصدق والله هيرجعلك أضعاف اللى هتطلعه .
– – – – – – – – – –
لو كنت اعرف انى هاجى فى أخر سنة تعليم ليا وأركن التعليم كله على جنب
مكنتش إتعلمت من الأول وضيعت نص سنين عمرى فى دروس ومراجعات
– – – – – – – – – –
الحلم مقاس واحد بالتالى مش هيناسب كل الناس
حلمك متفصل ليك إنت وبس مش لصحابك ولا قرايبك
متحبطش لما تلاقى اللى قدامك مش مستوعب اللى انت بتحلم بيه
 
الحقيقة ده عادى جداً ويخليك تبقى مطمن إن حلمك يستاهل
لو هو تحمس وكل الناس تحمست لحلمك يبقى أكيد
مش هو ده الحلم اللى هيغير حياتك …
 
الناس عادة بتشاركك فى الهدف مش الحلم وده معناه
إنك هتحلم وتتحرك لوحدك تسعى فى تحويل الحلم لهدف
قابل للتحقيق وبعد كده الناس هتتحمس إنها تبقى جزء من الهدف
 
عشان كده من وجهة نظرى الموضوع بيمشى فى شكل خطوات
 
1 . عندك حلم تحقق حاجة مختلفة
2 . بترسم طريق يوصلك لتحقيق الحلم ده
3 . بتبدئ تتحرك فى المتاح قدامك
4 . بتحول الحلم لشئ ملموس
5 . ساعتها الناس بتبدأ تساندك
 
لكن مينفعش تيجى فى أول خطوه والحلم مجرد فكرة
وتبقى مستنى إن الناس كلها تبقى فى ضهرك مش هيحصل.
– – – – – – – – – –
الأفكار زى الضوء بتنورلك طريق قدامك ، عادة الفكرة بتجيلك وإنت قاعد مكانك وبتبتدى تتخيل تفاصيلها وهتنجح إزاى وهتوصل لإيه فى الأخر وتقريباً بتمشى الطريق كله فى دماغك ، فى ناس بتكتفى باللى شافته فى دماغها وتبدأ تدور على حد ياخد بإيدها ويعديها الطريق ده ، فيروح يقول فكرته لأي واحد يقابله ويحاول يقنعه بيها ويوريه اللى هو شافه فى دماغه .
 
طبعاً نسبة النجاح فى الموضوع ده بتبقى 5% تقريباً من كل 10 فى 2 بيتحمسوا بدرجة قليلة ، لأن الأفكار بتبقى مبعوتة لصاحبها مش لكل الناس ، فى الأخر مبيلاقيش حد يمشى معاه الطريق للأخر ، أو بيلاقى ناس مش قادرة تمشى أصلاً ، فينسى الفكرة ويرميها عالرف ويبتدى يشوف غيرها ممكن حد تانى يمشى معاه فيها .
 
وهكذا تبدأ الأفكار الكبيرة تصغر عشان تناسب الواقع اللى انت عايش فيه لحد ما تبقى فكرتك مجرد روتين يومى لحد تانى بيعملها وهو سايب إيده زى ما بيقولوا ، عايز تنجح فى أى حاجة مترميش على غيرك ، إرمى على صحتك ودماغك وخليك واثق فى إن طالما الفكرة جاتلك ، يبقى هتلاقى السكة اللى هتمشى فيها عشان تنجحها ، هتلاقيها حتى لو مفيش أى مؤشرات دلوقتى ، هتلاقيها بس لما تسعى وتبتدى تاخد خطوات لقدام ، التواكل والكسل عمرهم ما نجحوا فكرة ، واللى مش واثق فى نجاح فكرته عمر ما حد تانى هينجحهاله .
– – – – – – – – – –
لكل اللى جاب أقل من 80% ( في الثانوية العامة ) أحب أقولك إن ربنا إداك فرصة تحدد مستقبلك بنفسك ودى نعمة هيحسدك عليها ناس كثير جابت مجاميع كبيرة وطلع عينها فى الجامعة وإتخرجت ملقتش واسطة تشغلها وراحت تدور على شغل فى مجال تانى . اللى فى إيدك دلوقتى إنك تتعب على نفسك وتشوف إنت حابب تعمل ايه وتعمله كويس أوى لحد ما تبقى متمكن منه وهو ده هيبقى كاريرك أى كانت شهادتك .
– – – – – – – – – – – – – – – – – – – –
 
أحمد عزت
 
هل ساعدك هذا المقال ؟

مقالات ذات صلة

اترك تعليقك !