الرئيسية معلومات عامة مفيدة اقتباسات عن الغربة – علمتني الغربة

اقتباسات عن الغربة – علمتني الغربة

بواسطة عبدالرحمن مجدي
1028 المشاهدات
الغربة

سافرت!؟ مسافر!؟ هتسافر!؟ أهم درس اتعلمته في الغربة عن الغربة:

1- اقتباسات عن غربة الروح

– أختي عايشة في دولة خليجية. من يومين صيدلانية رفضت تديها الدواء الموصوف لها، وطلبت منها ترجع للدكتورة لأن الدواء دا بيتوصف للمواطنين فقط مش للوافدين. لما أختى رجعت الدكتورة كلمت الصيدلانية وقالتلها نصاً “الوزارة طلبت مننا وصف بعض أدوية المواطنين للوافدين لأن كمياتها كبيرة في المخازن وتاريخ صلاحيتها قرب ينتهي”!

– اشتغلت في دولة خليجية (غير اللي اختي عايشة فيها) لفترة قصيرة، كان عندي مؤتمر دولي ووصلت أنا وصديقي (المواطن) المطار متأخرين وضاعت علينا الرحلة، لما رحنا نحجز على الطيارة اللي بعدها، صديقي حجز، أما أنا معرفتش وطلب مني الموظف (المواطن) إني استنى لحد آخر وقت للرحلة، اللي لو اتبقى فيها كرسي فاضي هقدر أسافر عليها.

2- اقتباسات جميلة عن الغربة

– بنتي ليلى اتولدت في نيوزيلندا (نيوزيلندا حرفيا هي أبعد دولة في العالم عن مصر، فرق 11 ساعة). بعد إسبوع خلال الكشف الدوري في العيادة عرفنا إن ليلى عندها إلتهاب بكتيري في صدرها ومحتاجة عملية ضروري. الدكتورة اتصلت بالمستشفى وطلبت تحضير غرفة العمليات. بمجرد ما وصلنا المستشفى (اللي تبعد عن العيادة حوالي 20 دقيقة) لاقينا كل حاجة جاهزة وخلال أقل من 5 دقائق من وصولنا كانت ليلى في غرفة العمليات. المدهش في الموضوع إن محدش طلب مني أي فلوس قبل العملية ولا حتى سألونا عن جنسيتنا أو حتى نوع الفيزا (أنا على فيزا طالب مش مواطن أو مقيم). واحنا خارجين طلبت مني الممرضة أفوت على الحسابات. الموظفة اديتني الفاتورة (كانت بحوالي 5000 دولار). سألتني الموظفة “هل معاك فلوس وتقدر تدفع المبلغ!؟ وتابعت “لو مش معاك تقدر تقسطهم على أي مدة تختارها، ولو متقدرش تقسط إملأ الاستمارة دي وبعدها تقدر تروح”.

– من أربع شهور أثناء وجودي في قطار باتجاه العاصمة النيوزيلندية ويلينجتون، مواطنة نيوزيلندية زعقت وشتمت راكب هندي كان بيتكلم في التليفون بصوت عالي بلغته الهندية، وقالتله “اتكلم انجليزي ولو عايز تتكلم هندي ارجع لبلادك”. الركاب استاؤوا من تصرف البنت واشتكوها لمشرف القطار. وبعد التحقيق طلب المشرف من البنت إنها تنزل في أقرب محطة، ولما رفضت طلبلها الشرطة اللي أجبرتها على النزول ووجهت لها تهمة العنصرية. بمجرد نزول البنت كل اللي في القطار سقفوا وحيوا المشرف وظباط الشرطة. الواقعة دي اشتهرت وباركتها كل وسائل الإعلام النيوزيلندية (تناول الميديا النيوزيلندية للواقعة هنا 1 , 2 , 3 ).

3- علمتني الغربة

أهم درس اتعلمته من السفر هو إن أكتر حاجة ممكن تهون علينا الغربة هو وجودنا في بلد يحترم إنسانيتنا بغض النظر عن اختلاف الجنسية أو الهوية أو الدين مهما كان هذا البلد بعيد أو ثقافة أهله مختلفة، وإن أكتر حاجة ممكن تطول علينا الغربة وتصعبها هو وجودنا في بلد يُعامل فيها المغترب كإنسان درجة تانية مهما كبر المرتب أو قربت المسافات أو تشابهت الثقافات. رغم المرتب الكبير اللي كنت باخده في الدولة الخليجية، إلا إن عمري ما حسيت إني غني غير لما سبتها.

“Some people are so poor, all they have is money.” — Blake Griffin

“أرجو عدم الخلط، الهدف من المقال هو انتقاد القوانين والمعاملة العنصرية للحكومات الخليجية للوافدين وليس لأهل الخليج أنفسهم. أعز أصدقائنا وأقربهم لقلوبنا هم من أهل الخليج.” – شريف عمار

4- هكذا علمتني الغربة

” موقفين ..

– الموقف الأول:
عشت في السعودية اكتر من 20 سنة ..واناماشي نهائي من السعودية رحت البنك اطلب تحويل مكافأة نهاية الخدمة واخر مرتب وتمن عربيتي على حساب مصر ..الموظف بصللي من فوق لتحت ورما الورقة ليا بقلة ادب وقالي “روح هات موافقة كفيلك بتحويل الفلوس” ..اتخنقت واتنرفزت وقلتله خطاب علشان احول فلوسي ملكي ! قالي اه هوه ده النظام ولا انت عايز تكسر نظام المملكة وقام وسابني ورجع يصب لنفسه شاي ويضحك مع زميل وراه ..موقف عمري ماهانساه ؛ لدرجة ان اسعد لحظات حياتي وانابتفرج من شباك الطيارة وهيا بتطير بيا لاخر مره “بره” السعودية

– الموقف الثاني:
بعد ماهاجرت ووصلت مطار بيرسون وكنت هانزل على تورنتو ..كنت مرهق جدا..ضابط الجوازات بص في ورقي وبصلي وقاللي شكلك تعبان ! ضحكت قولتله 13 ساعة طيران ..قالي ويلكم هوم ! احنا سعداء انك قررت تيجي كندا ..انت محتاج تنام ..فضحكت ..قام مكمل ..حد مستنيك ؟ قلتله لا قالي هاتعرف تروح المكان اللي هاتنام فيه قلتله هاسال ..قالي هاشرحلك ايه اللي بعدي لحد ما تطلع بره المطار ..واداني معلومات كتير اوي بهدوء وابتسامه ..
بعد ماسبته وخرجت نسيت كل تعب السفر ..
في الف موقف موقف بس الاتنين دول عمري مابنساهم ! – ايهاب الرميسي

شريف عمار

هل ساعدك هذا المقال؟ .. شاركه الآن!

مقالات ذات صلة

اترك تعليقك !