الرئيسية » خواطر بالعاميه المصريه » كلام عن الفراق

كلام عن الفراق

بواسطة عبدالرحمن مجدي
2082 المشاهدات
الطلاق العاطفي بين الزوجين - اسباب الطلاق وعلاجه
إحنا مش بننساهم .. إحنا بس بنتعود نعيش من غيرهم !
– – – – – – – – – – – – – – – – – – – –
بنكابر و البُعد كاسرنا .. وندور على بعض فـ غيرنا !
– – – – – – – – – – – – – – – – – – – –
ساعات مشاعرنا تغلبنا .. فـ نمسك فـ اللى هيسيبنا
قلوبنا طيبه جدا .. وده وقت الفراق عيبنا !
– – – – – – – – – – – – – – – – – – – –
الحب لو مغيرش حياتك للأحسن .. يبقى عقاب من ربنا 🙂 !
– – – – – – – – – – – – – – – – – – – –
حِب و اعمل المستحيل عشان اللى بتحبه .. بس متبقاش أهبل !
واعرف ان فيه ناس متستاهلش !
– – – – – – – – – – – – – – – – – – – –
لكل الحاجات اللى فرطنا فيها ..
وكل الحاجات اللى خلصت قوام
لنظره فـ وداع اللى كانوا فـ حياتنا
ودخلوها صدفه و خرجوا بسلام
لكل اللى كان نص تانى و شاركنا
فـ جد و هزار و انتظار و اشتياق
لكل اللى قالوا ” هنفضل معاكوا “
وغابوا وسابوا الحنين و الفراق
لكل اللى عايش عشان حد تانى
لكل اللى كان نفسه اصلا يعيش
لكل اللى ساكت ولو قولت مالك
يكون فيه ولكن يقولك ” مفيش “
لكل اللى تبتنا فيهم بذمه
وكل اللى حطونا بين ” أو و إما “
وكل الحاجات اللى كانت مهمه
لكن بعد فتره بقت متساويش
– – – – – – – – – – – – – – – – – – – –
تبقوا صحاب و تحبوا بعض ممكن .. تحبوا بعض و ترجعوا اصحاب مستحيل 🙂
الحب لو دخل بينكوا عمره ما بيرجع صداقه .. الا لو مكونتوش حبيتوا بعض بجد اصلا
الناس اللى بتقولك عادى .. انتوا اللى قلوبكوا ” بتهنج ” بعد كده و بتستغربوا مش عارفين تحبوا تانى ليه
– – – – – – – – – – – – – – – – – – – –
جايز الناس اللى خرجت من حياتنا مترجعش وجايز متعرفش قيمتنا برضه .. متحاسبش اعمى مسك جوهره ورماها !
– – – – – – – – – – – – – – – – – – – –
انت مش بتعرف تعاملهم بالمثل .. عشان انت بتحبهم أكتر .. و عشان كده انت الطرف الأضعف !
– – – – – – – – – – – – – – – – – – – –
على قد ما تحتاجهم سيبهم .. وقت ما هتسيبهم هيحنّوا
من طبع الشئ يبعد عنك .. طول مإنت بتتقرب منه !
– – – – – – – – – – – – – – – – – – – –
كون واثق ان فـ أى وداع .. الدنيا هتمشى و هتكمّل
ربنا دايما يبعت أوجاع .. على قد ما نقدر نتحمّل !
– – – – – – – – – – – – – – – – – – – –
اللى مش حاسس وجودك .. عمره ما يحس بغيابك
واللى سابك بكره يندم .. انه كان وياك وسابك !
– – – – – – – – – – – – – – – – – – – –
إنت إتغيرت أوى .. عشان نمت زعلان كتير 🙂
– – – – – – – – – – – – – – – – – – – –
انت خايف تخسرهم .. خايف جدا .. مرعوب .. حمار متعرفش ان الخساره أهون بكتير مـ الخوف !
الموضوع بسيط جدا .. انت عندك ايد بتوجعك .. حته منك .. مبتستغناش عنها .. بس بتوجعك .. ملهاش حل .. ” إقطعها ” 🙂
– – – – – – – – – – – – – – – – – – – –
عيط .. بس عـ الناس اللى تستاهل .. متبقاش بتعيط و أهبل !
– – – – – – – – – – – – – – – – – – – –
متدخلش علاقه جديده .. غير وانت متأكد انك مش هتبص وراك تاتى .. آه يا ” غبى ”
– – – – – – – – – – – – – – – – – – – –
متخليش حياتك عباره عن شخص واحد .. عشان هو ده اللى هيسيبك
– – – – – – – – – – – – – – – – – – – –
ازعل بس ” إستنضف ” الناس اللى تزعل عليها !
– – – – – – – – – – – – – – – – – – – –
الوحده من الأول خالص .. أحسن من قصه آخرها فراق
– – – – – – – – – – – – – – – – – – – –
بطل غباء بالله عليك .. علشان حياتك تتعدل
كل اللى ضاع من بين اديك .. لو كان هيفضل كان فضل !
– – – – – – – – – – – – – – – – – – – –
إختار ناس تكمّل معاك .. مش ناس تكمل عليك !
– – – – – – – – – – – – – – – – – – – –
احنا محتاجين ناس تغير حياتنا للأحسن من غير ما تتغير علينا !
– – – – – – – – – – – – – – – – – – – –
فيه مرحله كده فـ حياتك .. اسمها مرحلة ” ما يولعوا بجاز ” .. ودى المرحله اللى بتوصلها بعد ” الفقد ” و ” الكبت ” و العشم اللى مكانش فـ محله .. و ” قلة التقدير ” و ” التجاهل ” و ” الإستهتار بمشاعرك ” و عندم احترام الآخرين ” لضعفك ” قدامهم .. دى المرحله اللى هما بيوصلوك ليها .. و يرجعوا يقولولك انت إتغيرت ليه ؟! .. لا أبدا .. انا متغيرتش .. انا فوقت 🙂
– – – – – – – – – – – – – – – – – – – –
الناس اللى دخلت حياتنا وخرجت ؟! .. أتمنى تكون الإقامه عندنا عجبتكوا أوى .. يلا مانتوا مش وش نعمه 🙂
– – – – – – – – – – – – – – – – – – – –
مترضاش بنص حل و مترجعش فـ نص طريق و متكملش علاقه مده صلاحيتها انتهت .. كفايه غباء بقى !
– – – – – – – – – – – – – – – – – – – –
كان لازم تكسب نفسك .. لو حتى هتخسر مين
أسوأ إدمان فـ الدنيا .. إدمان البنى آدمين 🙂
– – – – – – – – – – – – – – – – – – – –
فيه علاقات كتير كان زمانها استمرت .. لو كانت فضلت سطحيه .. يارب نتعلم بقى 🙂
 
لما بتسطح علاقتك بكل الناس .. بتحس انك ملكش حد قريب منك تشاركه تفاصيل حياتك اللى بتحبها .. ولما بتبقى قريب منهم .. بتحس انك بعيد عن نفسك انت جدا .. و ملكش فـ نفسك حاجه .. لما بتسطح مع جزء .. و تقرب من جزء .. بتحس انك قريب من الجزء اللى المفروض تسطح معاه .. وبعيد عن الناس اللى المفروض تقرب منها .. أحب أقولكوا ان الموضوع معقد جدا .. وان محدش مرتاح 😀
 
هو الحل الوحيد .. انك تسيب العلاقه تتطور بالوقت .. يعنى فيه علاقات مينفعش تشربها مره واحده .. الناس جرعات .. لازم ناخدها على فترات .. لازم يدخلوا حياتنا على مهلهم و يخرجوا على مهلهم .. لإن القرب بسرعه .. بيتحول لبعد بسرعه برضه .. عمالين نوزع حتت من روحنا على ناس بتيجى و تمشى و خلاص .
– – – – – – – – – – – – – – – – – – – –
مفيش حاجه اسمها انت وحظك .. ونختارهم ازاى .. انت بتبقى عارف مين اللى بيحبك و قلبه عليك فعلا .. ومين اللى موجود فـ حياتك سد خانه و خلاص .. انت سبب مشاكلك مش هما
– – – – – – – – – – – – – – – – – – – –
فـ نهاية كل مرحله من حياتك .. مش هيفضل معاك غير اللى بيحبك بجد ..
نقطه ومن أول الناس
– – – – – – – – – – – – – – – – – – – – – – – – – – – – – – – – – – – – – – – –
 
محمد ابراهيم
 
هل ساعدك هذا المقال ؟

مقالات ذات صلة

اترك تعليقك !