الرئيسية » الذات » تحفيز الذات » البحث عن السعادة – كريس جاردنر

البحث عن السعادة – كريس جاردنر

بواسطة عبدالرحمن مجدي
1287 المشاهدات
البحث عن السعادة - كريس جاردنر

معظم اللى بيقرا المقال ده إتفرج على فيلم The Pursuit of happiness لكن كام واحد يعرف إن الفيلم ده مبنى على قصة حقيقة لشخص موجود فعلاً إسمه Chris Gardner اللى قام بدوره Will smith فى الفيلم .

◄ كريس إتحول من شخص بينام فى الشارع لملياردير

كريس جاردنر مدخلش جامعة عشان مكانش يقدر يتحمل مصاريفها معنى كده إن مستواه التعليمى ” كشهادة ” أقل من 95% من اللى بيقروا المقال ده , مكانش عنده أى علاقات يقدر يبدئ من خلالها ومكنش عنده مؤهلات تساعده يحقق أى حاجة , لكن كل ده مخلهوش يبطل يحلم ويصدق إنه يقدر يحققه فعلاً …

اللى متفرجش عالفيلم أحب أعرفك على القصة الحقيقية ” كريس جاردنر ” ده ليه 11 أخ أبوه مات وهو عنده 5 سنين وأمه اللى ربته لوحدها لحد ما ماتت وهو عنده 21 سنة , اللى خلاه يوصل للى هو حققه ده بدئ بعد ما شاف واحد راكب عربية ” Ferrari ” وسأله إنت شغال إيه ؟ قاله إنه شغال Stock Broker فى البورصة يعنى …

كريس بعدها قرر إنه يبقى Stock Broker إتعرف على مدير تسويق فى شركة إستثمارية وكان هيعينه فى الشركة , لكن لحظه السئ أول ما راح كان المدير ده إترفد من شغله , ومحدش كان يسمع عن جاردنر أو إنه هيتعين , الباب ده اتقفل فى وشه من أول محاولة لكن رغم كده ميأسش وقرر إنه يدور على شركات تانية …

الشركة اللى وافقت انها تعين كريس إسمها Dean Witter , لكن رفضوا يتعين معاهم غير لما يقعد فى البرنامج التدريبى بتاعهم لمدة 10 شهور كاملة , بمعنى انه هينزل كل يوم من البيت يروح الشغل يتعلم ويشتغل عملى ” بدون مقابل ” وفى الأخر فى إحتمال إنه يترفض .

أول إنترفيو لكريس فى الشركة كان لابس بنطلون جينس مقطع وتشيرت متوسخ , وبالرغم من انه كان ممكن يقول أى سبب يبرر بيه الصورة دى , لكنه قرر يقول الحقيقة وهى إنه كان مقبوض عليه الليلة اللى قبليها بعد ما مراته خدت إبنه وسابت البيت وكان لسه خارج من الحجز قبل ميعاد الإنترفيو بساعة واحدة …

لحسن حظه إن اللى كان بيعمله إنترفيو , كان لسه مطلق مراته ههههههه ، فتعاطف معاه وقرر إنه يضمه للبرنامج التدريبى بتاع الشركة وكمل فيه للأخر لحد ما نجح وإتعين فى الشركة فعلاً , سنة 1987 كريس بدئ أول شركة ليه فى شيكاغو إسمها Gardner Rich وبدئ يجيب عملاء كبار ومن ساعتها داس بنزين ومبصش وراه ….

◄ بس اللى يهمنا فى القصة دى

انك لازم تحب الحاجة اللى بتشتغل فيها , متضيعش وقتك فى حاجة مملة أو حاجة مبتحبهاش عشان فلوسها وبس , كريس أول ما قرر يشتغل كان عشان محتاج فلوس يقدر يدفع ايجار البيت اللى قاعد فيه ويصرف على ابنه , لكن وصل للى هو وصله ده بعد ما لقى المجال اللى بيحبه وبيستمتع وهو شغال فيه , جاردنر نفسه بيقول ” اعمل الحاجة اللى بتخليك مبسوط ومستنى الشمس تطلع كل يوم عشان تبدئ فيها , مش مهم فلوسها قد ايه , مش مهم سهلة ولا صعبة , لأنك ببساطة لو مشتغلتش فى حاجة بتخليك مبسوط وحاسس بقيمة اللى بتعمله , هتبقى مجرد عبد للفلوس وللموهبة اللى ربنا ادهالك ” اقرأ: كيف اكتشف موهبتي ؟

– الراجل ده كان بينام فى حمامات محطات المترو هو وابنه بعد ما اتطرد من بيته

– الراجل ده حتى بعد ما اتعين فى الشركة مكانش عنده غير بدلة واحدة بيغسلها كل كام يوم , ولما ابتدى يقبض مرتبه مراحش يجيب بدله جديدة عشان يبقى ” طبيعى ” راح دور على بيت يقعد فيه هو وابنه

– الراجل ده بدئ أول شركة ليه وهو عنده 33 سنة , معنى كده إن لسه عندك أمل ^_^

– الراجل ده أكيد مكانش عارف إنه هيوصل يبقى ملياردير بعد ماكان مش لاقى حته ينام فيها

بس اللى بيبص على مشاكله ويقعد يلعن الظروف والناس بيفضل من سئ لأسوء , لكن اللى بيشوف كل مشكلة على انها ” تجربة بيكسب منها خبرة ” مفيش ناس كثير كسبوها هو اللى بيطلع من المشكلة أقوى , هو اللى بيبنى شخصيته , هو اللى بيحقق حاجات محدش غيره هيحققها …

احلموا يا بشر …

أحمد عزت

هل ساعدك هذا المقال ؟

مقالات ذات صلة

اترك تعليقك !