الدنيا دار شقاء فى الحاجة اللى بتحبها
مش تتعب ويطلع عينك فى حاجة بتكرها
مقتنع إن هى دى الدنيا وانك لازم تستحمل .
إعقلوا
– – – – – – – – – – –
90% من خبراتك العملية هتكتسبها من تجاربك الفاشلة
فالحياه بتدى اللى بيسعى فيها وبيجرب ويتعلم من غلطه
مش اللى سايبها تسوقه وتوديه وتجيبه زى ما هى عايزة
السعى متع من متع الدنيا والتواكل والكسل إبتلاء من ربنا .
– – – – – – – – – – –
وجود هدف في حياتك دي نعمة لو عندك هدف في حياتك ده معناه ان ربنا الهمك الهدف ده عشان تحققه وانك فعلا قادر علي تحقيقه لو اخذت بالاسباب واخلصت نيتك لله عشان كده متخافش من الفشل لدرجة انك متحاولش اصلا عشان ساعتها النعمة ممكن تزول منك وتعيش بقيت عمرك بتحقق اهداف ناس تانيه
– – – – – – – – – – –
لما تعرف قيمة نفسك مش هتبرر ومش هتحتاج تقنع حد بحاجة . وطول ما انت شايف نفسك صغير هتتمحك في نجاحات غيرك . وهتحاول تقنع الناس بفشل غيرك عشان تبرر فشلك وتقنع نفسك انك كويس . النجاح ده قرار من جواك مش محتاج تخلي الناس تسقفلك عليه وتقنعهم بيه والفشل هو انك تخلي الناس تسقفلك علي حاجة انت مش طرف فيها اصلا .
– – – – – – – – – – –
غالباً إنت هتقضى أكثر من نص عمرك بتشتغل …
فنصيحة متشتغلش حاجة مش حاببها عشان حد تانى بيكسب منها ، ومتشتغلش حاجة مش فاهمها عشان فيها فلوس كويسة ، والأهم إشتغل فى حاجة تفيدك وتفيد الناس ، حاجة ليها قيمة مش شرط تكون عالم ذرة ولا خبير فضاء ، بس إعمل اللى تبقى مستعد تحكى عنه للناس وإنت فخور ، عشان لما تبطل شغل فى يوم من الأيام متبقاش ندمان على سنين عمرك اللى راحت فى حاجة انت مش حاببها واللى هى عادة بتفشل فى الأخر بردوا إن مكانش مادياً فمعنوياً .
– – – – – – – – – – –
لو قررت تعمل الحاجة اللى بتحبها هتتعب وهتعانى وهتشوف ايام صعبة جداً فى البداية لحد ما تثبت فعلاً انك جدير بالنجاح فى الشئ اللى بتحبه وهيعدى عليك أوقات تقول لنفسك ما كنت مشيت فى الطريق اللى كله ماشى فيه ، ما كنت اخترت السهل ، ما كنت عملت اللى مبحبوش احسن ما انا طالع عينى فى اللى بحبه ومش عارف هيوصلنى ولا لا . فى الأخر الاثنين قرارات هتدفع ثمنهم واحد فيهم هتقسط ثمنه طول عمرك من ضغط عصبى ونفسى وشعور بعدم الرضا مهما حققت والثانى هتضطر تدفع ثمنه كله مقدم عشان تستحق العائد اللى هييجى منه بعد كده طول حياتك .
– – – – – – – – – – –
لو بتعمل حاجة بتحبها ” بإستمرار ” هتنجح مهما كانت جودتها او قيمتها فى نظر الناس يعنى لو بتغنى مهرجانات باستمرار هتنجح وهتتشهر بغض النظر عن وجهة نظر الناس فى المجال ده ، لو بتقول نكت دمها تقيل باستمرار هتنجح وهتتشهر بغض النظر عن مدى حب او كره الناس للنكت دى لو بتعمل فيديوهات تعلق فيها على العاب بلاى ستيشن باستمرار هتنجح لو بتعمل اى حاجة باستمرار كبيرة او صغيرة ليها قيمة او ملهاش بس بتحبها فعلاً هتنجح وهتلاقى نفسك وصلت لحاجة الخلاصة دور على حاجة بتحبها مهما كان حجمها واقعد اشتغل عليها كثير هتنجح
– – – – – – – – – – –
عادة اللى بينجحوا فى حياتهم بشكل أو بأخر بيبقى تركيزهم منصب على النهاردة وبكرة ، هيعملوا ايه النهاردة وهيقدموا ايه بكرة ، بيركزوا على نفسهم أكثر ما بيركزوا مع غيرهم ، وقتهم بيروح فى بناء حاجة ليها قيمة ، مش فى هدم حاجة ملهاش قيمة من وجهة نظرهم ، الكلام سهل والتنظير أسهل لكن دائماً نهايته حيطة سد ، متضيعش حياتك بتحاول تاخد مكان حد او تثبت حاجة لحد ، عقدة النقص دائماً مرتبطة بالتقصير والنجاح دائماً مرتبط بالرضا والسعى .
– – – – – – – – – – –
فى لحظة معينة فى مستقبلك هتحس فيها بقيمة كل محاولة فاشلة وكل تجربة منجحتش وضيعت فيها وقت ومجهود وأحياناً فلوس ، اللحظة دى تحديداً بتلاقى إن كل حاجة فى حياتك بتتجمع فى خط مستقيم من ظروف محيطة وفرص وحظ إلخ …
أنا قعدت حوالى 6 سنين أخبط يمين وشمال واعمل شغل بـ 30 و 40 جنيه واحياناً أعمل شغل لناس ببلاش عشان أتعرف بس وكان عادى اطبق للصبح عشان أسلم شغل بـ 50 جنيه واستحمل ضغط فوق الطبيعى فى حين انى مكنتش شايف اى مقابل للمجهود ده ، لا مقابل مادى يذكر ولا حد يعرفنى ولا حاسس إن فى مستقبل مشرق مستنينى ولا حاجة .
لحد ما فى يوم الدنيا ابتدت توضح المجهود بتاع السنين كله طلع ليه فائدة وطلع استثمار فى المستقبل مبتاخدش فائدته غير بعد سنين ، إنت كمان متستخسرش مجهود أو فلوس فى مستقبلك لأنه أكيد فى يوم هيرجعلك .
– – – – – – – – – – –
يمكن أكبر تحدى بيقابل اى حد فى الشغل هو إنه يخرج نفسه من فكرة السعى المطلق ورا الفلوس ويبقى بيشتغل عشان يتبسط ويحقق نجاح شخصى يغني نفسه قبل جيبه. بس عشان تقدر تعمل حاجة زى كده بتحتاج تاخد قرارات صعبة كثير و تضحى بأحلام وطموحات مستقبلية ، وبتقرر تعيش وتستمتع باللحظة اللى إنت فيها فقط لا غير ، فى ناس بتشوف ده إنه قرار متسرع ومخاطرة غير محسوبة ممكن يترتب عليها مستقبل مظلم وناس تانية بتشوفه إنه الإختيار الصح لأنك مش ضامن تعيش لبكرة فـ ليه تعيش مضغوط وتعيس النهاردة.
– – – – – – – – – – – – – – – – – – – – – –
أحمد عزت
هل ساعدك هذا المقال ؟
