الرئيسية » شعر » شعر عامي مصري » كلام عن الحب والفراق

كلام عن الحب والفراق

بواسطة عبدالرحمن مجدي
2435 المشاهدات
بين الالم والامل - الحزن والسعادة
إفهموا اننا ماسكين فيكوا عشان بنحبكوا .. مش عشان تستهتروا بمشاعرنا .. و تدوسوا على كرامتنا .. متمسكين بيكوا .. عشان عندنا أمل تتغيروا .. عشان عندنا أمل انكوا تقدروا اللى بنعمله و اللى مستعدين نعمله علشانكوا .. مش عشان تاخدوا متدوش .. انتوا مبتحسوش بقيمتنا غير لما بنمشى و الدنيا بتفضى عليكوا .. بترجعوا تدوروا علينا زى الكلاب بالظبط والله .. بس وقتها بقى .. بنكون مش عايزينكوا .. لإننا مبنسبش حد غير لما بنعمل عشانه كل حاجه .. و لما بنمشى بنمشى مبنبصش ورانا .. إحنا أغبيا عشان ماسكين فيكوا .. و انتوا أغبيا عشان مش حاسين بقيمتنا .. نعقل بقى .. وكل واحد يعامل التانى باللى يستاهله
– – – – – – – – – – – – – – – – – – – – – –
انا محتاج حد يفهمنى .. حد يستوعب انى مش دايما ببقى عارف أتكلم .. و انى متقلب المزاج جدا لدرجة انى ممكن ابقى بضحك و أروح معيط فجأه .. و انى بتعشم جدا فـ الناس اللى بحبها .. ولما بحب بقع على وشى .. و بحب بكل طاقتى .. و انى برضه ليا طاقه .. مبقدرش أتحمل ” الغياب الطويل ” .. و “الأحضان الروتينيه ” و ” التراكمات “.. و انى ساعات بحب أبقى لواحدى .. و انى بحب المزيكا قد ما بحب صحابى .. و انى بحبك أكتر ما بحب المزيكا .. و انى ساعات قلبى بيتقبض من غير سبب .. فبفضل مأريف طول اليوم .. و انى طول الوقت ببقى عايز أشوف الناس اللى بحبها .. و انى فعلا ممكن معرفش انام .. لو حد زعلان منى .. راعوا مشاعر الناس اللى ” بتحس ” .. الناس اللى بتاخد كل حاجه على أعصابها .. عشان دول أكتر ناس .. بتضحى .. و أكتر ناس بتتعب لما بتحب ! .. و أكتر ناس بتحب بجد
– – – – – – – – – – – – – – – – – – – – – –
فيه نوع معين من الناس .. متناقض جدا طول الوقت .. بيحب الناس بس مبيثقش فـ حد .. بيضحك على طول بس لو إتكلمت معاه شويه بجد .. ممكن ينهار من العياط .. يضحكك .. و يقلش ويهزر .. عشان يخبى اللى جواه .. ولما يسكت .. يسكت خالص .. النوع اللى بيتعود على الناس بسرعه .. من تانى مره تقابله ممكن يحضنك .. وممكن تبقى انتيمه .. ويسلم عليك عادى .. نوع ” مخبول ” .. نوع عنده كهربا زياده فـ مشاعره .. يا مهيبر وفرحان و مبستم و الحياه جميله .. يا سواد السواد و إكتئاب و عزله .. النوع اللى مبيعرفش يبقى عادى .. النوع اللى مينفعش تلوم عليه انه بيعيط فـ موقف بالنسبالك تافه .. و مينفعش تلوم عليه لو بارد فـ موقف بالنسبالك مصيبه .. اقسم بالله إحنا كده .. ملناش حل .. يا تستحملونا يا تمشوا
– – – – – – – – – – – – – – – – – – – – – –
كونك شخص متقلب المزاج .. بيخليك محتاج حد لو شافك مبسوط .. يتجنن .. ولو شافك متضايق .. يسيبك فـ حالك .. ولو شافك ” عادى ” .. يحاول انه يا يعكنن عليك .. يا يفرحك .. انت مش محتاج حد يحبك بس .. انت قلبك محتاج ” داده ” .. انت جواك عيل .. مخه صغير .. بيتعشم جدا .. فبيقفش من أقل حاجه .. و بيحب بغباء .. فـ بيكسر اللى بيحبهم .. انت طيب .. هم مش فاهمين انك بس مش قادر تسيطر على نفسك .. مشاعرك عربيه من غير فرامل .. بتعمل كل حاجه للآخر .. لما بتحب بتحب .. ولما بتكره ……. بتكرااااااااه .. اللى بيحبك مش هيفرق معاه كل ده .. اللى بيحبك هيستحملك .. متقلب المزاج بقى .. مجنون .. متخلف عقليا .. هيحبك وخلاص
– – – – – – – – – – – – – – – – – – – – – –
لازم نراعى مشاعر الناس اللى بمليون مود فـ الدقيقه .. الناس اللى يا بتتكلم كتير يا بتسكت خالص.. الناس اللى ممكن تبقى معاك وتقوم تروّح فجأه .. الناس اللى ممكن يومهم يتقفل بكلمه .. الناس اللى بتصحى من النوم اصلا مخنوقه .. الناس اللى طول الوقت قلبها مقبوض من غير سبب .. الناس اللى اقل حاجه بتأثر فيهم .. الناس اللى اول ما بتضحكلهم بيضحكوا تلقائى حتى لو مش عارفينك .. لازم نتعامل معاهم على قد ” عقل قلبهم ” و منزعلش من ردود افعالهم الغريبه .. الناس دى مش فاهمه نفسها اصلا فمتحاولش تفهم هما كده ليه .. حبهم زى ما هما وخلاص
– – – – – – – – – – – – – – – – – – – – – –
احنا لازم نجمع الناس اللى بتاخد كل حاجه على أعصابها .. و الناس اللى بتحس بكل حاجه .. و الناس اللى بتتعشم بزياده .. و الناس اللى بتصدق أى حاجه تتقال .. و الناس اللى بتحب بضمير .. و الناس اللى لما بتحب بتضحى .. و الناس اللى لما بتضحى مبتستناش مقابل .. أيوه كل الأغبيا دول لازم نوديهم كوكب تانى 😀
– – – – – – – – – – – – – – – – – – – – – –
انا مش زعلان .. بس مش مبسوط .. مش خايف .. بس مش مطمن يعنى .. حاسس انى واقف فـ نص كل حاجه .. بتفرج على الناس اللى عايشه حياتها .. وأفتكر الناس اللى خرجت من حياتى .. بقيت ” عادى ” .. فلان مات ؟! .. الله يرحمه .. اتصدمت آه .. بس متأثرتش .. فلان زعلان .. ماشى .. هعمل ايه يعنى .. مفيش قدره انى أصالح حد .. حتى لو بحبه .. بقيت مُستهلك بالكامل .. مفيش دافع لأى جديد .. بقنع نفسى ان بكره أحسن .. مع انى خايف منه .. و بقنع نفسى انى ناسى امبارح مع انى بفكر فيه .. لا بقيت عارف انا عايز إيه .. ولا محتاج مين .. حاسس انى شايف الحياه من ورا نضاره ” مشبّره ” .. ضباب .. بمعنى أصح .. حاسس انى مبقتش بحس بأى حاجه .. تلاجه
– – – – – – – – – – – – – – – – – – – – – –
الحب بيولد الروتين .. الروتين بيولد البرود .. البرود بيولد التجاهل .. التجاهل بيولد القسوه .. القسوه بتولد العند .. العند بيولد البعد .. البعد بيولد الحنين .. الحنين بيولد الحب تانى .. دايره مدغدغه الناس كلها 🙂
– – – – – – – – – – – – – – – – – – – – – –
المجد للناس اللى شايفه عيوبنا دى كلها و متسحملاها من غير اى مقابل !
– – – – – – – – – – – – – – – – – – – – – –
قرب من اللى يقدّرك و إديه .. كل إهتمام ده لإنه يستاهله
سيب اللى سابك وأوعى تبكى عليه .. هو اللى بكره هيبكى من جهله !
– – – – – – – – – – – – – – – – – – – – – –
مشاكلنا كلها ممكن تحل .. بس لو إتكلمنا مع بعض بالطريقه ونبرة الصوت المناسبه
– – – – – – – – – – – – – – – – – – – – – –
مش عارف تاعب نفسك ليه ؟! .. ” اتعامل زى ما بيعاملك “
أهو كل اللى انت بتبكى عليه .. لو كان هيدوملك كان داملك
– – – – – – – – – – – – – – – – – – – – – –
ولا تزعل عـ اللى مفارقينك .. ولا تفرح باللى هيتبقّوا
كل اللى اتساب من غير أسباب .. ربنا هياخدله فـ يوم حقه !
– – – – – – – – – – – – – – – – – – – – – –
الثقه هى الحاجه الوحيده اللى مدة صلاحيتها موقف واحد بس .. و الشك لو دخل علاقه .. تبقى دى بداية النهايه !
– – – – – – – – – – – – – – – – – – – – – –
90 % من العلاقات انتهت بسبب ” التجاهل ” .. لإننا شعب مريض بقلة الإهتمام .. شكرا 🙂
– – – – – – – – – – – – – – – – – – – – – –
بيرجعوا بعد ما نتعود نعيش من غيرهم .. عشان يعودونا عليهم تانى و يمشوا
– مين اللى عايش من غيرى ؟! .. هاتولى الكلب ده 😀
– – – – – – – – – – – – – – – – – – – – – –
اللى عايز يخسرك ساعده .. خليه يعرف قيمتك بقى
وبيعرف قيمتك ؟ .. لا بساعده بس 🙂
– – – – – – – – – – – – – – – – – – – – – –
قبضه القلب اللى من غير سبب .. منتهى البؤس اللى فـ الدنيا والله !!!
– – – – – – – – – – – – – – – – – – – – – –
فضفض أول بأول .. عشان التراكمات هى سبب قبضة القلب اللى مبتبقاش عارف سببها
– – – – – – – – – – – – – – – – – – – – – –
انت بتحبهم .. و هما بيحبوا غيرك .. و غيرك بيحبك .. يارب تولعوا كلكوا 😀 !!
– – – – – – – – – – – – – – – – – – – – – – – – – – – – – – – – –
 
الشاعر محمد ابراهيم
 
هل ساعدك هذا المقال ؟

مقالات ذات صلة

اترك تعليقك !