كيف اعلم طفلي الحمام

التدريب علي النونية (البوتي ) أو المرحاض أو التويليت
 
ازاي أعرف ان الوقت مناسب و إن طفلي مستعد أبدأ ادربه علي الذهاب للحمام ؟
 
ابتداء من عمر ١٨ شهر بيبدأ يكون عنده قدرة علي السيطرة علي المثانة و الأمعاء و لكن لا يكون عنده القدرة علي ربط الإحساس بالذهاب للحمام ، علشان كده أفضل ان إحنا ننتظر و نبدأ التدريب في الفترة بين ٢،٥ و ٣ سنين ، لأن استعداد الطفل و قدرته علي التعبير بتكون أحسن و ده بيجعل التدريب أسرع و أسهل
كمان في مؤشر أخر أعرف منه استعداد الطفل ، ان حفاض الطفل يفضل جاف فترات طويلة
لو كان طفلك مستعد و لكن انتي عندك ظروف زي طفل جديد أو سفر أو نقل لبيت أخر ،يفضل تنتظري حتي تستقري
 
ازاي أدرب طفلي ؟
 
١- اجعليها تراكي ، اجعليه يري والده و اشرحوا ما يحدث
٢- علميه التجفيف بالمحارم (المناديل ) و غسل اليدين بعد الانتهاء ، و لما الطفل يكون عمره ٤ سنوات علميه يغسل لنفسه
٣- لما طفلك يبلل نفسه لا تبدلي الملابس سريعا خليه يشعر بالفرق بين البلل و الجفاف
٤-اتعودي تلاحظي علي طفلك تعبيرات وجهه و حركات جسمه
٥- اطلبي من طفلك دخول الحمام كل ساعتين
٦- في فترة التدريب لبسيه ملابس يسهل نزعها بسهولة و سرعة ، يعني بلاش زراير و سوسته
٧- مع مرات النجاح اعطي لطفلك تقدير و مدح في كل مرة
٨- مع مرات الفشل غيري له ملابسه في هدوء و اعطي دعم ، قولي ” انت مقولتش بس مش مشكلة انت المرة القادمة هتقول لماما و هتقدر ” بدون اعطاءه اهتمام و مبالغة
٩- كل شوية اسأليه : هل تريد الذهاب للحمام ؟
١٠- امهات كتيير لا تفضل الخروج أثناء فترة التدريب ، و لكن انا بفضل بعد أول يومين تخرجي علشان الطفل يتعرض لمواقف مختلفة و يتعلم أسرع ، بس تخرجي لأماكن سهل تلاقي حمام قريب و بسرعة ، خليه يدخل الحمام قبل الخروج مباشرة ، و خدي معاكي ملابس احتياطي
١١-في أوقات الأطفال بيبللوا نفسهم تكاسلا عن الذهاب للحمام و بيتعمدوا التلكؤ حتي أخر لحظه ، من الطبيعي ان الطفل لما بيلعب و بيكون بيعمل حاجة بيحبها ينسي و يعمل كده ، فخدي الموضوع بهدوء و تولي انتي المبادرة بإنك تسألي كل شوية
١٢- نعمل potty training chart زي اللي في الصورة و نخلي الطفل يحط stickers بنفسه في كل مرة ينجح فيها
 
أخطاء بيعملها بعض الأمهات :
 
١- يخلوا الطفل يستعمل النونية قدام التليفزيون ، انا من الناس اللي مش بنصح باستخدام النونية (البوتي) و بفضل التدريب علي التويليت مباشرة
٢- اللوم علي الطفل و التوتر و القلق و العصبية و الاستعجال
٣- عقاب الطفل ، وده غلط كبير جدا و بيسبب احباط للطفل و بترجعي للوراء في تدريبه
٤- التذبذب ، يعني تخلع الحفاض كام يوم و ترجع تلبسه ثم تخلعه و تلبسه ، قرار عدم لبس الحفاض في فترة النهار يكون نهائي و مرة واحدة ، لأن التذبذب ده بيجعل الموضوع صعب علي الطفل
التخلي عن الحفاض أثناء فترة الليل :
١- بعد الطفل ما يتحكم بشكل جيد في فترة النهار و يمر عليه إسبوع كامل بدون حوادث ، ممكن تتخلي عن حفاض الليل
٢- نقلل كمية السوائل اللي بيشربها قبل النوم ، و لا تعطيه قبل النوم بساعة
٣-تصحيه كل ساعتين تدخليه الحمام ، ثم كل ٣ ساعات ، ثم كل ٤ ساعات ، ثم مرتين في الليل ، ثم مرة واحدة ، ثم ولا مرة ، بالتدريج علي مدار سنة مثلا
٤-لو استمر طفلك مع بداية التدريب في تبليل نفسه أجلي كام شهر حتي يكون مستعد
٥- لو طفلك تعود انه لا يبل نفسه فترة الليل و إستمر فترة علي كده و وبعدها رجع يبلل نفسه و بشكل متكرر كثيرا ، غالبا ده بيكون مؤشر إت الطفل بيشعر ببعض التوتر ، تعاملي مع الموضوع بهدوء ولا تلومي عليه و اعطيه دعم و حنان أثناء فترة النهار ، الطفل ذكي انتبهي إنه يربط إهتمامك بتبليل نفسه فيتمادي
 
عادة تدريب الطفل يحتاج من إسبوع إلي شهر علي حسب عمر و قدرة كل طفل ، فطولي بالك و كوني هادية التدريب هيمر يهدوء و سهولة ، لكن لو الفترة طالت غالبا هيكون بسببك انتي ، بسبب سوء تصرفك مع الطفل أو إن عمر الطفل لسه غير مناسب
 
أوقات بيجيلي أسئلة من أمهات أطفالهم عمرهم سنة أو سنة و كام شهر عايزين يبدأوا يدربوا ولادهم ، انتوا مستعجلين ليه؟!!!!! ، عمروكوا شوفتوا طفل كبير لسه لابس بامبرز ، اطمنوا و اهدوا و متستعجلوش
 
انا عارفه ان الجدات و الأقارب دايما بيعلقوا علي الموضوع من بدري و يقولوا انتي ازاي لسه سايبه ابنك لابس بامبرز و ده بيعمل عليكي ضغط ، بس هل من المنطقي انك تضغطي طفلك و تطلبي منه حاجه قبل قدرته عليها علشان ضغط الناس ، ولو فعلا سمعتي كلامهم و بدأتي بدري التدريب هيطول و هيكون في حوادث أكتر
 
مساءكم هدوء و طول بال 🙂
 
نانسي شبانة
 
هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..