“أنا و بابا بنشتغل علشان نجيب فلوس علشان نعرف نجيب لكوا كل اللي انتوا عايزينه ”
أعتقد بردوا إن الجملة دي اتقالت لنا كلنا و إحنا صغيرين ، جملة كارثة بتشكل إدراك الطفل علي مفهوم خاطئ تماما ، و لما نكلمه بعد كده عن دوره في الحياة و سبب خلقته الطفل هيجد إزدواجية ، هيطلع بيجري علي رزقه في الدنيا زي ما شاف أبوه بس بيردد كلام عن الهدف من الحياة زي الفل
إيه الصح ؟
انا رأي إن التربية بكل تفاصيلها بتسمع في بعض و كلها متشابكة ، يعني لما يبدأ الطفل يتعلم الحروف و الكتابة و يدخل في حاجات الأكادمية ، اركز علي كذا حاجة سواء بالحواديت أو بالنقاشات
١- إن اللي بيروح الحضانة أو المدرسة هو اللي بيتعلم حاجات كتيير فبيكون أشطر و أقوي علشان بيعرف حاجات كتيير
٢- ماما و بابا بيشتغلوا علشان كل واحد لازم يعمل حاجة في الدنيا مينفعش نكون فاضيين و الحاجات دي تكون مفيدة للناس ، يعني انت بتروح الحضانة علشان تتعلم حاجات تخليك لما تكبر تقدر تفيد الناس و كل ما تتعلم حاجات أكتر هنقدر تفيد ناس أكتر لما تكبر
٣- تعالي يوم من بره فرحانه و احكيله انك مبسوطه علشان انتي عملتي حاجات حلوه لناس كتيير و كانوا مبسوطين
٤- احكي لطفلك حدوته عن مفهوم ان اللي بيعمل الي عليه بيحصل علي تنايج إيجابية إن أجلا أو عاجلا
٥- لما يجي وقت نكلمه عن ربنا نفهمه إن ربنا لما بيلاقي ان احنا بنفيد الناس و بنشتغل و بنعمل اللي علينا بيجبلنا كل حاجة
يعني بدل ما الجملة تكون”أنا و بابا بنشتغل علشان نجيب فلوس علشان نعرف نجيبلكوا كل اللي انتوا عايزينه ”
تبقي للطفل قبل عمر ال ٦ سنوات ” أنا و بابا بنشتغل علشان نفيد الناس و نعملهم حاجات حلوة و يبقوا مبسوطين و إحنا كمان نبقي مبسوطين ”
و للطفل بعد عمر ٦ سنوات ” أنا و بابا بنشتغل علشان نفيد الناس و نعملهم حاجات حلوه و يبقوا مبسوطين فربنا يحبنا و لما ربنا يحبنا كل الحاجات الحلوه اللي احنا عايزنها تحصل في حياتنا ”
متربوش ولادكم علي الماديات ربوهم علي القيم ، الماديات جايه جايه والله للي بيعيش القيم بس نفهمها و نعيشها صح
مره باسل ابني بيسألني ” ماما أنا لما هكبر هعمل إيه ؟ ” في الأول مفهمتش سؤاله بس ادركت انه يقصد هيشتغل إيه ، فقولت له ممكن تعمل طيار أو دكتور أو مدرس المهم تكون حاجة بتفيد الناس ، قالي انتي بتعملي أيه ، قلتله أنا و بابا بنخلي الناس مبسوطين و مرتاحين ، قالي أنا عايز لما أكبر أعمل زيك ضحكتله و قلتله يبقي الحاجات اللي بتاخدها في المدرسه تتعلمها كويس و النقاش خلص ، تاني يوم الصبح لقيته ماسك اللاب بتاعي و مركز أوي بقوله باسل ده لاب ماما انت بتعمل إيه ، رد عليه بمنتهي الجدية يا ماما أنا بعمل زيك بخلي الناس مبسوطين :)))) ، في حاجات كتيير بعدها اعدت ادور عليها علي اللاب
نانسي شبانة
اقرأ أيضاً: كيفية التعامل مع الطفل العنيد والعصبي
اقرأ أيضاً: نصائح لتربية الاطفال
اقرأ أيضاً: كيفية التعامل مع الاطفال
هل ساعدك هذا المقال ؟