احتياجات الطفل النفسية – الاحتياج الثاني الي المحبة

أول إحتياج نفسي للطفل هو الإعتبار و ده اتكلمنا عنه بالتفصيل المقالة اللي فاتت: الاحتياج النفسى الاول الى الاعتبار
الإحتياج النفسي التاني للطفل : الحاجة إلي المحبة
ببساطة الطفل محتاج يحس إنه محبوب
 
لو سألنا الأمهات هل بتحبوا أولادكم ؟ الكل هيقول طبعا
لكن هل تعبري لطفلك عن حبك ؟ وكيف تعبري ؟ و هل يعلم طفلك انك تحبيه ؟
 
الطفل هيتكون عنده عاطفة سليمة لما انتي تحبيه بطريقة صح لأنه بيتعلم منك
 
عارفين ليه ممكن بنت أول ما تبقي مراهقه يجي شاب بكلمتين ينسيها الدنيا ، لأن اهلها حبوها بطريقة غلط و ده تسبب في خلل في تكويتها العاطفي و خلي عندها إحتياج قوي لإنها تحس إنها محبوبة
 
إزاي ابني المحبة بيني و بين طفلي
 
١- عبري عنها لفظيا و لكن بصدق لأن الطفل يدرك جيدا المشاعر وراء الكلمات ، يعني متقوليهاش الا و انتي فعلا مستشعراها صادقة لحظتها ، يعني مش يبقي مطلع عينك و انتي مش طيقاه و علشان تنيميه و متعوده تقوليها له قبل ما ينام تقوليها ، كده بتفقد إحساسها عند الطفل
 
٢-اسمعي لإبنك كويس ، اسمعيه زي ما بتسمعي زوجك أو صديقتك ، اسمعيه و انتي فعلا بصدق يهمك تعرفي هو بيقول إيه ، الإستماع إهتمام و الإهتمام محبه ، اسمعيله و هو صغير هيسمعلك و هو كبير
 
٣- اعطيه حنان و تعبير معنوي أكثر ما تعطية هدايا ومشتريات ، شاركيه ألعابه ، خليه يشاركك خروجه ، يشاركك في شراء طلبات البيت ، في إختيارات الأكل اليومية
 
٤- ثقي في إبنك ، طفلك هيحس بحبك لما يحس انك واثقه فيه و في قدراته و هيبقي عايز يثبت انه علي مستوي الثقة و أهل له ، لكن لو اظهرتي قلة ثقة هيظهر بصورتين لمحاولة الإحتيال و الخداع ، هيظهر بصورة خارجية خوفا منك و لإرضاءك وده هيكون عكس ما هو عليه من الداخل
 
علامات حب طفلك ليكي:
 
١- بيعتبر انك قدوة و عايز لما يكبر يبقي زيك
٢- بيعتبر ان انتوا أصحاب
٣- يهمه يعرف رأيك في أعماله و سلوكه
٤- يفرح بقدومك و يشتاقلك في غيابك
٥- بيكون حريص يكون بقربك ( لكن مش تعلق )
٦- بيقول ماما بتحبني كتييييييير
٧- بيتبسط باللعب معاكي
٨- بيحب يتكلم و يحكيلك
٩- بيفرح لما يحضنك
 
تخيلوا ان في بعض من الحاجات دي اللي هي تعبير عن حب طفلك امهات بيتذمروا و بيضايقوا منها
 
لا تشغلي نفسك بالبحث في سلوك طفلك عن أمور تأكد ليكي صفة سلبية فيه و تجاوزي سلوكه السلبي ببساطه و لا تضخمي و سميه خطأ مجرد خطأ
 
اشغلي نفسك بالبحث في سلوكه عن أمور تأكد صفه إيجابيه و ضخميها و ركزي عليها علشان تتعزز و تزيد و الطفل يثق بنفسه و يستشعر محبتك و صدقيني السلبي مع الثقة و الحب هيروح لوحده دون عناء
 
أخر حاجه كل كلمه بتقوليها لطفلك هتبقي صوته الداخلي لما يكبر و احبوا أطفالكم و تقبلوهم كما هم و ساعدوهم يكونوا أفضل دائما
 
مساءكم حب 🙂
 
نانسي شبانة
 
هل ساعدك هذا المقال ؟

تصنيفات : مقالات عن تربية الاطفال

اترك تعليقا

بريدك الالكتروني لن يتم نشره

نرجو من الجميع الحفاظ علي مستوي متميز من الحديث الراقي دون سب أو تجريح أو نشر للكراهية..